पत्रकारहरुलाई प्रेस काउन्सिल पुरस्कार प्रदान- समाचार - कान्तिपुर समाचार
कान्तिपुर वेबसाईट
AdvertisementAdvertisement

पत्रकारहरुलाई प्रेस काउन्सिल पुरस्कार प्रदान

कान्तिपुरकर्मी श्रेष्ठ र बुढा पुरस्कृत
रासस

काठमाडौँ — राष्ट्रपति विद्यादेवी भण्डारीले प्रेस काउन्सिल नेपालले यस वर्ष घोषणा गरेका विभिन्न पुरस्कार बिहीबार शीतल निवासमा आयोजित एक समारोहमा प्रदान गरेकी छन् ।

सो समारोहमा यस वर्षको ‘प्रेस काउन्सिल गोपालदास पत्रकारिता पुरस्कार’ पत्रकार हरिबहादुर थापा र ‘प्रेस काउन्सिल सुरेन्द्रबहादुर बस्नेत पत्रकारिता पुरस्कार’ अर्का पत्रकार माधव विद्रोहीलाई प्रदान गरियो । थापा इकागज डटकमका सम्पादक तथा विद्रोही राष्ट्रिय समाचार समितिका पूर्वबोर्ड सदस्य हुन् ।

त्यसैगरी यस वर्षको ‘प्रेस काउन्सिल क्रियाशील पत्रकारिता पुरस्कार’ राष्ट्रिय समाचार समितिका प्रधान सम्पादक एकराज पाठकलाई प्रदान गरिएको छ । उनीसँगै पत्रकारहरु दामोदरप्रसाद दवाडी, विमल योगी, मनोज जोशी, पुस्कर बुढाथोकी, भूपराज खड्का, कृष्ण केसी, निशा ओली, श्यामनाथ कुँवर र सुरेश धामीलाई सो पुरस्कार प्रदान गरिएको थियो । त्यसैगरी राससकर्मी सञ्चिता घिमिरेलाई प्रेस काउन्सिल महिला सशक्तीकरण पुरस्कार र अर्का राससकर्मी रवीन्द्र काफ्लेलाई प्रेस काउन्सिल युवा पत्रकारिता पुरस्कार प्रदान गरियो ।

सो समारोहमा ‘प्रेस काउन्सिल भाषागत पत्रकारिता पुरस्कार’ टेकराज थामी र ‘प्रेस काउन्सिल साहित्यिक पत्रकारिता पुरस्कार’ मायामितु न्यौपाने, ‘प्रेस काउन्सिल युवा पत्रकारिता पुरस्कार’ केशरराज क्षेत्री, दशरथ घिमिरे, प्रदीप परियार, महेश केसी, डिबी बुढा, शम्भु दंगाल, हरिबोल आचार्य, जीवन लामा, टपेन्द्र कार्की, राजेन्द्र धामी, हिमाकुमारी चेम्जोङ र मकर श्रेष्ठलाई प्रदान गरिएको छ । बुढा र श्रेष्ठ कान्तिपुर दैनिकमा कार्यरत छन् ।

त्यसैगरी प्रेस काउन्सिल महिला सशक्तीकरण पुरस्कार रमा केसी, शारदा गैरे र सरिता ज्ञवालीलाई प्रेस काउन्सिल समावेशी पत्रकारिता पुरस्कार हेमबहादुर (कमल) राना, अजय गोर्खाली र प्रवीणकुमार शर्मालाई प्रदान गरिएको छ । प्रेस काउन्सिल विधागत पत्रकारिता पुरस्कार जीवनकुमार पराजुली, आनन्द श्रेष्ठ र विजयरत्न तुलाधरले पाएका छन् ।

त्यसैगरी यस वर्ष ‘प्रेस काउन्सिल आचारसंहिता पत्रकारिता पुरस्कार’ काठमाडौंबाट प्रकाशित हुने अन्नपूर्ण पोष्ट दैनिक र पर्साको आवाज एफएमलाई प्रदान गरिएको छ । सो पुरस्कार वितरण समारोहमा सञ्चार तथा सूचना प्रविधिमन्त्री ज्ञानेन्द्रबहादुर कार्की, प्रेस काउन्सिल नेपालका अध्यक्ष बालकृष्ण बस्नेतलगायत उपस्थित थिए ।

प्रकाशित : आश्विन ६, २०७९ २०:४३
प्रतिक्रिया
पठाउनुहोस्

पाँच वर्षसम्म मिडिया काउन्सिल विधेयक जारी नहुनु दुःखद : पत्रकार महासंघ

कान्तिपुर संवाददाता

काठमाडौँ — नेपाल पत्रकार महासंघले प्रतिनिधिसभाको पाँच वर्षे कार्यकाल पूरा हुँदासमेत नेपाल मिडिया काउन्सिल विधेयक जारी नभएको भन्दै दुःख व्यक्त गरेको छ । महासंघले सरकारले प्रतिनिधिसभाको सिंगो कार्यकाल बित्दासमेत विधेयक पास हुन नसकेको भन्दै विधेयकलाई टार्ने गरी भएका प्रयासप्रति खेद प्रकट गरेको हो ।

भक्तपुरको नगरकोटमा बसेको महासंघको केन्द्रीय समिति बैठकले महासंघका सुझावहरूसमेत समेटिएको विधेयक अगाडि बढाउन सरकार सहमत भएर पनि प्रतिनिधिसभाबाट पास हुन नसकेकोप्रति चिन्ता व्यक्त गरेको हो ।

महासंघले आगामी दिनमा प्रेस तथा अभिव्यक्ति स्वतन्त्रतामैत्री कानुन निर्माण गर्न राजनीतिक दलहरूको प्रतिवद्धता खोजेको छ । ‘प्रतिनिधिसभा तथा प्रदेशसभाको निर्वाचनको पूर्वसन्ध्यामा घोषणापत्र/प्रतिबद्धतापत्र निर्माणमा लागेका सबै राजनीतिक दललाई प्रेस स्वतन्त्रताप्रति प्रतिबद्धता व्यक्त गर्न र निर्वाचित भएपछि पनि सोहीअनुसारको व्यवहार गर्न तथा नीति निर्माणका लागि माग गर्दछ,’ बैठकपछि घोषणापत्र जारी गर्दै महासंघले भनेको छ ।

महासंघले राष्ट्रपति विद्यादेवी भण्डारीले संघीय संसदबाट दोस्रोपटक पारित भई प्रमाणीकरणका लागि प्रस्तुत नागरिकता विधेयक प्रमाणीकरण नगरेको घटना र त्यसपछि भएका प्रतिक्रियात्मक घटनाहरूप्रति ध्यानाकर्षण भएको जनाउँदै संविधानको मर्म र भावनालाई ख्याल गर्न र त्यहीअनुसार समस्याहरुको सम्बोधन गर्न सरोकारवालाको ध्यानाकर्षण गराएको छ ।

महासंघले आगामी पुस ८ र ९ गते कर्णाली प्रदेशको राजधानी सुर्खेतमा वार्षिक साधारण गर्ने निणय गरेको छ भने पत्रकार आचारसंहिताको पूर्ण परिपालनामा ध्यान दिन आग्रह गर्दै आचारसंहिता पालना गराउन ‘हाम्रो लागि, हाम्रो आचारसंंहिता अभियान’ थाल्न शाखाहरूलाई निर्देशन गरेको छ ।

प्रकाशित : आश्विन ६, २०७९ २०:३६
पूरा पढ्नुहोस्
प्रतिक्रिया
पठाउनुहोस्
x
×