सांसद पाण्डेले भने, ‘बन्चरेडाँडा अव्यवस्थित छ । आसपासका घरहरुमा बस्न सक्ने अवसथा छैन । खोलामा सिधै लिचेट फालिने गरिएको छ । वैज्ञानिक ढंगले व्यवस्थापन गर्नुपर्ने हो भएका छैन । ’ स्थानीयले फोहोरलाई सधैं माटोले विछ्याइदिन आग्रह गर्दा उल्टै पक्राउ पुर्जी जारी गरिएको भन्दै आपत्ति जनाएका छन् । फोहोर राम्रोसँग व्यवस्थापन गर भन्दा युवाहरुमाथि यातना भइरहेको उनले बताए । 

सांसद पाण्डेले उक्त स्थान हवाई रुटसमेत भएकाले फोहोरलाई व्यवस्थित ढंगले व्यवस्थापन नगर्दा चिल, गिद्धलगायतका चराहरु आसपासका झुम्मिने र दुर्घटनाको खतरा भएको औंल्याए । उनले बन्चरेडाँडा ल्यान्डफिल साइटको अवस्थाबारे संसदीय टोली बनाएर सत्यतथ्य ल्याउन आग्रह गरेका छन् ।

यस्तै, उनले स्थानीयहरुले राखेको मागको बारेमा पनि संसद्मा‌ वाचन गरेका छन् । जसअनुसार स्थानीयले कोल्पुखोलामा फोहोरको झोल फाल्न बन्द गरिनुपर्ने, प्रभावित क्षेत्रमा सडक, विद्युतीकरण, नदी तटबन्धलगायतका कार्यहरुमा सहयोग गर्नुपर्ने, सडक कालोपत्रेको व्यवस्थापन गरिनुपर्ने, प्रभावित क्षेत्रका विद्यालयमा शिक्षकको दरबन्दी हुनुपर्ने, एम्बुलेन्सको बन्दोबस्ती गरिनुपर्ने, फोहोरमा बस्न सकिँदैन भनेर आवाज उठाउने युवाहरुविरुद्धको जारी गरिएको पक्राउ पुर्जी तत्काल रद्द गरिनुपर्ने माग राखेका छन् ।