काठमाडौँ — माओवादी केन्द्रको भ्रातृ संगठन अखिल (क्रान्तिकारी) मा ३२ वर्षे उमेर हद लागेपछि अध्यक्ष पदका लागि एक दर्जन युवा आकांक्षी देखिएका छन् ।

अखिल (क्रान्तिकारी) को पुस १४ मा भएको निर्वाचनमा उमेर हद लगाउनुपर्ने पक्षमा बहुमत आएपछि ३२ वर्ष मुनिका युवाहरूबीच नेतृत्वको दौड सुरु भएको छ ।

माओवादीले विद्यार्थी संगठनमा लामो समयदेखि पुरानै नेता दोहोरिने परम्परा ताेड्दै  उमेर हद लगाएर युवालाई अघि सार्ने निर्णय गरेको थियो । विद्यार्थीमा उमेर हद लागेपछि करिब साढे दुई सय विद्यार्थी नेताहरू बाहिरिएका छन् । संगठनबाट बाहिरिएका नेताहरूले पार्टीमा उचित जिम्मेवारी दिन माग गरेका छन् ।

अखिलको नेतृत्वका लागि माघ १२ मा प्रत्यक्ष निर्वाचित हुने माओवादी केन्द्रीय सदस्य एवं विद्यार्थी इञ्चार्ज हिमाल शर्माले जानकारी दिए ।

अध्यक्ष हुने दौडमा विजयप्रकाश सापकोटा, योगेन्द्र बुढा, उपदेश यादव, श्याम रोका, तिर्सना हमाल, प्रविना अधिकारी, रोशन थापा मगर, हेमन्त राई, सुदीन पौडेल र गोविन्द बानियाँ छन् । त्यस्तै महासचिवको हुने दौडमा  देवकी कार्की, देवेन्द्र शर्मा र अटल आचार्य छन् । अखिल क्रान्तिकारी एक नेताका अनुसार अध्यक्षका केही दाबेदार उपाध्यक्ष र महासचिव पद सुनिश्चित गर्न उम्मेदवार हुने बताएका छन् ।  

अखिल क्रान्तिकारीमा वरिष्ठ उपाध्यक्ष नारायणकाजी श्रेष्ठ, उपमहासचिव वर्षमान पुन, जनार्दन शर्मा र उपाध्यक्ष पम्फा भुसाल र महासचिव देव गुरुङले निकटलाई नेतृत्वका लागि अघि सार्ने तयारी गरेका छन् ।

नेतृत्व चयनका लागि सातै प्रदेशमा निर्वाचन हुनेछ । माघ ५ मा मनोयन गरी १२ मा चुनाव गर्ने कार्यतालिका छ ।विद्यार्थी संगठनका इञ्चार्ज शर्माले नेतृत्वका लागि ३२ वर्षमुनिका युवाहरुबीच कडा प्रतिस्पर्धा हुने बताए । उमेर हद लागू भएपछि यसले विद्यार्थी संगठनमा युवाबीच हुने प्रतिस्पर्धाले नयाँ तरङ्ग ल्याएको बताए ।

‘माघ १२ मा प्रत्यक्ष निर्वाचनबाट नेतृत्व चयन हुनेछ’ उनले भने, ‘संगठनमा उमेर हद लागेपछि युवा विद्यार्थीबीच नेतृत्व लिन रोचक प्रतिस्पर्धा सुरु भइरहेको छ ।’

विद्यार्थी संगठनमा लागेको उमेर हदले ३२ वर्षमाथिका युवाहरु पार्टीका विभिन्न संगठनमा जोडिने भएकाले त्यसले सकारात्मक सन्देश दिएको बताए । ‘अब स्ववियु निर्वाचनमा पनि युवाहरु नेतृत्वमा आउने बाटो खुलेको छ,’ उनले भने, ‘हाम्रो पार्टीमा युवाहरू ठूलो संख्यामा लामबद्ध हुनेछन् ।’

अखिल क्रान्तिकारीमा पुस दोस्रो साता उमेर हद लगाउने/नलगाउने विषयमा प्रत्यक्ष निर्वाचन भएको थियो ।  करिब दुई हजार चार सय मतदाता रहेकामा १ हजार ७ सय ८९ मत खसेको थियो । मत परिणाम अनुसार उमेर हद लगाउनुपर्ने पक्षमा ९ सय र नलगाउने पक्षमा ८ सय ७९ मत खसेको थियो । माओवादी पार्टीभित्र उमेर हद लगाउने पक्षमा दुई खेमा थियो । उमेर हद लगाउने पक्षमा उपमहासचिव वर्षमान पुन र जनार्दन शर्मा थिए ।