बबई र कर्णाली नदीको बहाव सतर्कता तहमाथि, ६५ भन्दा बढी घरपरिवारलाई स्थानान्तरण- समाचार - कान्तिपुर समाचार

बबई र कर्णाली नदीको बहाव सतर्कता तहमाथि, ६५ भन्दा बढी घरपरिवारलाई स्थानान्तरण

कमल पन्थी

बर्दिया — बर्दियामा लगातार तीन दिनदेखि परेको अविरल वर्षाले बबई, कर्णाली र अन्य साना, ठूला खोलामा पानीको बहाव उच्च भएको छ । डुबानले ठाकुरबाबा नगरपालिका—७ र ५ मा डुबानले ३५ घर परिवारलाई अन्यत्र स्थानान्तरण गरिएको प्रमुख जिल्ला अधिकारी शम्भुप्रसाद बास्तोलाले बताए ।

यसैगरी राजापुर—७ बाजुरेली टोलमा डुबान हुँदा तीस घरका मानिसलाई सुरक्षित सामुदायिक वनमा आश्रय लिएका छन् । उनीहरुलाई सशस्त्र प्रहरी र नेपाल प्रहरीले नजिकको सामुदायिक वनको भवनमा स्थानान्तरण गरिएको सशस्त्र प्रहरी उपरीक्षक जहरसिंह बुढाले बताए ।

गेरुवा गाउँपालिका—३ सनकटीघाटमा कर्णाली नदी कटानले व्यापक क्षति पुर्‍याउन थालेको छ । पहाडी भूभागमा पानी परिरहेको छ । नदी र खोला बढी रहेकोले तटीय क्षेत्रका बासिन्दालाई सुरक्षित स्थानमा रहन स्थानीय प्रशासनले आग्रह गरेको छ । नदीमा माछा मार्ने र काठ ओसार्न नजान सबैलाई आग्रह गरिएको प्रजिअ बास्तोलाले बताए ।

यसैबीच लगातारको वर्षाले बबई नदी र कर्णालीमा सतर्कता तहमाथि पानी बगिरहेको छ । बबईमा ६ दशमलव ४ मिटरमाथि पानी बगिरहेको जिल्ला प्रशासन कार्यालयले जनाएको छ । ६ दशमलव १० पुग्नासाथ बाढी पस्ने गर्छ । कर्णाली नदीमा ९ दशमलव ७५ मिटर माथि पानी बगिरहेको छ । कर्णालीमा ११ मिटर पानी बगे बाढी पस्ने गर्छ ।

प्रकाशित : आश्विन १, २०७९ ०९:०९
प्रतिक्रिया
पठाउनुहोस्

कञ्चनपुरमा बाढीले दर्जनौं बस्ती डुबानमा, ४ सय परिवार विस्थापित

भवानी भट्ट

कञ्चनपुर — अविरल वर्षापछि कञ्चनपुरमा बनहरा र दोदा नदीमा आएको बाढीले दर्जनौं बस्तीहरु डुबानमा परेका छन् । जिल्ला प्रहरी कार्यालयका अनुसार शुक्रबार रातिदेखि विभिन्न नदीमा आएको बाढी बस्तीमा पस्दा ४ सय बढी परिवार विस्थापित भएका छन् ।

दोदा नदीको बाढी बस्तीमा पस्दा लालझाडी गाउँपालिका पूरै डुबानमा परेको अध्यक्ष निर्मल रानाले बताए । उनका अनुसार शिखलपट्टी जाईबाट बाढी बस्तीमा पसेर पूरै गाउँपालिका डुबानमा परेको छ । वल्मी, कन्ज, कसुवा, डुंगा र छोटी पर्सिया लगायतका बस्तीहरुमा डेढ सय घर परिवार डुबानका कारण विस्थापित भएको जिल्ला प्रहरी कार्यालय कञ्चनपुरका डिएसपी चक्रबहादुर शाहले बताए ।

यसैगरी कृष्णपुर नगरपालिका–५ को पवित्रा बस्ती शिविरमा मोहना नदी पस्दा ७० परिवार विस्थापित भएको प्रहरीले जनाएको छ । कृष्णपुर ४ मा मछेली नदीको बाढी बस्तीमा पस्दा ८० परिवार विस्थापित भएका छन् । विस्थापित परिवारलाई नजिकको विद्यालयमा राखिएको छ ।

बनहरा नदीको बाढी बस्तीमा पसेर बीचमा फसेका शुक्लाफाँटा नगरपालिका १२ दुबाहाका ४ परिवारका १६ जनालाई शनिबार बिहान उद्धार गरिएको छ । राति दुई/अढाइ वजेदेखि नै बाढी बस्तीमा पसेको हो । बनहराको बाढीले शुक्लाफाँटा नगरपालिका ११ को बनहरा शिविरका २५ टहरा बगाएको प्रहरीले जनाएको छ ।

प्रकाशित : आश्विन १, २०७९ ०९:०२
पूरा पढ्नुहोस्
प्रतिक्रिया
पठाउनुहोस्
×