बुटवल — बुटवल गोरुसिंगे सडक विस्तारको काम सुरु भएको छ । बुटवलदेखि गोरुसिंगेसम्मको झन्डै ५० किलोमिटर सडकको शुक्रवार प्रधानमन्त्री केपी शर्मा ओलीले भर्चुअल माध्यमबाट बुटवल–१३ जिगतढीमा शिलान्यास गरेका छन् । सडकको शिलान्याससँगै निर्माणको काम सुरु भएको आयोजनाले जनाएको छ । 

आयोजनाको भर्चुअल शिलान्यास गर्दै प्रधानमन्त्री ओलीले तीन वर्षभित्रै बुटवल-गोरुसिंगे सडक विस्तारको काम सम्पन्न हुने बताए । प्रधानमन्त्री केपी शर्मा ओलीले विकास निर्माण र पूर्वाधारका हिसाबले अब नेपाल अघि बढिसकेको पनि बताए । ‘हामी देश विकासमा धेरै अघि बढिसकेका छौं,’ उनले भने, ‘सुरुङ मार्ग, प्रशासनिक भवन, सडकका ठूला आयोजना समयमै सम्पन्न गर्ने र त्यसको प्रतिफल जनताले पाउने अवस्था सुरु भएको छ ।’ उनले बुटवल-गोरुसिंगे सडक पनि आगामी तीन वर्षभित्रमै सक्ने गरी निर्माण सुरु गरिएको बताए । ‘देशको विकासमा हामी उच्च सङ्कल्प र आँटका साथ देशको विकास हामीहरू आफैंले गरिरहेका छौं,’ उनले भने । 

सडक शिलान्यास कार्यक्रममा उपप्रधानमन्त्रीद्वय प्रकाशमान सिंह, विष्णुप्रसाद पौडेल, भौतिक यातायात तथा पूर्वाधारमन्त्री देवेन्द्र दाहाल, लुम्बिनीका मुख्यमन्त्री चेतनारायण आचार्य र नेपालका लागि चीनका राजदूत चेन सोङलगायतको भने प्रत्यक्ष उपस्थिति रहेको थियो । 

राजा महेन्द्रका पाला २०१९ सालमा निर्माण भएको पूर्वपश्चिम राजमार्गको बुटवलदेखि चन्द्रौटासम्मको सडक खण्ड ६२ वर्षपछि विस्तार हुन लागेको हो । सुरुमा एक लेनमा निर्माण गरिएको सडक २०३५/३६ सालमा दुई लेनमा विस्तार भएको थियो । बुटवलदेखि चन्द्रौटासम्म एसियाली विकास बैंकको ऋण सहयोगमा २७ करोड ५० लाख अमेरिकी डलर (झन्डै ३५ अर्ब) लागतमा ६९ किलोमिटर सडक अब ४ लेनमा विस्तार हुनेछ । 

पहिलो चरणमा बुटवलदेखि गोरुसिंगेसम्मको झन्डै ५० किलोमिटर सडक निर्माण सुरु भएको हो । १९ किलोमिटर दूरीको गोरुसिंगे-चन्द्रौटा खण्डमा दोस्रो चरणमा निर्माण गरिनेछ । बुटवलदेखि गोरुसिंगे खण्डमा रुखको मार्किङ, विद्युत् पोलको व्यवस्थापन, माटो, ढुंगा, गिटी र बालुवाको परीक्षणका लागि ल्याब निर्माण, ठूला मेसिन र सामाग्रीहरुको व्यवस्थापन र सडकको जाँच गर्ने काम सकेर शुक्रबार शिलान्यास गरिएको हो । 

पहिलो चरणमा सडक विस्तारसँगै ३० वटा पुल निर्माण हुनेछन् । १ सय ४९ कल्भर्ट र ६ वटा अन्डर पास/ओभर पास निर्माण हुनेछन् । यो सडक सहरी क्षेत्रमा ५०, सहरोन्मुख क्षेत्रमा ३७ र जंगल क्षेत्रमा २४ मिटर चौडाइको बन्नेछ । सडक क्षेत्रमा पर्ने ७ हजार बढी रुखहरू काटिएको बुटवल-गोरुसिंगे सडक परियोजना प्रमुख इन्जिनियर कुशलता न्यौपानेले बताइन् ।