गठबन्धनमा भागबन्डा : ‘८८ सिटमा समझदारी’- समाचार - कान्तिपुर समाचार

गठबन्धनमा भागबन्डा : ‘८८ सिटमा समझदारी’

कांग्रेसले दाबी गरेका ६०, माओवादीका १२, एकीकृत समाजवादीका र जसपाका ८–८ निर्वाचन क्षेत्रमा गठबन्धनका अन्य दलको दाबी रहेन
नमिलेका क्षेत्रमा समझदारी जुटाउने जिम्मा देउवा र दाहाललाई दिने कार्यदलको तयारी
कुलचन्द्र न्यौपाने

काठमाडौँ — संसदीय निर्वाचनका लागि सिट बाँडफाँटको प्रयासरत सत्ता गठबन्धनको कार्यदलले बुधबार साँझसम्म ८८ सिटमा समझदारी गरेको नेताहरूले दाबी गरेका छन् । एक महिनाअघि गठन भएको कार्यदलले सुरुमा प्रतिशतमा भागबन्डा गर्न खोजे पनि समझदारी बन्न नसकेपछि एक/एक सिटमा छलफल गरिरहेको छ ।



समानुपातिक उम्मेदवारको बन्दसूची असोज २ र ३ मा बुझाउने तालिका छ । प्रत्यक्ष सिटमा बाँडफाँट नभएसम्म समानुपातिकमा कसको नाम पठाउने वा नपठाउने भन्ने अन्योल हुने भएकाले अहिले नै सबै विषय टुंगो लगाउन गठबन्धनले प्रयास गरिरहेको छ । सिट बाँडफाँटमा समझदारी बनाउन गठबन्धनले साउन २२ मा कांग्रेस नेता कृष्णप्रसाद सिटौला नेतृत्वको ११ सदस्यीय कार्यदल बनाएको थियो । त्यसयता शीर्ष नेतासहित कार्यदलको बैठक निरन्तर चलिरहेको छ ।

समग्र सिटलाई प्रतिशतमै भागबन्डा गर्न कठिन भएपछि दलहरूले एक/एक सिट छुट्याउने प्रयास गरिरहेका छन् । प्रतिनिधिसभाका कुल १६५ निर्वाचन क्षेत्रमध्ये कांग्रेसले एक सय, माओवादीले ६०, जसपाले ३२ र समाजवादीले २० सिटमा दाबी प्रस्तुत गरेका छन् । तर, कांग्रेसले दाबी गरेका मध्ये ६० सिटमा अरू कसैको दाबी नपरेकाले ती सिटमा कांग्रेसले उम्मेदवारी पाउने पक्का भएको छ । त्यस्तै माओवादीले दाबी गरेका मध्ये १२ सिटमा गठबन्धनका अन्य दलको दाबी छैन ।

एकीकृत समाजवादीका पनि अध्यक्ष माधवकुमार नेपालले चुनाव लड्ने रौतहट–१, झलनाथ खनालको इलाम–१ र सचिव रामकुमारी झाँक्रीको गुल्मी–२ सहित ८ सिटमा अरूको दाबी छैन । जनता समाजवादी पार्टीका पनि ८ निर्वाचन क्षेत्रमा एकल दाबी छ ।

‘अहिलेसम्म ८८ निर्वाचन क्षेत्रको भागबन्डा मिलिसकेको छ । भोलि बिहान बस्ने कार्यदलको बैठकले केही निर्वाचन क्षेत्र मिलाउन सक्छ,’ कार्यदलका अर्का एक सदस्यले भने, ‘त्यहाँ पनि नमिलेका विषय शीर्ष तहका नेताहरूको जिम्मामा जान्छन्, नेताहरूले ४० देखि ५० निर्वाचन क्षेत्रको समस्या हल गर्नुपर्ने देखिन्छ ।’

०७४ को संसदीय निर्वाचन र ०७९ को स्थानीय तहको मतका आधारमा केही सिटमा समझदारी बन्न सजिलो हुने नेताहरूको भनाइ छ । ‘०७४ मा प्रत्यक्ष जितेका निर्वाचन क्षेत्रमा अधिकांशमा समझदारी बनेको छ । केन्द्रीयस्तरका मुख्य नेताले प्रतिस्पर्धा गर्ने क्षेत्रमा पनि समस्या हुँदैन,’ कार्यदलका एक सदस्यले भने ।

