उनले श्रमिकको स्वास्थ्य जाँचहरू प्रक्रियागत मात्र नभएको बताए । ‘यी स्वास्थ्य जाँचहरू प्रक्रियागत मात्र होइनन्, यो सार्वजनिक स्वास्थ्यको रक्षा गर्ने, श्रम मापदण्डहरू कायम राख्ने र प्रत्येक श्रमिकको मर्यादाको रक्षा गर्ने हाम्रो सामूहिक दायित्वको प्रतिविम्ब हुन्,’ उनले भने, ‘मलेसियाले स्वास्थ्य परीक्षणहरू गर्ने संस्थाहरू र व्यावसायिक चिकित्सकको लगनशीलता, निष्ठा र प्रयासलाई कदर गर्छ । यो कामले मलेसियन श्रम बजारमा प्रवेश गर्ने श्रमिकहरू स्वस्थ र तन्दुरुस्त राख्न, स्वास्थ्य जोखिमहरू कम गर्न र सुरक्षित काम गर्ने वातावरणलाई प्रवर्द्धन गर्न सुनिश्चित गर्दछ । व्यावसायिकता र प्रतिबद्धता कायम गर्दा विश्वसनीय साझेदारहरूका रूपमा नेपाली स्वास्थ्य संस्थाहरूको प्रतिष्ठालाई बलियो बनाएको छ ।’

प्रमुख गन्तव्य मुलुक अरव र मलेसिया लगायत देशमा जाने स्वास्थ्य परीक्षण शुल्क ६ हजार ५ सय तोकिएको छ । नेपाल र मलेसियाबीचको श्रम सम्झौता अनुसार नेपालमा गरिएको स्वास्थ्य परीक्षणको शुल्क रोजगारदाताले पहिलो महिनाको तलब बुझेपछि फिर्ता गर्नुपर्ने बाध्यकारी प्रावधान छ । गन्तव्य देशहरूले श्रमिकको स्वास्थ्य परीक्षण गर्ने संस्थाहरू आफैं छनोट गर्दै आएका छन् ।