मन्त्री रेग्मीले गरिन् कोप-२७ समीक्षा बहिष्कार- समाचार - कान्तिपुर समाचार
कान्तिपुर वेबसाईट
AdvertisementAdvertisement

मन्त्री रेग्मीले गरिन् कोप-२७ समीक्षा बहिष्कार

अब्दुल्लाह मियाँ

काठमाडौँ — सोमबार अपरान्ह २:३० बजे । 
स्थान : बसेरा बुटिक होटल, सिंहदरबार । 
कार्यक्रम : कोप–२७ को समीक्षा
आयोजक : वन तथा वातावरण मन्त्रालय ।

प्रमुख अतिथि : महिला, बालबालिका तथा ज्येष्ठ नागरिकमन्त्री उमा रेग्मी

अध्यक्षता : सचिव पेमनारायण कँडेल

मन्त्री रेग्मीकै नेतृत्वमा नेपाली टोलीले कात्तिक २० देखि मंसिर २ गतेसम्म इजिप्टको शर्म अल शेखमा भएको राष्ट्रसंघीय जलवायु सम्मेलन (कोप-२७) मा भाग लिएकाले मन्त्रालयले समीक्षामा मन्त्री रेग्मीलाई प्रमुख अतिथिकै रुपमा निम्ता गरेको थियो । कोप सकिएपछि हरेक वर्ष मन्त्रालयले समीक्षा आयोजना गर्छ, त्यो नयाँ भएन । समीक्षा कार्यक्रम सुरु गरे- मन्त्रालयको जलवायु परिवर्तन व्यवस्थापन महाशाखा प्रमुख रहेका जलवायु फोकल पर्सन बुद्धिसागर पौडेलले । सँगै ‘कोप-२७ का उपलब्धि र अबको बाटो’ बारे प्रस्तुति दिन थाले ।

प्रस्तुतिका क्रममा पौडेलले कोपमा जानुअघि काठमाडौंमा भएका तयारी बैठक, ग्लास्गो सम्मेलन (कोप २६) पछि मन्त्रालयले गरेका काम, कोप-२७ मा नेपालले अघि सार्ने विषयको फेहरिस्त र नेपालले तयार गरेको ‘स्टाटस पेपर’बारे जानकारी गराए ।

दोस्रो चरणमा शर्म अल शेखमा नेपालको व्यस्तता (इङ्गेजमेन्ट) बारे बयान सुरु गरे । मन्त्री रेग्मीले चाखपूर्वक पौडेलको प्रस्तुति सुनिरहेकी थिइन् । प्रस्तुतिका क्रममा उनले कोप-२७ मा मन्त्रालयबाट सहभागी सचिव कँडेल, सरकारका अन्य सचिवहरु, सहसचिवहरु, वन मन्त्रालयका उपसचिवलगायत केही विज्ञका भूमिकाबारे पनि सुनाए ।

तर, उनले कोप-२७ मा नेपाली टोलीको नेतृत्व गरेकी मन्त्री रेग्मीको भूमिकाबारे प्रस्तुतिमा कुनै स्थान दिएनन् । वन तथा वातावरणमन्त्रीको समेत जिम्मा सम्हालेका प्रधानमन्त्री शेरबहादुर देउवाकै चाहनाअनुसार रेग्मीलाई टोलीको नेतृत्व गर्दै शर्म अल शेख पठाइएको थियो ।

कोप-२७ को उच्चस्तरीय सत्रमा राष्ट्र प्रमुख र कार्यकारीले सम्बोधन गर्ने कार्यक्रम थियो, मन्त्रीहरुले त्यहाँ बोल्न पाउने व्यवस्था थिएन, त्यही भएर मन्त्री रेग्मीले मूल समारोह (मेन इभेन्ट) मा मन्तव्य दिने अवसर पाइनन् । त्यसमा उनी खिन्न भइरहेकी थिइन् ।

तर, मन्त्रालयकै पहलमा केही साइड इभेन्ट र दक्षिण एसियाली मन्त्रीहरुको बैठकलगायतमा मन्त्रीले सम्बोधन गरेकी थिइन् । तर, पौडेलको प्रस्तुतिमा कोप-२७ मा मन्त्रीको भूमिका केही समेटिएको थिएन । केवल सरकारी अधिकारीले खेलेको भूमिका र उनीहरुको मात्र गुणगान गाएको आभास मन्त्री रेग्मीलाई भयो ।

