स्पष्टीकरण साेध्‍नु कारबाही प्रक्रियाकाे सुरूवात मात्रै हाे : प्रमुख निर्वाचन आयुक्त थपलिया- समाचार - कान्तिपुर समाचार
कान्तिपुर वेबसाईट
AdvertisementAdvertisement

स्पष्टीकरण साेध्‍नु कारबाही प्रक्रियाकाे सुरूवात मात्रै हाे : प्रमुख निर्वाचन आयुक्त थपलिया

देवनारायण साह

माेरङ — प्रमुख निर्वाचन आयुक्त दिनेश थपलियाले निर्वाचन आचारसंहिता उल्लंघन गर्नेलाई कारबाही गर्नेमा आयाेग दृढ रहेको बताएका छन् । निर्वाचन आयाेगले विराटनगरमा शुक्रबार आयाेजना गरेकाे प्रदेशस्तरीय सञ्चारमाध्यम सम्बन्धी अन्तरक्रियामा उनले निर्वाचन आचारसंहिता उल्लंघनकाे घटनामा स्पष्टीकरणले तरंगित भएकाे अवस्थामा ८/१० दिनपछिकाे आयाेगकाे निर्णयले ठूलाे भूकम्प नै ल्याउन सक्ने बताए ।

'स्पष्टीकरण साेध्नु कारबाही हाेइन, कारबाही प्रक्रियाकाे सुरूवात मात्रै हाे,' उनले भने, ´निर्वाचन आचारसंहिता उल्लंघन गर्नेलाई कारबाही गर्नेमा आयाेग दृढ छ, कारबाही गर्नबाट पछि हटदैन ।'

नेकपा एकीकृत समाजवादीका अध्यक्ष माधव नेपाललाई साेधिएकाे स्पष्टीकरणले अहिले तरंग उत्पन्न भएकाे छ । निर्वाचन आचारसंहिता कसुर एैनकाे दफा २० ले कुनै पनि प्रलोभन दिन नहुने भनिएकाेले आचारसंहिता उल्लंघनभन्दा ठूलाे कसुर भएकाले कारबाहीका लागि सिफारिस गरिएको थपलियाले बताए ।

'दलहरू आफैंले बनाएकाे कानुन कार्यान्वयन आयाेगले गराउने काम मात्र गरेकाले कानुन कार्यान्वयन गर्न उनले सबैलाई आग्रह गरेका छन् । आगामी मंसिर ४ गते हुने निर्वाचनमा निर्वाचन खर्चको सीमा र आचारसंहिता कार्यान्वयन गर्ने कुरा मुख्य चुनाैती देखिएकाे छ,' उनले भने, 'दलहरूले आफैंले आचारसंहिता पालना गर्ने प्रतिबद्धता जनाउने तर उल्लंघन गर्न नहिच्किचाउने अवस्थामा आयाेग टुलुटुलु हेरेर बस्न सक्दैन ।'

उनले स्थानीय तहकाे निर्वाचनमा अनुभूत गरेका समस्या याे निर्वाचनमा दाेहाेरिन नदिने बताए । सामाजिक सञ्जाल नियमनकाे अवस्था आएकाले त्यसका लागि विज्ञ टाेली खटाएर अनुगमनकाे व्यवस्था गरिएकाले सबैलाई सचेत भएर सामाजिक सञ्जालकाे उपयाेग गर्न थपलियाले आग्रह गरे ।

उनले पछिल्लो समयका केही समाचारले महिला उम्मेदवारलाई सञ्चारमाध्यमबाट हाेच्याउने काम भएकाे प्रति ध्यानाकर्षण भएकाले यसप्रति सञ्चारमाध्यमहरूलाई गम्भीर भएर समाचार सम्प्रेषण गरिदिन आग्रह गरे । महिला उम्मेदवार भएकाे क्षेत्रमा 'हेबीवेटसँग महिला प्रतिस्पर्धा' लगायतका शीर्षककाे समाचारले महिलालाई हाेच्याउने काम भएकाे उनले सुनाए । त्यसैले सूचना सम्प्रेषण गर्दा सबैलाई समान अवसर दिन उनले ध्यानाकर्षण गराए । प्रमुख निर्वाचन आयुक्त थपलियाले सञ्चारमाध्यमहरूलाई स्वनियमन र स्वअनुगमन गरेर मात्रै सूचना सम्प्रेषण गरिदिन आग्रह गरेका छन् ।

माेरङका मुख्य निर्वाचन अधिकृत दुर्गाप्रसाद ढुंगेलले आचारसंहिता गुणात्मक र गुणस्तरीय परिचालन भएको बताए । जिल्लामा समानुपातिक मतपत्र प्राप्त भएकाले त्यसको व्यवस्थाको काम भइरहेकाे उनले बताए । माेरङका प्रमुख जिल्ला अधिकारी काशिराज दाहालले माेरङमा ७ हजार ५ सय सुरक्षाकर्मी परिचालन गरेर भयरहित र निष्पक्ष निर्वाचनका लागि प्रतिबद्ध रहेकाे बताए ।

प्रकाशित : कार्तिक ४, २०७९ ११:३२
प्रतिक्रिया
पठाउनुहोस्

कैलाली-४ मा ‘प्रतिष्ठा’ को संघर्ष

२०६४ देखि नै यही क्षे त्रमा चुनाव लड्दै आएका एमालेका लेखराज भट्ट र डोटीबाट झरेका कांग्रेसका वीरबहादुर बलायरपहिलो पटक आमनेसामने
अर्जुन शाह

