आन्तरिक हवाई दुर्घटनामा अहिलेसम्मकै ठूलो मानवीय क्षति- समाचार - कान्तिपुर समाचार
कान्तिपुर वेबसाईट
AdvertisementAdvertisement

आन्तरिक हवाई दुर्घटनामा अहिलेसम्मकै ठूलो मानवीय क्षति

कान्तिपुर संवाददाता

काठमाडौँ — हवाई सेवाको साढे ६ दशक लामो इतिहासमै नेपाली आकाशमा दुर्घटनाको संख्या ‘थ्री डिजिट’ मा चढिसकेको छ । एकातिर व्यावसायिक आन्तरिक उडानमा चाप बढ्दो छ भने अर्कोतिर त्यसको चुस्त व्यवस्थापन हुन सकेको छैन । यस्तोमा बाक्लिएर भइरहेका भयानक दुर्घटना र क्षतिका कारण नेपालको आकाशमार्ग नै कति सुरक्षित छ ? भन्ने प्रश्न पेचिलो बन्दै आएको छ । 

आइतबार पोखरामा भएको विमान दुर्घटनाले हवाई सुरक्षामाथि उठ्ने गरेको त्यही प्रश्न फेरि एक पटक उजागर भएको छ । पोखरा विमान दुर्घटना नेपाली आकाशमा भएको १०४ औँ हवाई दुर्घटना हो भने व्यावसायिक आन्तरिक उडानमा यो ५० औँ दुर्घटना हो । तर, यो नेपालको आन्तरिक उडान इतिहासमै सबैभन्दा ठूलो दुर्घटना पनि हो । नेपाल नागरिक उड्डयन प्राधिकरणका अनुसार आन्तरिक उडानमा यति धेरै मानवीय क्षति भएको यो पहिलो दुर्घटना हो ।

पोखरामा आइतबार भएको हवाई दुर्घटनामा परी हालसम्म ६८ जनाको ज्यान गइसकेको छ । काठमाडौंबाट यात्रु लिएर पोखराका लागि उडेको यति एयरलाइन्सको एटीआर–७२ विमान पोखरा अन्तर्राष्ट्रिय विमानस्थलमा अवतरण गर्ने क्रममा सेती नदी नजिकको खोंचमा दुर्घटनाग्रस्त बनेको थियो । बिहान १०:५० बजे अन्तिम पटक विमानस्थल टावरसँग सम्पर्कमा रहेको विमानमा चालक दलका ४ र यात्रुहरू ६८ गरी ७२ जना सवार थिए ।

प्राधिकरणको ‘एभीएसन सेफ्टी रिपोर्ट–२०२२’ अनुसार आन्तरिक उडानमा यसअघि यति ठूलो मानवीय क्षति भएको थिएन । नेपाली आकाशमा भएका अन्तर्राष्ट्रिय उडानसहितको इतिहास हेर्ने हो भने पनि यो तेस्रो ठूलो दुर्घटना हो । व्यावसायिक आन्तरिक उडानतर्फ सन् १९६९ को जुलाई १२ मा हेटौंडामा भएको नेपाल एयरलाइन्सको विमान दुर्घटनामा ३५ जनाको ज्यान गएको थियो । आन्तरिक उडानतर्फ नेपाल एयरलाइन्सकै सन् २००० को डडेल्धुरा जोगबुढा दुर्घटना (२५ जनाको मृत्यु), तारा एयरको सन् २०१६ को म्याग्दी दुर्घटना (२३ जनाको मृत्यु), ताराकै सन् २०१० को ओखलढुंगा दुर्घटना (२२ जनाको मृत्यु) र गत वर्ष भएको मुस्ताङ दुर्घटना (२२ जनाको मृत्यु) सबैभन्दा ठूला हुन् ।

पोखरा दुर्घटनामा व्यावसायिक आन्तरिक उडानतर्फ नेपालले अहिलेसम्मकै ठूलो र दर्दनाक मानवीय क्षति व्यहोरेको छ । व्यावसायिक आन्तरिक उडानमा भएका ५० दुर्घटनामध्ये २१ दुर्घटनामा कुनै पनि मानवीय क्षति भएको छैन । २९ दुर्घटनामध्ये पोखराबाहेक मात्रै ३ सय ६४ जनाले ज्यान गुमाएका छन् ।

अन्तर्राष्ट्रिय उडानतर्फ भने नेपाली आकाशमा सन् १९९२ मा एकै वर्ष दुई ठूला दुर्घटना भएका थिए । भट्टेडाँडामा भएको पाकिस्तान इन्टरनेसनल एयरको दुर्घटनामा १६७ र ग्यानफेदीमा भएको थाई एयरवेजको दुर्घटनामा ११३ जनाले ज्यान गुमाएका थिए । सन् २०१८ मा त्रिभुवन विमानस्थलमै भएको यूएस बंगलाको विमान दुर्घटनामा ५१ जनाको ज्यान गएको थियो ।