तनहुँ–१ मा कांग्रेस नेता रामचन्द्र पौडेलले उम्मेदवारीको तयारी गरेपछि एसका सांसद किसानकुमार श्रेष्ठलाई बारा–४ मा उठाउने तयारी गरिएको छ । डोटीमा एसका प्रेम आले र कांग्रेसका वीरबहादुर बलायरबीच गठबन्धनको टिकटमा प्रतिस्पर्धा छ । बलायरलाई कैलालीमा झार्ने देउवाको तयारी छ । मोरङ–४ मा पनि कांग्रेसका केन्द्रीयस्तरका नेताहरू बढी भएकाले कांग्रेसले दाबी गरेको छ ।

०७४ मा उक्त निर्वाचन क्षेत्रबाट माओवादीका अमनलाल मोदीले कांग्रेस नेता महेश आचार्यलाई हराएका थिए । अहिले उक्त क्षेत्रबाट टिकट लिन कांग्रेसभित्र नै महेश आचार्य, गुरु घिमिरे र अमृत अर्यालबीच तीव्र प्रतिस्पर्धा छ । यस्तै जटिल अवस्था सिन्धुपाल्चोक–१ मा पनि छ । त्यहाँ सभामुख अग्नि सापकोटाले नै प्रत्यक्ष चुनाव लड्न खोजेमा कांग्रेसका मोहन बस्नेतलाई कसरी व्यवस्थापन गर्ने भन्ने समस्या छ । आफू लड्दै आएको निर्वाचन क्षेत्र छाड्न नसक्ने भन्दै बस्नेत चुनावी तयारीमा जुटिसकेका छन् ।

कार्यदलका सदस्यसमेत रहेका सञ्चारमन्त्री ज्ञानेन्द्रबहादुर कार्कीले प्रतिवेदनसहित नमिलेका निर्वाचन क्षेत्रको टुंगो लगाउन बिहीबार नै शीर्ष नेताहरूलाई जिम्मेवारी दिइने जानकारी दिए । ‘हामी समझदारीको अन्तिममा छौं, कार्यदलले अहिलेसम्म गरेका कामको प्रतिवेदन तयार पारेर शीर्ष नेतालाई बुझाउँछौं,’ उनले भने, ‘बाँकी निर्णय शीर्ष तहको छलफलमा हुन्छ । अब सहमति हुन समय लाग्दैन ।’

मधेसमा कांग्रेस र जसपाबीच मुख्य रस्साकसी छ जहाँ प्रतिनिधिसभाका ३२ सिट छन् । स्थानीय तह निर्वाचनमा वडाध्यक्षका उम्मेदवारको प्राप्त मतका आधारमा मधेसका १८ क्षेत्रमा कांग्रेस एक्लै अघि छ । त्यसैका आधारमा उसले २० भन्दा बढी निर्वाचन क्षेत्रमा दाबी गरेको छ । वडाध्यक्षको मतका आधारमा मधेसमा एमाले ६, जसपा ५, माओवादी, एकीकृत समाजवादी र लोकतान्त्रिक समाजवादी पार्टी (लोसपा) एक/एक सिटमा मात्र अघि छन् । तर जसपाले मधेस प्रदेशलाई आफ्नो पार्टीको मुख्य आधार क्षेत्र मानेर दाबी प्रस्तुत गरिरहेको छ ।

मोरङ–५, सुनसरी–१, काठमाडौं–७ लगायत गरी मुलुकभरका ३२ निर्वाचन क्षेत्रमा जसपाको दाबी छ । ‘तोप माग्दा लाठी मात्र दिने अवस्था भएकाले सबैले आ–आफ्ना दाबी बढाएका हुन्,’ जसपा नेता मनीष सुमनले भने, ‘समझदारीमा आउँदा जसपा २६/२७ सम्म आउन सक्छ ।’ मधेस प्रदेशमा जसपाको मुख्य आधार र प्रभाव भएकाले गठबन्धनका अन्य दलले भाँजो हाल्न नहुने उनको भनाइ छ ।

उता, माओवादी अध्यक्ष पुष्पकमल दाहालले कांग्रेसले ५० प्रतिशत अर्थात् ८२ सिट र गठबन्धनका अन्य दलले ८३ सिट पाउनुपर्ने अडान राखिरहेका छन् । कार्यदलका संयोजक सिटौलाले यसअघि नै कांग्रेसले ८८ सिटको दाबी अघि सारेका थिए । त्यसैलाई आधार मानेर सभापति एवं प्रधानमन्त्री शेरबहादुर देउवाले समेत ८६ जोड २ को प्रस्ताव गरेका थिए । कांग्रेसले ८६ लिने र दुई सिट लोसपा अध्यक्ष महन्थ ठाकुर र नेता राजेन्द्र महतोका लागि छुट्याउने उनको प्रस्ताव थियो ।

