काठमाडौँ — नेपालका पप सम्राट भनेर चिनिएका गायक ओमविक्रम विष्टलाई रेडियो कान्तिपुरद्वारा आयोजित ‘नेसनल म्युजिक अवार्ड्स २०८०’ को दीर्घसाधना सम्मान प्रदान गरिएको छ । पाँच दशकदेखि पप विधामा बिताएका विष्टले नेपालमा अनप्लग रेकर्डिङ पनि भित्र्याएका हुन् । उनको सांगीतिक योगदानको कदर गर्दै उक्त सम्मान दिइएको हो ।

‘यो सम्मान पाएर म अत्यन्त हर्षित छु,’ ७३ वर्षे विष्टले सम्मान थाप्दै खुसी व्यक्त गरे । उनको सम्मानमा गायक सुरजकुमार थापाले विष्टको अत्यधिक रुचाइएको गीत ‘म मौनतामा...’ समर्पित गर्दै गाएका थिए । गायक थापासँगै गायिका चाँदनी शाक्यले ‘चञ्चले...’ गीत प्रस्तुत गर्दा गायक विष्ट स्वयं स्टेज चढेर गायनमा साथ दिएका थिए । विष्टले त्यसपछि ‘को हो त्यो जसले मलाई...’ गाइरहँदा कार्यक्रममा उपस्थित दर्शक पनि झुमेका थिए ।

१३ विधामा प्रदान गरिएको अवाडर््समा २०७९ साउनदेखि २०८० असारसम्म प्रसारण भएका गीतलाई मूल्यांकनको आधार बनाइएको थियो । उत्कृष्ट ‘नवगायक/नव गायिका’ को अवार्ड ‘ए रात’ बाट गायक सुरेश ढुंगानाले जिते । उत्कृष्ट रचनाकारतर्फ ‘के लत बस्यो’ का लागि प्रदीप मैनालीले अवार्ड उचाले । तिलकसिंह पेलाको स्वर तथा संगीतमा रहेको उक्त गजल गतवर्ष निकै रुचाइएको थियो । 

उत्कृष्ट संगीतकारतर्फ ‘ढुंगा जस्तो’ बोलको गीतबाट महेश खड्काले अवार्ड पाए । जसमा सुवास चन्द्रको शब्द तथा गायक प्रमोद खरेलको आवाज रहेको छ । 

त्यसैगरी, उत्कृष्ट लोक दोहोरी गायिकाको अवार्ड ‘माझी दाइ’ बाट शान्तिश्री परियारले जितिन् । नेत्र अर्यालको शब्द रहेको यस गीतमा खेम सेञ्चुरीको संगीत छ । लोक गायकतर्फ भने ‘सकम्बरी’ बाट प्रकाश सपुत उत्कृष्ट ठहरिए । सपुतले यस विधामा मनोनयनमा परेका प्रकाश दुतराज, राजु परियार, खेम सेञ्चुरी, राजु ढकाललाई पछि पार्दै अवार्ड हात पारेका हुन् । पार्श्व गायिकातर्फ बेनिशा पौडेलले ‘नाइँ नभन्नु ल ६’ फिल्मको ‘दिउँला माया...’ बोलको गीतबाट प्रतिस्पर्धामा रहेका शहिमा श्रेष्ठ, सदिच्छा कट्टेल, निकिता थापा र रचना रिमाललाई पछि पार्दै नेसनल म्युजिक अवार्ड जितेकी हुन् । पार्श्व गायकतर्फ एसडी योगीले फिल्म ‘महापुरुष’ मा गाएको ‘बेमौसमी...’ बाट अवार्ड जिते । उक्त गीतमा राम अविरल विष्टको शब्दमा योगीले नै संगीत भरेका हुन् । 

उत्कृष्ट आधुनिक गायिकाको अवार्ड ‘कैयौं दुःख...’ बाट संगीता रानाले अवार्ड उचालिन् । यस विधामा उनीसँगै बानिका प्रधान, नुमा लिम्बू, रचना रिमाल र निशा देशार मनोनयनमा परेका थिए । उत्कृष्ट आधुनिक गायकतर्फ ‘के लत बस्यो...’ बाट तिलकसिंह पेलाले अवार्ड जिते । उत्कृष्ट आधुनिक गायकको विधामा तिलकसँगै गायक राजेशपायल राई, कर्म ग्याल्जेन बोम्जन, सुरजकुमार थापा र हिमाल सागर मनोनयनमा परेका थिए । उत्कृष्ट ब्यान्डतर्फ ‘अपरिभाषित’ बाट ‘स्वर’ ले अवार्ड उचाल्यो । यो विधामा अभया एन्ड द स्टिम इन्जिन्स, एक्सिस, मंकी टेम्पल र द एज ब्यान्ड मनोनयनमा परेका थिए । पप गायिकामा ‘बानी’ बाट सुवानी मोक्तानले अवार्ड उचालिन् । उनले त्रिशला गुरुङ, तृष्णा गुरुङ, मेलिना मैनाली र प्राश्ना शाक्यलाई पछि पार्दै वर्ष २०८० को उत्कृष्ट पप गायिका बनेकी हुन् ।