कीर्तिपुर नगरपालिकाका मेयर राजकुमार नकर्मीको निधन
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
काठमाडौँ — कीर्तिपुर नगरपालिकाका मेयर राजकुमार नकर्मीको निधन भएको छ । उपचारका क्रममा वीर अस्पतालमा मेयर नकर्मीको बिहीबार राति १०:४० बजे निधन भएको उपमेयर शुभलक्ष्मी शाक्यले कान्तिपुरलाई जानकारी दिइन् ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![कीर्तिपुर नगरपालिकाका मेयर राजकुमार नकर्मीको निधन](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/third-party/rajkumar-nakarmi-2672024044204-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
मेयर नकर्मी लामो समयदेखि मृगौला रोगबाट ग्रसित थिए । उपमेयर शाक्यले भनिन्, 'लामो समयदेखि डायलसिस गराउँदै आउनु भएको थियो । पछिल्लो १ महिनायता समस्या अलि बल्झिएको हो ।'
श्रद्धाञ्जलीका लागि ९ बजेदेखि ११ बजेसम्म कीर्तिपुर नगरपालिका परीसरमा मेयर नकर्मीको पार्थिव शरीर राखिने पनि उपमेयर शाक्यले बताइन् ।
नकर्मी गत स्थानीय चुनावमा कांग्रेसबाट मेयरमा निर्वाचित भएका थिए । वामपन्थीहरूको लालाकिल्लाका रूपमा रहेको कीर्तिपुर नगरपालिकामा पहिलो पटक एमाले 'क्लिन स्विप' भएको थियो । २०५४ सालमा नगरपालिका बनेको कीर्तिपुरमा पहिलो पटक कांग्रेसका नकर्मी मेयरमा निर्वाचित भएका थिए ।
कीर्तिपुरको मेयर तथा उपमेयर मात्रै नभएर १० वटा मध्ये ९ वडाध्यक्ष कांग्रेसका उम्मेदवारहरू विजयी भएका थिए । वडा नम्बर ४ मा भने स्वतन्त्र उम्मेदवार दिनेशचन्द्र दाहाल निर्वाचित भएका थिए।
कीर्तिपुर नगरपालिका वडा नम्बर १० का अध्यक्ष नरेश महर्जनका अनुसार २०४६ सालको जनआन्दोलनमा नकर्मीले सक्रिय भूमिका खेलेका थिए । त्यस्तै २०६२/०६३ दोस्रो जनआन्दोलनमा पनि उनको सक्रिय सहभागिता रहेको कांग्रेसबाट निर्वाचित वडाध्यक्ष महर्जनले बताए । उनले भने, '०४६ र ०६२/०६३ को आन्दोलनमा उहाँको सक्रिय भूमिका थियो । उहाँकै राजनीतिक कुशल नेतृत्वका कारण कांग्रेसले कीर्तिपुरमा गत स्थानीय चुनावमा मेयरसहित ९ वटा वडामा जित हासिल गरेको हो ।'
२०२० साल असार २० गते जन्मिएका नकर्मी काठमाडौं जिल्ला कांग्रेस समितिका उपसभापतिसमेत हुन् । नकर्मीमा श्रीमती, १ छोरी र १ छोरा रहेका छन् ।
![](https://assets-cdn.ekantipur.com/uploads/source/ads/900-x-100-1-0282024055738.gif)