सबै सुनेर बसेकी मन्त्री रेग्मीले रीस थाम्न सकिनन्, अनि माइक समातेर बोल्न थालिन् । ‘कोपमा मैले खेलेको भूमिका किन प्रस्तुतिमा समेटिएन ?’, मन्त्री रेग्मीले प्रश्न गरिन्, ‘के मेरो कुनै भूमिका थिएन कोपमा कि मलाई हेपेको ?’ प्रस्तुतिमा सरकारका कर्मचारीका विषयले मात्र स्थान पाएकामा मन्त्री रेग्मीको मुख्य गुनासो थियो । ‘सबैतिर कर्मचारीतन्त्र हाबी हुने ?’, उनले प्रश्न गरिन्, ‘प्रधानमन्त्रीज्यूले मलाई कुनै काम नभएर पठाउनुभएको हो ?’

कोप बसाईका क्रममा आफूले विषयवस्तुसँग सम्बन्धित भएर गरेका समकक्षी भेट, छलफल र अन्य सम्बोधनलाई कुनै उपलब्धि नभनिएकामा मन्त्रीको गुनासो थियो । ‘तपाईंहरुले जानाजान अवमूल्यन (अन्डर स्टीमेट) गर्नुभयो, कहीं महिला भनेर हेप्नु भएको त होइन ?’ मन्त्री रेग्मीको गुनासो थियो, ‘यस्तो कार्यक्रममा म बस्दिनँ र यो कार्यक्रमको भर्त्सना गर्छु ।’

मन्त्रालयका अधिकारीले गल्ती भएको भन्दै मन्त्रीलाई रोक्न खोजे पनि उनी आफ्ना गुनासा पोखेर कार्यक्रमबाट बाहिरिइन् । सचिव कँडेल र महाशाखा प्रमुख पौडेलले उनलाई रोक्न सकेनन् । कार्यक्रमको समीक्षा चलिरह्यो । मन्त्रालयमा सुविधायुक्त हल हुँदाहुँदै मन्त्रालयले सिंहदरबार ढोकैमा रहेको बुटिक होटलमा समीक्षा आयोजना गरेको थियो ।

प्रकाशित : मंसिर १३, २०७९ १७:१२
प्रतिक्रिया
पठाउनुहोस्

डेंगीपछि कपाल झर्ने समस्या : ‘टेलोजेन एफ्लुभियम’ के हो? 

संक्रमण निकाे भएपछि कपाल झर्ने रोगलाई ‘टेलोजेन एफ्लुभियम’ भनिन्छ। यसरी झरेका कपालहरु संक्रमण निको भएपश्चात स्वत: ३ देखि ६ महिनामा पलाउँदै जान्छन् र सामान्य अवस्थामा फर्किन्छन् ।त्यसैले यसमा आत्तिहाल्नुपर्ने अवस्था छैन ।
डा. प्रज्वल पुडासैनी

काठमाडौँ — इलामकी ५२ वर्षीया महिला निजामति कर्मचारी अस्पतालमा कपाल झर्ने समस्या लिएर आइन् । दुई महिना अघि डेंगी संक्रमण भएको उनलाई कपाल झर्न थालेको २ हप्ता भएको रहेछ । त्यसबाहेक उनलाई तौल कम हुने र थकाइ लाग्ने समस्या पनि देखिएको थियो । उनी कपाल झरेर तालुपना होला भनेर चिन्ताले निद्रा नलाग्ने समस्याबाटसमेत पीडित थिइन् ।उनी अहिले चिकित्सकीय परामर्शपछि औषधि सेवन गरिरहेकी छिन् र उनको स्वास्थ्यमा सुधार आइरहेको छ ।

लामखुट्टेको टोकाइबाट हुने डेंगी भाइरसको संक्रमणबाट नेपालमा ५० हजार भन्दा बढी प्रभावित बनिसकेका छन् । डेंगीका केसहरु कम हुँदै देखिएपनि डेंगी निको भएपछि पनि विभिन्न समस्याहरु लिएर बिरामी अस्पताल आइरहेका छन् । धेरैजसो डेंगीका बिरामी कुनै लक्षणबिना अथवा ज्वरो मात्र आई ठिक भएर जान्छन् भने कतिपयमा डेंगी भाइरसको संक्रमण भएको ३–१४ दिनमा ज्वरो आउने, टाउको दुख्ने, वाकवाकी लाग्ने, जोर्नी दुख्ने, ढाड दुख्ने आदि हुन्छन् । यी लक्षणहरु करिब ७ दिन भित्र कम हँुदै जान्छन्।