प्रकाशित : भाद्र २३, २०७९ ०६:५३
प्रतिक्रिया
पठाउनुहोस्

भारतको सुस्त सुरुआत

राजु घिसिङ

काठमाडौँ — कक्सबजार (बंगलादेश) मा सन् २०१० मा भएको पहिलो साफ महिला च्याम्पियनसिपमा सेमिफाइनल खेलेको पाकिस्तान दक्षिण एसियाली महिला फुटबलमा कमजोर टिममै पर्छ । कोलम्बो (२०१२) र घरेलु भूमि इस्लामाबाद (२०१४) मा भएका संस्करणमा समूह चरणबाटै बाहिरिएपछि पाकिस्तानी महिला टिम अन्तर्राष्ट्रिय फुटबलबाटै अलिग्गयो । त्यसैले आठ वर्षपछि अन्तर्राष्ट्रिय फुटबलमा फर्किंदा पाकिस्तानविरुद्ध साफ महिला च्याम्पियनसिप २०२२ मा बुधबार भारतले सहजै मात्र होइन, ठूलो अन्तरको जित हात पार्ने अनुमान गरिएको थियो ।

दशरथ रंगशालामा बुधबार भारतीय वैकल्पिक खेलाडी अपूर्ण नर्जारी (नीलो) लाई रोक्ने प्रयासमा पाकिस्तानी खेलाडी । माल्दिभ्सविरुद्ध गोल गरेपछि बंगलादेशी खेलाडी (तल) । तस्बिर : हेमन्त श्रेष्ठ/कान्तिपुर

तर, दशरथ रंगशालाको खेल त्यस्तो भएन । साफमा अपराजितमात्रै होइन, सम्भव पाँचै संस्करणको उपाधि जितेको भारतले पाकिस्तानमाथि ३–० को जित निकाल्दै उपाधि रक्षाको अभियान थाल्यो । १० मिनेटपछि बलमाथि पकड भारतले कायम राख्यो । बल पाकिस्तानको पेनाल्टी क्षेत्र वरिपरि घुमिरह्यो । पाकिस्तानलाई लगातार दबाब दियो । तर, भारतले ‘अट्याकिङ थर्ड’ (पेनाल्टी क्षेत्रभित्र) खासै खेल्न सकेन । गोलका धेरै अवसर सिर्जना गर्न सकेन । पोस्टमा शृंखलाबद्ध आक्रमण गर्न सकेन । वास्तवमा भारतको प्रदर्शन अपेक्षाभन्दा निकै फितलो रह्यो । त्यसैले ८ वर्षप्छि अन्तर्राष्ट्रिय फुटबलमा फर्किएको कमजोर टिमविरुद्ध भारत तीन गोलमै सीमित भयो ।

‘आठ वर्ष नखेलेको भएर पाकिस्तानले कस्तो खेल्छ भन्ने हामीलाई थाह थिएन,’ समूह ‘ए’ मा ३ अंक जोडेपछि भारतीय टिमका मुख्य प्रशिक्षक सुरेन क्षेत्रीले भने, ‘पहिलो खेल सधैं महत्त्वपूर्ण हुन्छ र यो हामीले जितेका छौं । जित भनेको जित नै हो । यो हाम्रो पक्षमा भयो । पहिलो हाफको २–० को अग्रताले सहज भयो । बल पोसेसनमा हाम्रो राम्रो थियो । ‘फाइनल थर्ड’ मा राम्रो गरेर अर्को खेलमा फर्किने छौं । टिममा नयाँ खेलाडीहरू छन्, उनीहरूलाई अवसर दिएका छौं ।’

खेलमा पहिलो अवसर भने पाकिस्तानले पाएको थियो । इंग्ल्यान्डको चौथो श्रेणीको क्लब डंकास्टर रोभर्समा आबद्ध फरवार्ड नादिया खानले चौथो मिनेटमै एक्लै अघि बढाउँदै प्रहार गरेको बल पोस्ट नजिकबाट बाहिरिँदा पाकिस्तान आश्चार्यजनक अग्रता लिन चुक्यो । भारतले पाकिस्तानी टिमकी कप्तान मारिया जमिल खानले आफ्नै पोस्टमा गोल गरेपछि २१ औं मिनेटमा अग्रता लिएको थियो । सान्धिया रंगनाथनले प्रहार गरेको बल गोलकिपर साहिद बुखारीले रोकेकी थिइन्, त्यही बल क्लियर गर्ने प्रयासमा मारियाले प्रहार गरिन्, तर बलले आफ्नै पोस्टको गोललाइन पार गर्न पुग्यो ।

