त्यसैगरी २०८१ माघ १ गतेदेखि राष्ट्रिय परिचयपत्रका आधारमा पनि बैंक तथा वित्तीय संस्थामा नयाँ खाता खोल्न सकिने भएको छ । राष्ट्र बैंकले बिहीबार परिपत्रमार्फत उक्त निर्देशन दिएको हो ।

त्यस्तै सरकारले लिपुलेक–कालापानी–लिम्पियाधुरा क्षेत्र समेटिएको नयाँ नक्सा अन्तर्राष्ट्रिय जगत्‌लाई औपचारिक रूपमा अझै नपठाएको समाचार पनि कान्तिपुरले बिहीबार प्रकाशित गरेको छ । नयाँ चुच्चे नक्सा जारी गरेको साढे चार वर्ष बितिसक्दा पनि सरकारले दुई छिमेकी चीन र भारतलगायत मुलुकका साथै संयुक्त राष्ट्रसंघलाई समेत कूटनीतिक च्यानलबाट जानकारी नगराएको हो ।

त्यस्तै अमेरिकामा डढेलोको प्रकोपबारे पनि कान्तिपुरमा बिहीबार समाचार प्रकाशित छ । अमेरिकाको क्यालिफोर्निया राज्यमा फैलिएको भीषण डढेलोका कारण कम्तीमा पाँच जनाको ज्यान गएको छ ।

डढेलोका कारण ११ सय भन्दा बढी संरचना जलेर नष्ट भएका र १ लाख ३७ हजार जना विस्थापित भएका अधिकारीहरूले जनाएका छन् । लस एन्जलस सहरको नयाँ स्थानमा आगो फैलिरहेको छ । अमेरिकी सञ्चार माध्यहरूका अनुसार लस एन्जलस र यसको छिमेकी भेन्चुरा काउन्टीमा ६ स्थानमा डढेलो फैलिइरहेको छ । तीमध्ये पाँच स्थानका डढेलो पूर्ण रूपमा अनियन्त्रित बनेका छन् ।