धनगढी — एकातिर एमाले सचिव तथा सुदूरपश्चिम इन्चार्ज लेखराज भट्ट, अर्कोतिर कांग्रेस प्रदेश सभापति वीरबहादुर बलायर । सुदूरपश्चिमका यी दुई नेताबीच पहिलो पटक प्रतिस्पर्धा हुँदै छ कैलाली–४ मा । दुवै उम्मेदवारले यो प्रतिस्पर्धालाई ‘प्रतिष्ठा’ का रूपमा हेरेका छन् ।

प्रतिनिधिसभातर्फ १६ निर्वाचन क्षेत्र रहेको सुदूरपश्चिममा प्रदेशका ‘हेभिवेट’ मानिने र पटक–पटक मन्त्रीसमेत भएका नेताबीचको प्रतिस्पर्धा उनीहरूको राजनीतिक भविष्यसँग पनि जोडिएको छ । भट्ट र बलायरको आ–आफ्नै राजनीतिक विरासत छ । माओवादी त्यागेर एमालेमा गएका भट्ट सोही क्षेत्रबाट चौथो पटक चुनाव लड्न लागेका हुन् । बलायरका लागि कैलाली ४ नयाँ हो । डोटीबाट तीन पटक चुनाव लडिसकेका बलायरको रोजाइ यस पटक पनि डोटी नै थियो । तर गठबन्धन दलहरूको भागबन्डाका कारण डोटी छाड्नुपर्ने भएपछि उनी कैलाली ४ मा झरेका हुन् । भट्टको पुर्ख्यौली थलो पनि डोटी नै हो ।

सुरुदेखि माओवादीमा रहेका भट्टले यसपल्ट पार्टी फेरेका भए पनि यस निर्वाचन क्षेत्रका सदावहार उम्मेदवार हुन् । उनले पहिलो संविधानसभा निर्वाचन २०६४ मा जितेका थिए । २०७० मा पराजित भए । २०७४ मा उनले कांग्रेस उम्मेदवार सुनीलकुमार भण्डारीलाई पराजित गर्दै दोस्रो पटक चुनाव जितेका थिए । वाम गठबन्धनबाट २०७४ मा करिब ११ हजार मतान्तरले जितेका भट्टले कांग्रेस–माओवादी गठबन्धनका उम्मेदवारको सामना गर्नुपर्ने भएको छ । स्थानीय तहको मत परिणामका आधारमा एमाले गठबन्धन दलको कुल मतभन्दा झन्डै १५ हजार मतले पछाडि छ ।

कैलालीका गोदावरी नगरपालिका, गौरीगंगा नगरपालिका, चुरे गाउँपालिका र मोहन्याल गाउँपालिकाको वडा नम्बर ५ मिलेर बनेको कैलाली–४ मा ९३ हजार ३ सय ८४ मतदाता छन् । गोदावरीमा प्रमुखसहित सातवटा वडा कांग्रेसले जितेको छ । नगर प्रमुखमा भट्टका सहोदर भाइ गोकर्ण भट्ट एमालेबाट उम्मेदवार भएका बेला कांग्रेसका वीरेन्द्र भट्टले झन्डै चार हजार मतान्तरले जितेका थिए । एकीकृत समाजवादीसमेत थपिएकाले गठबन्धन दलको मत अझ बढी हुन आएको छ तर प्रतिनिधिसभाको निर्वाचनमा स्थानीय तहको मत फेरबदल हुन सक्ने दुवै उम्मेदवारको बुझाइ छ । स्थानीय निर्वाचनमा गौरीगंगामा माओवादीले एमालेलाई सात हजारभन्दा बढी मतान्तरले पराजित गरेको थियो ।

चुनावी घरदैलोका क्रममा दुवै उम्मेदवारले प्रदेश राजधानी र विकास निर्माणको मुद्दालाई प्राथमिकतासाथ उठाएका छन् । प्रदेशसभाले यसअघि नै गोदावरी राजधानी घोषणा गरिसक्दा पनि कार्यान्वयन प्रक्रिया अलपत्र छ । राजधानी बनाउने भनिएको गोदावरी यही क्षेत्रमा पर्छ । दुवै प्रतिस्पर्धीले गोदावरीलाई राजधानी बनाउने निर्णय कार्यान्वयन गर्ने बताइरहेका छन् ।

यसअघि डोटीमा राजधानी हुनुपर्ने बताउँदै आएका बलायरले पनि अहिले गोदावरीलाई नै प्रदेश राजधानी बनाउने प्रतिबद्धता मतदातासमक्ष गर्न थालेका छन् । ‘मैले जितेपछि सानोतिनो हैन, राम्रै विकासे मन्त्रालयको मन्त्री पाउँछु,’ उनले भनेका छन्, ‘प्रदेशको राजधानी पनि मेरै निर्वाचन क्षेत्रमा हुनेछ ।’ भट्टले पनि आफ्नै प्रयासका कारण यसअघि गोदावरी राजधानी निर्क्योल भएको बताएका छन् । गेटा मेडिकल कलेजको काम पनि आफ्नै प्रयासमा भएको उनको भनाइ छ ।

प्रकाशित : कार्तिक ४, २०७९ ११:१०
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×