प्राधिकरणका अनुसार नेपालमा अहिलेसम्म एक इन्जिनयुक्त आठवटा दुर्घटना भएका छन् भने ३६ वटा हेलिकप्टर दुर्घटना भएका छन् । १० अन्तर्राष्ट्रिय वायु सेवाका उडान दुर्घटनामा परेका छन् । सन् १९९५ मा नेपालमा पहिलो पटक बाराको सिमरामा भारतको कलिंगा एयर दुर्घटना भएको थियो । सो दुर्घटनामा २ जनाको मृत्यु भएको थियो ।

यी दुर्घटनामा आइतबारको पोखारा दुर्घटनाबाहेक नै ८ सय ४९ को मृत्यु भइसकेको छ । जसमा आन्तरिकतर्फ ३ सय ६४, सिंगल इन्जिन भएका विमान दुर्घटनामा २५, हेलिकप्टरतर्फ ८५ र विदेशी वायुसेवातर्फ ३ सय ७५ गरी गरी जम्मा ८ सय ४९ को मृत्यु भएको हो ।

आइतबार भएको दुर्घटना भएको विमानमा चालक दलका ४ र ६८ गरी ७२ जना सवार थिए । यती एयरलाइन्सका अनुसार विमानमा सवारमध्ये ३७ जना पुरुष, २५ जना महिला, ३ जना बच्चा र ३ जना शिशु थिए भने उनीहरूमध्ये ५३ नेपाली नागरिक थिए भने ५ भारतीय, ४ रसियन, २ कोरियन, १ अर्जेन्टिनी, १ अस्ट्रेलियन, १ आइरिस र १ फ्रान्सेली गरी १५ जना विदेशी नागरिक थिए ।

प्रकाशित : माघ १, २०७९ १९:२५
प्रतिक्रिया
पठाउनुहोस्

काठमाडौंका, विदेशी, क्रु सदस्य र पहिचान हुन नसकेका शव सोमबार काठमाडौं पठाउँछौं : प्रजिअ केसी

कान्तिपुर संवाददाता

काठमाडौँ — यति एयरलाइन्सको विमान दुर्घटनामा मृत्यु भएकाहरूको शव सोमबारदेखि आफन्तलाई बुझाइने कास्की जिल्लाका प्रमुख जिल्ला अधिकारीले बताएका छन् । उनले कास्कीलगायत जिल्लामा घर भएका मृतकको शव पोखराबाट नै आफन्तलाई जिम्मा लगाइने, विदेशी र काठमाडौंलगायत जिल्लामा घर भएकाहरूको शव सोमबार काठमाडौं पठाउने तयारी भएको बताए ।

इकान्तिपुरसँग कुरा गर्दै प्रमुख जिल्ला अधिकारी टेकबहादुर केसी आइतबार साँझसम्म सबैको खोजी कार्य सक्ने गरी काम भइरहेको बताए । उनले भने, 'हामी आज शव कलेक्सनमै लाग्यौं । अझैसम्म ४ जना बेपत्ता छन् । खोजी कार्य जारी रहेको छ । ६८ जनाको शव अस्पतालमा राखिएको छ ।'

शव मृतकका आफन्तलाई बुझाउनका लागि प्रशासनले तयारी गरेको प्रमुख जिल्ला अधिकारी केसीले बताए । 'पोखराका मृतकको हकमा यता नै पोस्टमार्टम गरेर आफन्तलाई बुझाउँछौं । पहिचान हुन नसकेका, काठमाडौं घर भएका, विदेशी र विमानका क्रू मेम्बरको शव काठमाडौं पठाउँछौं ।'

विभिन्न सञ्चार माध्यममा केही यात्रु जीवित भेटिएको भन्ने समाचार आएको कुरा सही नभएको पनि प्रमुख जिल्ला अधिकारी केसीले बताए । उनले जति यात्रु भेटिएका छन्‚ ती सबै मृत्यु भइसकेका रहेको बताए । 'अहिलेसम्म ६८ शव भेटिएको छ । जिवित एकजना पनि भेटिएको छैन । सञ्चारमाध्यममा जीवित यात्रुको उद्दार गरियो भन्ने सूचना सार्वजनिक भएको पाइयो तर त्यो होइन ।'

प्रकाशित : माघ १, २०७९ १९:१५
पूरा पढ्नुहोस्
प्रतिक्रिया
पठाउनुहोस्
×