सुनसरी — धरान उपमहानगरपालिकाका प्रमुख हर्क साम्पाङका समर्थकले समाचारका विषयमा पत्रकार गोपाल दाहाललाई धम्की दिएका छन् । साम्पाङका समर्थकले आइतबार राति दाहाललाई पठाएको म्यासेजमा ‘तेरो दिन धेरै छैन’ भनेर धम्क्याइएको छ ।

दाहाललाई ९७०७३६८७०७ नम्बरबाट म्यासेज आएको हो । म्यासेजमा धरानका मेयरले विकास गरिरहेको र उनको कामविरुद्ध लेखेको भन्दै ‘राम्रो काम गर्नेलाई राम्रो गर्न’ नदिएको आरोप लगाइएको छ । 

पत्रकार दाहालले खोज पत्रकारिता केन्द्रका लागि ‘हर्क साम्पाङको मनमौजी शासन, बेथितिको दलदलमा धरान’ शीर्षकमा समाचार लेखेका थिए । समाचार प्रकाशित भएलगत्तै आक्रोशित बनेका साम्पाङले दाहालसहित पत्रकार महासंघ सुनसरीका अध्यक्ष जनकऋषि राईविरुद्ध सामाजिक सञ्जालबाट धम्की दिएका थिए । यस विषयमा दाहाल र राईले सुरक्षाको माग गर्दै जिल्ला प्रहरीमा निवेदन दिइसकेका छन् । 

प्रमुख साम्पाङले पनि आफूविरुद्ध समाचार लेख्ने पत्रकारलाई कारबाही गर्न आग्रहसहितका तीनवटा पत्र संघीय सरकारलाई पठाएका छन् । आफूविरुद्ध समाचार लेख्ने पत्रकार र नदीजन्य पदार्थ उत्खनन गर्नेमाथि कारबाही गर्न गृह मन्त्रालयलाई दुईवटा पत्र र प्रशासकीय अधिकृत पठाइदिन सामान्य प्रशासन मन्त्रालयलाई पत्र लेखेका हुन् । 

साम्पाङले दाहाल र जनकऋषिलाई कारबाही गर्न माग गर्दै गृहमन्त्री रमेश लेखकलाई पत्र लेखेका छन् । साम्पाङले गृहमन्त्रीलाई लेखेको पत्रमा पत्रकार दाहालले समाचारमा ‘आफूलाई नक्कली माओवादी बनेर चन्दा असुलेको उल्लेख गरेको र उक्त विषय झूटो भएको’ दाबी गरिएको छ । उक्त समाचारलाई जनकऋषिले दुष्प्रचार गरेको साम्पाङको आरोप छ ।