काठमाडौँ — चालु आर्थिक वर्ष (२०८०/०८१) सुरु भएयता भएका आगलागीका १४ सय ४२ घटनामा २२ जनाको मृत्यु भएको छ । बुधबार प्रतिनिधिसभा अन्तर्गतको कृषि, सहाकारी तथा प्राकृतिक स्रोत समितिमा गृह मन्त्रालयका सहसचिव टोकराज पाण्डेले यो तथ्याक‌ बताएका हुन् । उनले आगलागीका घटनामा परी मृत्यु हुनेमा ६ पुरुष र १६ जना महिला रहेका छन् ।

यही अवधिमा आगलागीका घटनाबाट १६ सय ५६ घर परिवार प्रभावित भएका छन् । आगलागीले ८८ घरमा आंशिक र २२८ घरमा पूर्ण क्षति हुँदा ६७ करोड २६ लाख १० हजार १ सय ५३ रुपैयाँ बराबरको क्षति भएको सहसचिव पाण्डेले बताए ।

उनले २०८० को फागुनदेखि वैशाख मसान्तसम्म आगलागीबाट ५६ तथा डढेलोको घटनाबाट १७ जनाको मृत्यु भएको पनि बताए । उनले तीन महिनाको यो अवधिमा आगलागी एवं डढेलोबाट १ अर्ब २३ करोड ७५ लाख ३१ हजार ९६५ रुपैयाँ बराबरको क्षति भएको पनि बताए ।

सहसचिव पाण्डेले डढेलो मानवीय हेलचेक्र्याँई र नियोजित रुपमा लगाउने गरिएको बताउँदै आगलागी र डढेलो नियन्त्रणका लागि जिल्ला विपद् व्यवस्थापन समितिमार्फत जनचेतना बिस्तार र सचेतना कार्यक्रमहरु सञ्चालन गर्ने व्यवस्था मिलाइएको बताए ।