अछाम पहिरो : ३ जना घाइतेलाई हेलिकोप्टरमार्फत उद्धार गरी सुर्खेत पठाइयो- समाचार - कान्तिपुर समाचार

अछाम पहिरो : ३ जना घाइतेलाई हेलिकोप्टरमार्फत उद्धार गरी सुर्खेत पठाइयो

मेनुका ढुंगाना

अछाम — शुक्रबार राति आएको पहिरोमा परी घाइते भएका ढकारी गाउँपालिका -६ ढुंगाचाल्नाका ३ जना घाइतेको हेलिकप्टरमार्फत उद्धार गरेर सुर्खेत अस्पतालमा लगिएको छ ।

एक परिवारका ६२ वर्षका हर्क बुढा, उनकी कान्छी बुहारी २१ वर्षकी चन्द्रा बुढा, हर्कबहादुरका १२ वर्षका नाति धर्म बुढाको हेलिकोप्टरमार्फत उद्धार गरेर थप उपचारको लागि सुर्खेत लगिएको परिवारका सदस्य निर्मल बुढाले बताए ।

'बुबा, भाइ–बुहारी र भतिजलाई हेलिकोप्टरबाट सुर्खेत लगिएको छ । डेढ वर्षको भतिज नवीन बुढाको घटनास्थलमै मृत्युु भयो । उनकी आमा चन्द्रादेवी हुन् । उनी पनि गम्भीर घाइते भएकी छन्,' उनले भने, 'गाईवस्तु, अन्न सबै बगाएको छ । अहिले गाउँ शोकमा छ ।'

कमलबजार र तुर्माखाँदमा हेलिकोप्टरबाट उद्वार गर्नुपर्ने प्रकृतिका घाइते नभएको निमित्त प्रमुख जिल्ला अधिकारी दिपेश रिजालले बताए । 'जिल्ला प्रशासन कार्यालयको आग्रहमा गृह मन्त्रालयले घाइतेको उद्धारका लागि हेलिकोप्टर पठाएको उनले बताए । आज बेपत्ताको खोजी र घाइतेको उद्धार र उपचार गर्ने विषयलाई प्राथमिकता दिएका छौं । पहिरोपीडितलाई राहत दिन स्थानीय तहलाई भनेका छौं । भोलिदेखि हामी पनि लाग्छौ ।' निमित्त प्रजिअ रिजालले भने ।

प्रकाशित : आश्विन १, २०७९ १३:१८
प्रतिक्रिया
पठाउनुहोस्

महाभियोग सिफारिस समितिले जबराबारेको प्रतिवेदन आजै सभामुखलाई बुझाउने

कान्तिपुर संवाददाता

काठमाडौँ — प्रतिनिधिसभाको महाभियोग सिफारिस समितिले निलम्बित प्रधानन्यायाधीश चोलेन्द्र शमशेर जबरामाथिको अनुसन्धान प्रक्रिया सकेको छ । समितिका सभापति रामबहादुर विष्टले जबराको बयान, बयानमा हस्ताक्षर प्रतिप्रश्नको जवाफ दिने काम सकिएको जानकारी दिए । 

शनिबार नै प्रतिवेदनलाई अन्तिम रूप दिइने पनि सभापति विष्टले जनाएका छन् । विष्टले भने, 'सबै अनुसन्धान गरियो प्रतिवेदन तयार पार्न बाँकी छ । प्रतिवेदन आजै बुझाइन्छ । मस्यौदा तयार गरेर बाँडिएको छ । तीन बजे बस्ने बैठकमा अन्तिम रूप दिइन्छ ।'

सभापति विष्टका अनुसार समितिले तयार पारेको प्रतिवेदन सभामुख अग्निप्रसाद सापकोटालाई दिइनेछ । प्रतिनिधिसभाको कार्यकाल असोज १ (शनिबार) मा सकिँदै छ । शुक्रबार बिहान बसेको मन्त्रिपरिषद् बैठकले प्रतिनिधिसभाको यो अधिवेशन असोज १ गते मध्यराति १२ बजेबाट अन्त्य गर्न राष्ट्रपतिसमक्ष सिफारिस गरिसकेको छ ।

नेपालको संविधान र अन्तर्राष्ट्रिय अभ्यासका आधारमा प्रतिनिधिसभाको यो कार्यकालमा नटुंगिएमा नयाँ आउने प्रतिनिधिसभाले महाभियोग प्रक्रिया टुंग्याउने तयारी छ ।

संविधानको धारा १०१ को उपधारा ६ मा ‘महाभियोगको कारबाही प्रारम्भ भएपछि प्रधानन्यायाधीश, न्यायाधीश वा अन्य संवैधानिक निकायका पदाधिकारीले त्यस्तो कारबाही टुंगो नलागेसम्म आफ्नो पदको कार्यसम्पादन गर्न पाउने छैन’ भन्ने व्यवस्था छ । संविधानको यो व्यवस्थाअनुसार महाभियोगको कारबाहीलाई प्रतिनिधिसभाले टुंगो नलगाएसम्म जबरा काममा फर्कन नपाउने विष्टले बताए ।

प्रकाशित : आश्विन १, २०७९ १२:४१
पूरा पढ्नुहोस्
प्रतिक्रिया
पठाउनुहोस्
×