पोखरा — सूर्यदर्शन सहकारी ठगी प्रकरणमा कास्की जिल्ला अदालतमा सोमबारदेखि रास्वपा सभापति रवि लामिछानेविरुद्धको थुनछेक बहस सुरु भएको छ । कास्की प्रहरीको हिरासतमा रहेका ७ मध्ये यसअघि छविलाल जोशी र लीला पछाईंविरुद्धको थुनछेक बहस सकिएर लामिछाने पक्षका कानुन व्यवसायीले बहस गरेका हुन् ।

 न्यायाधीश नीतिज राईको इजलासमा भइरहेको थुनछेक बहसमा सोमबार वरिष्ठ अधिवक्ताहरु सुशीलकुमार पन्त, रमण श्रेष्ठ र सुरेन्द्र थापाले लामिछानेको पक्षमा बहस गरे । उनीहरुले बहसमा मुख्यतः तीनवटा तर्कमा जोड दिए । लामिछानेविरुद्ध राज्यले बदनीयत राखेर राजनीतिक प्रतिशोध लिन खोजेको, आकर्षित नहुने कानुनका दफा प्रयोग गरेको र हदम्याद काटेर मुद्दा दर्ता भएको उनीहरुको तर्क थियो । 

वरिष्ठ अधिवक्ता पन्तले सहकारी ठगीमा हदम्याद नाघेर सहकारी ऐनको क्षेत्राधिकार बाहिर गएर लामिछानेमाथि मुद्दा दायर भएको तर्क गरे । उनले लामिछानेले विसं २०५३ मा अंशवापत पाएको जग्गा भनेर मिसिलमै उल्लेख गरिए पनि सम्पत्ति शुद्धीकरणमा जफत गर्नुपर्ने मागदाबी आफैमा बाझिएको उल्लेख गरे । मुद्दा दायर हुँदा संगठित र सामूहिक अपराधबीचमा फरक नछुट्याइएको उनको तर्क थियो । 

अर्का वरिष्ठ अधिवक्ता रमण श्रेष्ठले अदालतमा विचाराधीन रहेको मुद्दामा संसदीय छानबिन विशेष समिति बनाएर प्रतिवेदन ल्याउनु नै गलत रहेको तर्क प्रस्तुत गरेका थिए । ‘रवि राजनीतिमा रहिरहँदा अरु पुराना पार्टी सिध्याइदिन्छ भनेर रविलाई रोक्नलाई षड्यन्त्र गरिएको हो,’ इजलासमा उनले भने, ‘दूषित मनसायले जानीबुझिकन लिइएको प्रतिशोध हो ।’ 

उनले गोर्खा मिडिया नेटवर्कले सञ्चालन गरेको ग्यालेक्सी टीभीमा उपकरण खरिदमा ४८ करोड रुपैयाँ खर्च भएको र ती सामानको मूल्य अहिले ४४ करोड पर्ने भएकोले त्यसलाई बेचेर बचतकर्ताको रकम फिर्ता गर्नुपर्ने प्रस्ताव गरे । ‘ती सामान त्यतिकै राख्ने हो भने खिया लागेर जान्छ । सामान लिलाम गर्न वा सरकारले नेपाल टेलिभिजनमा प्रयोग गर्ने गरेर खरिद गर्न सक्छ,’ उनले भने, ‘ती सामान नेपाल सरकारले प्रयोगविहीन बनाउन खोज्दै छ ।’ वरिष्ठ अधिवक्ताद्वय पन्त र सुरेन्द्र थापाले पनि गोर्खा मिडिया नेटवर्कको सम्पत्ति बेचेर बचतकर्ताको रकम फिर्ता गर्नुपर्ने तर्क गरेका थिए । 

इजलासमा  वरिष्ठ अधिवक्ता श्रेष्ठले तत्कालीन प्रधानमन्त्री पुष्पकमल दाहाल, प्रहरी महानिरीक्षक बसन्तबहादुर कुँवरलगायतले संसदीय समितिको बैठकमा गएर दिएको ‘लामिछानेले ठगी गरेको प्रमाण नभेटिएको’ अभिव्यक्तिको भिडियो न्यायाधीशलाई देखाउन खोजेका थिए । केहीबेर ल्यापटपमा भिडियो प्रशारण भएपछि न्यायाधीश राईले प्रमाणका रुपमा बुझाइसकेका सामग्री आफूले हेर्ने भएकोले इजलासमा समय खेर नफाल्न रुलिङ गरेको इजलासमा उपस्थित एक कानुन व्यवसायीले बताए । 

न्यायाधीश राईले गोर्खा मिडिया नेटवर्कमा सहकारीबाट रकम गएकोबारे लामिछानेलाई थाहा भएको वा नभएकोबारे वरिष्ठ अधिवक्ता सुरेन्द्र थापालाई प्रश्न गरेका थिए । जवाफमा थापाले पैसा ल्याएको जीबी राई भएकोले लामिछानेलाई थाहा हुन जरुरी नरहेको तर्क गरेका थिए ।