बर्दिया — मंगलबार रातिदेखिको अविरल वर्षासँगै बबई नदीमा आएको बाढीले एक हजारभन्दा बढी घर डुबानमा परेको छ । सदरमुकाम गुलरियाको वालापुर, ईन्द्रपुर, मुक्तिनातघाट, गंगापुर, राधाकृष्ण टोललगायत बारबर्दिया नगरपालिकाका केही ठाउँ डुबानमा परेका सुरक्षित स्थलमा आश्रय लिएका छन् । 

स्थानीय प्रशासनका अनुसार शुक्रबार दिउँसोसम्म एक हजार बढी घर डुबानमा परिसकेको स्थानीय प्रहरी प्रशासनले जनाएको छ । राति अबेरसम्म उद्धार कार्य जारी छ । पानी रोकिएपछि वास्तविक तथ्यांक आउने छ । प्रमुख जिल्ला अधिकारी बन्धुप्रसाद बास्तोलाले गुलरिया नगरपालिकाको ईन्द्रपुरका १ सय १९ जना हुलाकी सडकको अग्लो ठाउँमा त्रिपाल टागेर बसेका छन् ।

गुलरिया—११ को टडुवाको ९२ घरका ४ सय जना वडा कार्यालय, सेभ सेन्टर, आफन्तीको घर, उच्च स्थानमा रहेको घरमा आश्रय लिएको प्रजिअ बास्तोलाले जनाए । गुलरिया—८ गंगापुरका १ सय २१ जना विस्थापित भई सुरक्षित स्थलमा गएका छन् । प्रजिअ बास्तोलाले गुलरिया—१० का १ सय ४० जना रत्नापुर र कालाबन्जरमा बनाएको सेभ हाउसमा आश्रय लिएका छन् ।

बारबर्दिया नपा—३ खुरखुरे फाटामा तीनवटा कच्ची घर भत्काउनुका साथै केही विस्थापित भएका छन् । विस्तृत विवरण आउन केही समय लाग्ने स्थानीय प्रशासनले जनाएको छ ।