डेंगी रोग मुलत: तीव्र गतिमा संक्रमण हुने र ठिक हुने रोग भएतापनि कतिपयमा भने डेंगी ठिक भैसकेपछि पनि तौल घट्ने, थकान महसुस हुने, कपाल झर्ने र डिप्रेसन हुने समस्या देखिन थालेका छन्। यस्ता लक्षणहरु विशेषत: महिला र ज्येष्ठ नागरिकहरुलाई बढी देखिने गर्दछ।

साधारणतया शरीरमा हुने विभिन्न प्रकारका भाइरल संक्रमण, तनाब, औषधि सेवन, पोषक तत्त्वको कमी, गर्भावस्थाआदि कारणले कपाल झर्ने समस्या निम्त्याउँछ। कपाल हाम्रो अनुहार, व्यक्तित्व र आवरणका लागि महत्वपूर्ण भएकाले कपाल झरेमा मानिसको स्वरुप परिवर्तन भइ मानसिक तनाब उत्पन्न हुनसक्छ र तनाव लिनाले पुनश्च: फेरी कपाल झर्न सक्छ।

डेंगीपछि कपाल झर्ने समस्या धेरै मानिसमा संक्रमण भएको २ देखि ३ महिना पछि देखिन थाल्छ। सामान्यतया हरेक दिन करिब १०० वटा कपाल झर्नु सामान्य मानिन्छ । तर संक्रमणले कारण झर्दछ भने ३०० वटा भन्दा बढी रौँ झर्न सक्छन्। यस्ता समस्या विशेषगरी महिलामा नै बढी देखिन्छ। यस्ता केशहरु दैनिक ४ देखि ५ जना लिएर आइराखेका छन् र दशैँ यता यस्ता बिरामीहरु १०० जना जति पुगिसकेका छन्।

कपालका रौँहरु ३ चरण बाट बन्छन् ।‘एनाजेन’ भन्नाले रौं बढ्ने चरण, ‘टेलोजेन’ अर्थात् आराम वा स्थिर रहने चरण र ‘क्याटअजेन’ अर्थात् रौँ घट्ने चरण गरी ३ चरण हुन्छन् ।संक्रमण भएपछि एनाजेन चरणका रौं टेलोजेन चरणमा प्रवेश गर्छन् जसमा रौं आराम र स्थिर हुन्छन् । यसरी स्थिर रहेका रौंको मात्रा बढ्नाले रौंहरु एनाजेन अर्थात् बढ्ने चरणमा प्रवेश गर्न कम हुन्छ र कपाल पातलो देखिन्छ। यसरी कपाल झर्ने रोगलाई ‘टेलोजेन एफ्लुभियम’ भनिन्छ। यसरी झरेका कपालहरु संक्रमण निको भएपश्चात स्वत: ३ देखि ६ महिनामा पलाउँदै जान्छन् र सामान्य अवस्थामा फर्किन्छन् ।त्यसैले यसमा आत्तिहाल्नुपर्ने अवस्था छैन ।

संक्रमण निको भइसकेपछि पनि देखिने लक्षणहरुले मानिसको कार्यकुशलता, क्षमता, दैनिकी र जीवनस्तरमा असर पार्न सक्छ जसले सामाजिक र आर्थिक भार निमत्याउन सक्छन्। तसर्थ डेंगीको प्रकोप फैलिएका ठाउँमा डेंगीका दिर्घ लक्षणकाबारे जनचेतना फैलाउन सकेमा अनावश्यक चिन्ता, प्रयोगशालाका परीक्षण, खर्च र समयको बचत हुन्छ ।

डा. पुडासैनी निजामती कर्मचारी अस्पताल (सिभिल अस्पताल) तथा भक्तपुरस्किन एन्ड कस्मेटिक सेन्टर (बीएससीसी)मा छालारोग विशेषज्ञका रुपमा कार्यरत छन् ।

प्रकाशित : मंसिर १३, २०७९ १७:०९
पूरा पढ्नुहोस्
प्रतिक्रिया
पठाउनुहोस्
×