भारतलाई अग्रता दोब्बर पार्न भने खास समय लागेन । तीन वर्षअघि विरानरमा भएको पाँचौं साफमा सर्वोत्कृष्ट खेलाडी अवार्ड जितेकी ग्रेस डाङ्मीले २३ औं मिनेटमा गोल गरेपछि भारत २–० ले अघि बढ्यो । पेनाल्टी क्षेत्रमा ‘अनमार्क’ उनलाई अञ्जु तामाङले आकर्षक पास दिएकी थिइन् । क्रोएसियाको शीर्ष डिभिजन क्लब डिनामो जाग्रेभमा आबद्ध फरवार्ड सौम्य गुगुलोथले चार मिनेटको इन्ज्युरी समयको अन्तिम क्षणतिर रञ्जना चानुको क्रसमा गोल गरेपछि भारतले ३–० को जित निकालेको हो ।

‘हामी आठ वर्षपछि अन्तर्राष्ट्रिय फुटबलमा फर्केका छौं, यो सबै पाकिस्तानी महिलाका लागि महत्त्वपूर्ण कुरा हो,’ हारपछि आँसु झार्दै ‘ड्रेसिङ रुम’ फर्किएकी कप्तान मारियाले भनिन्, ‘सबै खेलाडीले मिहिनेत गरे । राम्रो गरे । तर, पहिलो खेल हारेका छौं ।’ उनी युनाइटेड अरब इमिरेट्स (युएई) बस्छिन्, उतै क्लब फुटबल खेल्छिन् । पाकिस्तानका मुख्य प्रशिक्षक अदिल मिर्जा रिज्कीले पनि टिमको प्रदर्शनप्रति सन्तुष्टि व्यक्त गरे, ‘खेलाडीहरूले साँच्चिकै राम्रो गरे, राम्रो खेले । हामी यहाँ प्रगति गर्न आएका छौं ।’

तेस्रो साफ इस्लामाबादमा खेलेपछि अन्तर्राष्ट्रिय फुटबलमा सहभागी हुन छाडेको पाकिस्तानी महिला टिमलाई अन्तर्राष्ट्रिय फुटबल महासंघ (फिफा) ले पाकिस्तान फुटबल महासंघ (पीएफएफ) माथि गरेको निलम्बनको पनि असर थियो । उक्त निलम्बन फिफाले हटाएपछि पाकिस्तान छैटौं साफ महिला च्याम्पियनसिपमा सहभागी हुन काठमाडौं आइपुगेको हो । त्यसैले पनि पाकिस्तानी टिमलाई यो साफमा बलियो टिम मािनएको थिएन । ८ वर्षपछि फर्किएको टिमविरुद्ध भारतले गोलको वर्षात् नै गर्ने आँकलन थियो । तर, खेल त्यस्तो भएन । पाकिस्तानले सुरुमा बाहेक थप अवसर बनाउन सकेन । भारतले केही अवसर गुमाए पनि आक्रामक खेल देखाउन सकेन । टोलीको प्रदर्शनमा छुटेका केही सिनियर र प्रतिभावान खेलाडीको अभाव देखियो ।

सबिनाको दुई गोल

समूह ‘ए’ कै अर्को खेलमा कप्तान साविना खातुनको दुई गोल सहयोगमा बंगलादेशले माल्दिभ्समाथि ३–० को जित निकाल्यो । पूर्णतः बंगलादेशको नियन्त्रणमा रहेको खेलमा तीनै गोल पहिलो हाफमा भयो ।

सविनाले करिब ३२ यार्डबाट प्रहार गर्दै ३२ औं मिनेटमा गोलको खाता खोलिन् । मसुरा परविनले ३४ औं मिनेटमा बंगलादेशको अग्रता दोब्बर बनाइन् । मारिया मान्डाको प्रहार गोलकिपर/कप्तान अमिनथ लिजाले रोके पनि त्यही बललाई सविनाले पोस्टको दिशा दिँदै ४० औं मिनेटमा व्यक्तिगत दोस्रो गोल गरिन् ।

प्रकाशित : भाद्र २३, २०७९ ०६:४८
पूरा पढ्नुहोस्
प्रतिक्रिया
पठाउनुहोस्
×