काठमाडौँ — बाढीपहिरोले सडक यातायात अवरुद्ध भएको बेला काठमाडौं-रुम्जाटार उडान पुनः सुरु भएको छ । २०७६ देखि ओखलढुंगाको रुम्जाटार विमानस्थल सञ्चालनमा थिएन ।

काठमाडौंबाट ओखलढुंगाको रुम्जाटार विमानस्थलमा आइतबारदेखि उडान सुरु भएको हो । सातामा दुई दिन उडान गर्ने गरी हाल रुम्जाटरमा विमानस्थल पुनः सञ्चालनमा ल्याइएको हो । 

प्रतिनिधिसभाको राज्यव्यवस्था तथा सुशासन समितिका सभापतिसमेत रहेका ओखलढुंगाबाट निर्वाचित सांसद रामहरि खतिवडाले रुम्जाटार विमानस्थल सातामा दुई दिन चल्ने गरी पुनः सञ्चालनमा आएको जानकारी दिए । 'आइतबार समिट एयरलाइन्सको विमानले उडान भर्ने र प्रत्येक बुधबार नेपाल एयरलाइन्सको विमानले उडान भर्ने भएको छ,' उनले भने, '२०७६ सालमा रुम्जाटार विमानस्थलमा उडान स्थगित भएको थियो । यहाँका मान्छे बिरामी हुँदा हेलिकोप्टर चार्टर गर्नुपर्थ्यो र २ लाख ८० हजार कम्तीमा भाडा तिर्नुपर्थ्यो । आज मात्रै ८ जना बिरामी काठमाडौंबाट ओखलढुंगा आउनुभएको छ । ओखलढुंगाबाट रिफर गरिएका ७ जना बिरामी विमान चढेर काठमाडौं जानुभएको छ ।'