जनयुद्ध पृष्ठभूमिबाट आएका अन्य पार्टीका नेताको हामीसँग ऐक्यबद्धता छ : महरा

प्रधानमन्त्री रहेका माओवादी केन्द्रका अध्यक्ष पुष्पकमल दाहालविरुद्ध सर्वोच्च अदालतमा द्वन्द्वकालीन घटनालाई लिएर मुद्दा दर्ता भएपछि माओवादी घटकले आइतबार पत्रकार सम्मेलन गरेका थिए । काठमाडौंमा गरिएको पत्रकार सम्मेलनमा माओवादी घटक ९ राजनीतिक दलहरू सहभागी थिए ।

पत्रकार सम्मेलनमा संयुक्त विज्ञप्ति पनि सार्वजनिक गरिएको थियो । विज्ञप्ति र ९ दलको धारणाप्रति अन्य पार्टीमा रहेका नेताहरूको पनि ऐक्यबद्धता रहेको महराले बताए । 'हामी ९ पार्टी जुटेका छौं । जनयुद्धको पृष्ठभूमिबाट आउनुभएका अरु पार्टीमा रहेका साथीहरूले पनि सम्पर्क गरिरहनुभएको छ । उहाँहरूको पनि यसमा ऐक्यबद्धता छ । तर उहाँहरू उपस्थित हुन सम्भव भएन,' उनले भने ।

माओवादी घटक दलहरू र विगतमा माओवादीमा संलग्न भएर हाल अन्य पार्टीमा रहेका नेताहरूले पनि शान्ति सम्झौताप्रति प्रतिबद्धता जनाएको उपाध्यक्ष महराले बताए । माओवादीले राज्य पुनर्संरचना लगायतका लागि संघर्ष गरेको र शान्ति सम्झौतामा आएको तर हाल मुलुक प्रतिगमनको दिशामा अगाडि बढिराखेको आशंका महराले गरेका छन् ।

माओवादी नेतृत्वमा भएको सशस्त्र विद्रोहमा नेतृत्व गरेका रामबहादुर थापा, लेखराज भट्ट, मणि थापालगायत नेता हाल नेकपा (एमाले)मा क्रियाशील छन् । उनीहरूलाई लक्षित गरेर महराले अभिव्यक्ति दिएका हुन् ।