एमालेले आफ्नो टिकट टुंग्यायो, तीन पार्टीसँग गठबन्धन कोसिस जारी- समाचार - कान्तिपुर समाचार
कान्तिपुर वेबसाईट
AdvertisementAdvertisement

एमालेले आफ्नो टिकट टुंग्यायो, तीन पार्टीसँग गठबन्धन कोसिस जारी

कान्तिपुर संवाददाता

काठमाडौँ — प्रतिनिधिसभा र प्रदेश सभाको चुनावी गठबन्धनका लागि नेकपा (एमाले) ले राष्ट्रिय प्रजातन्त्र पार्टी, लोकतान्त्रिक समाजवादी पार्टी र जनता समाजवादी पार्टीलाई कुरिरहेको छ । एमालेका उपाध्यक्ष सुवास नेम्वाङका अनुसार कुन निर्वाचन क्षेत्रबाट को उठ्ने भन्ने निश्चित भई टिकट तयार पारिसकेर अध्यक्ष केपी शर्मा ओलीले राखेका छन् ।

नेम्वाङका अनुसार चुनावी गठबन्धन बन्ने सम्भावनालाई मध्यनजर गरी टिकटको टुंगो लागेपनि उम्मेदवारको नामावली सार्वजनिक नगरिएको हो । अध्यक्ष ओलीसहितका नेताहरूले गठबन्धनका लागि राप्रपाका अध्यक्ष राजेन्द्र लिङ्देन, लोसपाका अध्यक्ष महन्थ ठाकुर र जसपाका अध्यक्ष उपेन्द्र यादवसँग कुराकानी गरिरहेका छन् । 'सबै टिकट लगभग फाइलन भएको छ । जम्मै अध्यक्षसँग छ । सबै क्षेत्रको लगभग टुंगो लागेको छ । त्यसमा कतिपय विषयमा कुराकानी भइरहेका छन् । स्थानीय, क्षेत्रदेखि राप्रपा, जसपा, लोसपासँग तालमेलका कुराकानी भइरहेका छन्,' नेम्वाङले भने ।

सरकारमा रहेको जसपा सत्तारुढ गठबन्धनमा कम सिट पाउने भएपछि पछिल्लो समय एमालेसँग पनि छलफलमा रहेको छ । अध्यक्ष यादवसहितका नेताहरू एमालेसँग तालमेल गर्न बालकोट र सत्तारुढ गठबन्धनमा कुराकानी गर्न बालुवाटार आलोपालो मिलाएर जाने गरेका छन् ।

एमालेसँग जसपाले कति सिट माग्यो भन्ने कुरा उल्लेख नगरेका उपाध्यक्ष नेम्वाङले अध्यक्ष यादवसँग ओलीको 'सैद्धान्तिक रूपमा सकरात्मक हिसाबले कुराकानी भइरहेको' बताए । राप्रपा र लोसपासँग पनि गठबन्धनबारे छलफल भइरहेको बताउँदै नेम्वाङले कुनै दलसँग पनि टुंगो भने नलागिसकेको बताए । उनले भने, 'निर्वाचन क्षेत्र र सिट संख्याबारे छलफल भइरहेको छ । दहलहरू जता फाइदा भयो त्यता मिल्छन् । उहाँहरू मिल्ने बढी सम्भावना एमालेसँग हो ।'

पार्टीभित्र भने जुन नेताको जित्ने सम्भावना बढी छ उसैका नाममा टिकट तयार रहेको नेम्वाङले बताए । 'जसले जित्छ उसलाई टिकट दिने भन्ने सिद्धान्त छ,' उनले भने ।

प्रकाशित : आश्विन २०, २०७९ १८:५९
प्रतिक्रिया
पठाउनुहोस्

गोरखाको खार गाउँमा पहिरो : २ घर पुरिए, ३ जना सख्त घाइते

हेलिकप्टर कुर्दै घाइते
 लोक्पा पहिरोले दुइ वडा आउजाउ ठप्प
हरिराम उप्रेती

गोरखा — चुमनुव्री गाउँपालिका–६ चुम्चेतस्थित खार गाउँमा झरेको पहिरोमा पुरिएर तीन जना सख्त घाइते भएका छन् । बिहिबार दिउँसो खसेको पहिरोले दुइ घर सँगै तीन जनालाई पुरेको चुमनुव्री गाउँपालिकाका अध्यक्ष नीमा लामाले बताए ।

सडक सञ्जालले नजोडेको खार गाउँका घाइतेलाई हेलिकोप्टरबाट उपचारका लागि काठमाडौं ल्याउन बिहिबार साँझ सम्म प्रयास गरिएको उनले बताए । ‘आज साँझ पर्‍यो, प्रशासनसँग हेलिकोप्टरका लागि अनुमति मागेका छौँ,’ उनले भने,‘भोली बिहानै उद्धार गर्ने गरि पहल भइरहेको छ ।’ घाइतेहरुको हेलिकोप्टर बाहेक उपचारका लागि लैजाने अन्य विकल्प नरहेको लामाले बताए ।

त्यस्तै लगातारको वर्षाले चुमनुव्री गाउँपालिका–६ लोक्पा भिरमा पुन: पहिरो खसेको छ । लोक्पा पहिरोले चुमनुव्री गाउँपालिका–६ र ७ को दुइ वडा आउजाउ ठप्प बनेको छ । त्यस्तै वर्षाका कारण सल्लेरी र सिर्दिवासबीचको पैदलमार्गमा पनि पहिरो खसेको लामाले जानकारी दिए । विहिको राना, प्रोकको वुर र एक्लेभट्टीमा पनि पहिरोले पैदलमार्ग अवरुद्ध बनेको गाउँपालिकाले जनाएको छ ।


प्रकाशित : आश्विन २०, २०७९ १८:५०
पूरा पढ्नुहोस्
प्रतिक्रिया
पठाउनुहोस्
×