काठमाडौँ — सत्तारुढ गठबन्धनको संयुक्त संसदीय कार्यदलले संसद्मा विचाराधीन विधेयक समयसीमाभित्रै पास गर्ने विषयमा विपक्षी दलका प्रमुख सचेतकहरूसँग छलफल गर्ने निर्णय गरेको छ ।

कांग्रेस र एमालेको संसदीय कार्यदलले संघीय संसद्मा विचाराधीन विधेयकलाई आगामी अधिवेशनमा पास गराउने गरी काम गर्ने निर्णय गरेको हो । बैठकपछि कांग्रेसका सहमहामन्त्री तथा सांसद जीवन परियारले प्रतिनिधिसभा र राष्ट्रिय सभाका समितिमा रहेका विधेयक पारित गर्न आवश्यक छलफलका लागि संघीय संसद्मा रहेका दलका प्रमुख सचेतकहरूसँग परामर्श गर्ने निर्णय गरिएको बताए । 

विपक्षी दलका प्रमुख सचेतकहरूसँग छलफल गर्ने अधिकार कांग्रेसका प्रमुख सचेतक श्याम घिमिरे र नेकपा एमालेका प्रमुख सचेतक महेश बर्तौलालाई जिम्मेवारी दिइएको बताए । उनले आगामी १७ गतेभित्र संघीय संसदका विभिन्न समितिमा रहेका विधेयकबारे दलगत समितिका सदस्यसँग आवश्यक छलफल गर्ने निर्णय गरेको पनि बताए ।

‘प्रतिनिधिसभा र राष्ट्रिय सभाका समितिमा रहेका विचाराधीन विधेयकका सन्दर्भमा आगामी संसद्को बैठकमा सबै विधेयक पारित गर्नका निम्ति समितिहरूबाट विधेयक पास भएको हुनुपर्छ । विधेयक पारितका निम्ति आवश्यक छलफलका लागि अन्य दलका प्रमुख सचेतकहरूसँग आवश्यक परामर्श गर्नका लागि नेपाली कांग्रेसका सचेतक श्यामकुमार घिमिरे र नेकपा एमालेका प्रमुख सचेतक महेश बर्तौलालाई अन्य दलका प्रमुख सचेतकहरूसँग आवश्यक छलफल अधिकार दिने निर्णय गरेका छौं,' परियारले भने, 'प्रतिनिधिसभाका पाँच समितिमा विधेयक छलफलमा छन् । समितिमा रहेका सदस्यसँग समितिमा विधेयक कस्तो अवस्थामा छ । आगामी संसद्मा उक्त विधेयक पारित गर्न के-के गर्नुपर्छ भन्ने विषयमा आगामी १७ गतेभित्र दलगत समितिका सदस्यहरूसँग आवश्यक छलफल गर्ने निर्णय गरेका छौं ।'