शान्ति र क्रान्तिको नेतृत्व गरेँ, अब एक पटक समृद्धिको नेतृत्व गर्छु : दाहाल- समाचार - कान्तिपुर समाचार
कान्तिपुर वेबसाईट
AdvertisementAdvertisement

शान्ति र क्रान्तिको नेतृत्व गरेँ, अब एक पटक समृद्धिको नेतृत्व गर्छु : दाहाल

भानुभक्त निरौला

सोलुखुम्बु — नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहालले आफूले क्रान्ति र शान्ति दुवैको नेतृत्व गरेर विश्वमै इतिहास कायाम गरेको दाबी गरेका छन् ।

सोलुखुम्बुको थुलुङ दूधकोशी गाउँपालिकामा निर्मित भौतिक संरचनाको उद्घाटन गर्दै दाहालले संविधान कार्यान्वयनकै चरणमा रहेकाले अब तल्लो तहलाई अझ अधिकारसम्पन्न बनाउन आवश्यक ऐन निर्माण गर्न बाँकी रहेको बताए ।

‘संघीय निजामती ऐन र सुरक्षा ऐन बनाउन बााकी छ, संविधानको सफल कार्यान्वयनमार्फत तल्लो तहलाई अधिकारसम्पन्न बनाउने ठूलो अभिभारा बााकी नै छ,’ उनले भने । संविधान दिवसको दिन आयोजित कार्यक्रममा उनले घुमाउरो पारामा फेरि एक पटक देशको कार्यकारी प्रमुख हुने संकेत गर्दै भने, ‘जनयुद्ध र शान्तिप्रक्रिया मेरै नेतृत्वमा सम्पन्न भयो, अब देशको विकास र समृद्धिको एक पटक नेतृत्व गर्ने उत्कट चाहना छ,’ दाहालले भने ।

उनले एक पटक नेतृत्व गर्ने चाहना भएको पनि बताए । ‘समाजवादी मुलुक नेपालको एक पटक नेतृत्व गर्ने चाहना छ, अब समाजवादमार्फत नै मुलुकलाई समृद्ध बनाउने हो,’ उनले भने । ‘जनयुद्ध’मार्फत सामन्तवादको अन्त्य गरी वर्तमान संविधान जारी गर्न सफल भएको दाहालको तर्क छ ।

यहाँ आयोजित कार्यक्रममा एकै साथ ५० शय्याको दूधकोशी सामुदायिक अस्पताल, बहुप्राविधिक शिक्षालय र गाउँपालिकाको भवनको पार्टी अध्यक्ष दाहालले उद्घाटन गरेका छन् । दूधकोशी सामुदायिक अस्पताल १५ करोड, बहुप्राविधिक शिक्षालय ५ करोड र गाउँपालिकाको प्रशासनिक भवन पौने ७ करोडको लागतमा निर्माण सम्पन्न भएको गाउँपालिका अध्यक्ष असिम राईले बताए ।

‘जिल्लामै पहिलो पटक सुविधासम्पन्न अस्पताल जनताबाट चन्दा उठाएर बनाएका हौँ,’ पालिका अध्यक्ष राईले भने, ‘महायज्ञ लाएर जनताको एकताको बलले करोडौँको अस्पताल बनाउन सफल भएका छौँ ।’ पछिल्लो समय आस्था, जाति र लिंगको आधारमा विभक्त भएको समाजमा यी सबै कुराको एकताका कारण मात्रै भौतिक स‌ंरचना निर्माण सम्पन्न भएको अध्यक्ष राईको भनाइ छ ।

कार्यक्रममा सोलुखुम्बुका निवर्तमान प्रतिनिधिसभा सदस्य हेमकुमार राई, प्रदेश १ का आर्थिक मामिलामन्त्री ईन्द्र आङ्बो, प्रदेश १ मा पूर्वराज्यमन्त्री उत्तम बस्नेत, स्थानीय सरकारका प्रमुखहरूको सहभागिता थियो । सो अवसरमा पालिकालाई २५ रोपनी नि:शुल्क जग्गा दिने स्थानीय समाजसेवी बलराम गुरुङलगायतलाई सम्मान गरिएको छ ।

प्रकाशित : आश्विन ३, २०७९ १५:३४
प्रतिक्रिया
पठाउनुहोस्

जोशीको अध्यक्षतामा राष्ट्रिय व्यवसायिक कार्यसमिति चयन 

कान्तिपुर संवाददाता

काठमाडौँ — राष्ट्रिय व्यावसायिक पहल (एनबीआई)को अध्यक्ष पदमा कुशमार जोशी पुन: निर्वाचित भएका छन् । मकवानपुरको हेटौंडामा सम्पन्न भएको पहलको १६ औं वार्षिक साधारणसभाबाट अध्यक्ष जोशीको अध्यक्षतामा २५ सदस्यीय कार्यसमिति निर्विरोध निर्वाचित भएको हो ।

कार्यसमिति उपाध्यक्षमा शकुन्तलाल हिराचन, महासचिवमा सुरेन्द्रवीर मालाकार, कोषाध्यक्षमा दिपक मलहोत्रा, सचिवमा सरोजप्रसाद पाण्डे र सुरेश प्रधान तथा सहकोषाध्यक्षमा विनायक शाह चयन भएका छन् । कार्यसमिति सदस्यहरुमा उमेशलाल श्रेष्ठ, लता प्याकुरेल, शिवप्रसाद घिमिरे, अशोक वैद्य, राजेश खड्का, रविन्द्रमान सिंह प्रधान, अरनिको राजभण्डारी, मुकेशकुमार भट्टराई, रमेश शर्मा, राजेशबाबु श्रेष्ठ, वविन पोखरेल, खेम लकाई, होमनाथ उपाध्याय, सनम शाक्य निर्वाचित भएका छन् । मनोनित कार्यसमिति सदस्यमा सुधिर मित्तल, डा. राजेन्द्र घिसिङ र संस्थागत पदेन सदस्यमा नानीराज घिमिरे छन् ।


प्रकाशित : आश्विन ३, २०७९ १५:०८
पूरा पढ्नुहोस्
प्रतिक्रिया
पठाउनुहोस्
×