सापकोटाले आफूले उक्त सडक स्तरोन्नतिका लागि सहयोग बारेमा भौतिक पूर्वाधार मन्त्रालयमा पुगेर कुराकानी गरेको तर उनीहरु नै त्यस बारेमा अनभिज्ञ रहेको जानकारी दिए । उनी त्यसपछि अर्थ मन्त्रालयको वैदेशिक महाशाखामा गएर बुझे ।

‘त्यहाँ गएर हेरेको त उक्त सहयोगको सम्बन्धमा हरेक वर्ष नवीकरण गरेको भन्दा नयाँ केही पनि पाइनँ । त्यसपछि मैले यस विषयमा बेइजिङस्थित हाम्रो दूतावासमा पनि कुराकानी गरेँ। र, नेपालमा चिनियाँ राजदूत छन सोङ पनि कुराकानी गरेँ,’ उनले भने,‘सबैबाट कुनै पनि जवाफ नआएपछि अन्त्यमा नेपाल सरकारकै पहलबाट यो सडक स्तरोन्नतिका लागि बजेट विनियोजन गरिएको छ । अब हामीलाई यो सडक स्तरोन्नतिको लागि चीनको सहयोग नचाहिने भएको छ ।’

सापकोटाले यो वर्ष बजेट छुटाएर बहुवर्षीय रूपमा काम गर्न थालेको जानकारी दिए । उनका अनुसार कोदारी राजमार्गको २६ किलो मिटर खण्डमा ६ वटा पहिरो छन् । ‘पहिरो र अन्य स्थानको सुधार नेपाल सरकारले नै गर्न लागेको हो । करिब ३ अर्ब ६० करोड रुपैयाँमा नेपाल नै बनाउन सक्छ भनेर काम हुन लागेको छ,’ उनले भने । बहुवर्षीय ठेक्कामा जाँदा करिब ४ वर्षमा काम सकिने सडक विभागको आकलन रहेको उनले बताए ।