काठमाडौँ — प्रधानमन्त्री पुष्पकमल दाहालको चीन भ्रमणमा हुनैपर्ने सहमति नभएको प्रमुख प्रतिपक्ष एमालेका सचिव योगेश भट्टराईले बताएका छन् । प्रधानमन्त्रीको चीन भ्रमण खुद्रा मसिना कुरामा सीमित भएको उनको प्रतिक्रिया थियो । 

प्रतिनिधिसभाको आइतबारको बैठकपछि संचारकर्मीहरूलाई प्रतिक्रिया दिने क्रममा एमाले सचिव भट्टराईले नेपाल र चीनबीच उच्चस्तरीय विश्वासको वातावरण बनाउन प्रधानमन्त्रीको भ्रमण असफल भएको पनि बताए ।

‘प्रधानमन्त्रीको चीन भ्रमणमा जे कुरामा हाम्रो सहमति हुनुपर्थ्यो, जुन मुद्दामा बहस हुनुपर्थ्यो त्यो भएन । सामान्य खुद्रामसिना कुराहरू मात्रै भए । प्रधानमन्त्रीले तिर्थाटन पनि गर्नुभयो । छुट्टी पनि राम्रै मनाउनु भयो,' उनले भने, 'मुख्यतयाः चीनसँग हाम्रो बिआरआईका सम्बन्धमा भएका सम्झौताहरूको कार्यान्वयन हो । त्यो चाहीँ देखिनेगरी केही पनि भएन । त्यसको अर्थ चीनसँग जुन ढंगले हामीले गम्भीरताका साथ डिलिङ गर्नुपर्थ्यो त्यो हुन सकेन । नेपालप्रति चीनका कतिपय आशंका छन् तीनमा विश्वास दिलाउनुपर्थ्यो त्यो विश्वास दिलाउन सकिएन ।'