काभ्रे — खानीखोला र बेथानचोक गाउँपालिकाको सीमामा रहेको चिसापानी सामुदायिक वनमा मंगलबारदेखि सुरु भएको डढेलो अन्य तीन सामुदायिक वनमा फैलिएको छ । डढेलो लाग्न सुरु भएको ४ दिन बित्दा पनि नियन्त्रणमा आउन सकेको छैन । 

खानीखोला–१ थाम लेकको चिसापानी सामुदायिक वनबाट सुरु भएको आगो फैलिँदै बेथानचोक–१, २, ३ र ५ को सीमा क्षेत्रसम्म आइपुगेको हो ।

चिसापानीको डढेलो आफैं नियन्त्रणमा आए पनि महाभारत पर्वतशृंखलामा पर्ने अन्य तीन सामुदायिक वनमा भने नियन्त्रणमा आउन सकेको छैन । डढेलो बस्तीमा आउन नदिन शुक्रबार बेथानचोक–२ रमित्तेडाँडा र ज्वानो थुम्कामा सिम्रिक एयरको हेलिकोप्टरबाट पानी खन्याएर आगो निभाउने प्रयास गरेको बेथानचोक गाउँपालिकाका अध्यक्ष भगवान अधिकारीले बताए ।

 ‘हेलिकोप्टरले नाङ्गेचौरको पोखरीबाट बकेटमा पानी बोकेर जोखिम भएको रमित्तेडाँडामा आगो निभाएको छ,’ उनले भने, ‘हेलिकोप्टरले एक पटकमा १ हजार लिटर पानी बोक्ने रहेछ, २४ पटकसम्म पानी बोकेर जोखिम भएको ठाउँमा आगो निभाइएको हो ।’ उनका अनुसार वडा १ सेतीभीर, वडा २ बाँसघारी, रतनचौर, वडा ३ देउराली डाँडा, हरेल डाँडा, गौरी भन्ज्याङ, ढुटीडाँडा, नारायणस्थान, वडा ५ को च्याल्टीलगायत स्थानमा डढेलोको जोखिम छ ।