समानुपातिक उम्मेदवारको सूची सर्वसम्मत तयार भएको हो : कांग्रेस प्रवक्ता- समाचार - कान्तिपुर समाचार
कान्तिपुर वेबसाईट
AdvertisementAdvertisement

समानुपातिक उम्मेदवारको सूची सर्वसम्मत तयार भएको हो : कांग्रेस प्रवक्ता

कान्तिपुर संवाददाता

काठमाडौँ — नेपाली कांग्रेसले समानुपातिक उम्मेदवारको सूची सर्वसम्मत रुपमा तयार भएको बताएको छ । मंगलबार कांग्रेस प्रवक्ता प्रकाशशरण महतले समानुपातिक उम्मेदवार सर्वसम्मत चयन भएको भन्दै एकलौटी रुपमा उम्मेदवार छनोट भएको भन्ने कुरामा सत्यता नभएको बताएका हुन् ।

‘समानुपातिक उम्मेवार सर्वसम्मत चयन भएका हुन् । एकलौटी भयो भन्ने कुरामा कुनै सत्यता छैन । कसैलाई कमजोर र कसैलाई बलियो पर्ने गरी सूची तयार भएको छैन‚’ उनले भने‚ ‘विधानअनुसार तयार भएको सूची हो । आन्दोलनको कुरा वाञ्छनीय छैन । सबै निर्णय सहमतिमा भएको निर्णय हो । केही त्रुटि छन्; ती सच्याइन्छ।’

गठबन्धनका दलहरूसहित प्रतिपक्षी दलले समेत प्रधानमन्त्री र मन्त्रीहरू प्रचारमा जान नपाउने प्रावधान व्यावहारिक भएन भनिरहेको भन्दै प्रधानमन्त्री नै पार्टी सभापति भएको र अन्य मन्त्रीहरू समेत पार्टीको महत्त्वपूर्ण जिम्मेवारीमा रहेको र पार्टीको पक्षमा जनमत बनाउन हिँड्न नपाउने आचारसंहिताको विषय व्यावहारिक नभएको बताए ।

‘प्रधानमन्त्री देशको कार्यकारी प्रमुख भएकाले उहाँको सुरक्षा संवेदनशीलतालाई ध्यानमा राखेर उहाँका दैनिक भ्रमण हुने गर्दछन् । प्रधानमन्त्री हाम्रो पार्टीको पनि सभापति हुनुहुन्छ । मन्त्रीहरू पनि पार्टीको महत्त्वपूर्ण जिम्मेवारीमा हुनुभएको हुँदा आफ्नो पार्टीका पक्षमा जनमत बनाउन हिँड्न नपाउने भन्ने कुरा व्यावहारिक छैन । निर्वाचन आयोगले अन्तर्राष्ट्रिय अभ्यासहरुलाई समेत हेरेर यसलाई लचिलो बनाउने हामीले विश्वास लिएका छौं ।’

चुनावपछि संघ र प्रदेशमा कांग्रेसको नेतृत्वमा सरकार बन्ने भन्दै उनले काठमाडौँ आएका कार्यकर्तालाई जिल्ला फर्किएर चुनावी अभियानमा लाग्न निर्देशन दिएका छन् ।

कोइराला समूहले गरिरहेको गतिविधि उपयुक्त नभएको भन्दै प्रवक्ता महतले देशभरिका कांग्रेस कार्यकर्तालाई भ्रममा नपर्न आग्रह गरेका छन् । ‘सबै नेताहरू बसेर गरेको निर्णय हो । निर्णय गर्ने नेताहरूको चित्त बुझेको छ। उहाँहरू केही बोल्नु भएको छैन‚’कांग्रेस नेता शेखर कोइराला र महामन्त्री गगनकुमार थापालगायत नेताहरूलाई लक्षित गर्दै उनले भने‚ ‘बहुमतबाट भएको निर्णय होइन; सर्वसम्मत निर्णय हो । पार्टीमा निर्णय गर्ने ठाउँमा हामीमात्रै होइन‚ उहाँहरू पनि हुनुहुन्छ ।’

प्रकाशित : आश्विन ११, २०७९ १५:५४
प्रतिक्रिया
पठाउनुहोस्

सिट बाँडफाँट टुंग्याउने छलफल अन्तिम चरणमा : कांग्रेस

कान्तिपुर संवाददाता

काठमाडौँ — नेपाली कांग्रेसले प्रतिनिधिसभा र प्रदेशसभा सदस्य निर्वाचनमा अन्य दलहरूसँग तालमेल गर्ने सहमतिअनुसार सिट बाँडफाँट टुंग्याउने छलफल अन्तिम चरणमा पुगेको बताएको छ । कांग्रेस प्रवक्ता प्रकाशशरण महतले मंगलबार जारी गरेको प्रेस विज्ञप्तिमा सिट बाँडफाँटको टुंगो लागेसँगै कांग्रेसले लिएका क्षेत्रहरूमा प्रत्यक्षतर्फको उम्मेदवार टुंगो लगाइने बताइएको छ । 

दसैं‚ तिहार र छठको अवसरमा शुभकामना दिने क्रममा प्रवक्ता महतले निर्वाचनका लागि दल दर्ता गराउने; निर्वाचन आयोगमा प्रतिनिधिसभा र प्रदेशसभामा समानुपातिकतर्फका उम्मेदवारहरूको बन्दसूची पेश गर्नेलगायत काम सम्पन्न भएको भन्दै आ-आफ्ना क्षेत्रमा डटेर लोकतन्त्र र कांग्रेसका पक्षमा जनमत बनाउन र अत्यधिक मतदान गराउने वातावरण तयार गर्न अनुरोध गरेका छन् ।

त्यस्तै समानुपातिकतर्फको बन्दसूचीमा दर्ता भएका उम्मेदवारको टुंगो लगाउँदा पार्टीका पदाधिकारीहरूबीच छलफल भएको र पार्टीको आधिकारिक निकायबाट सर्वसम्मत निर्णय भएको विज्ञप्तिमा उल्लेख गरिएको छ ।

विज्ञप्तिमा सबै तहका नेता तथा कार्यकर्तालाई निर्वाचनमा पार्टीलाई जिताउन सम्पूर्णरुपमा क्रियाशील हुनसमेत निर्देशन दिइएको छ ।

‘जिल्लाका सम्बन्धित निकायबाट पार्टीको उम्मेदवार सिफारिसमा परेर राजधानीमा आउनुभएका नेपाली कांग्रेसका इमानदार, अनुशासित, कर्मठ साथीहरूमध्ये अधिकांश साथीहरू यही यथार्थलाई आत्मसात् गर्दै पार्टीलाई आगामी निर्वाचनमा विजयी गराउने संकल्प बोकेर जिल्ला फर्किसक्नुभएको छ‚’ विज्ञप्तिमा भनिएको छ‚ ‘विजया दशमीको नवरात्र आरम्भ भैसकेकाले साथीहरूलाई आ-आफ्नो गृहजिल्ला पुगी बडादशैं हर्षोल्लासपूर्वक मनाउन र आ-आफ्ना क्षेत्रमा नेपाली कांग्रेसका पक्षमा जनमत सिर्जना गर्न आवश्यक कार्यक्रम तर्जुमा गरी कार्यान्वयन गर्न पार्टीले निर्देशन दिएको छ ।’

प्रकाशित : आश्विन ११, २०७९ १५:३७
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×