भट्टराई पक्षको दलको नाम ‘नेपाल समाजवादी पार्टी’

भट्टराईले नयाँ पार्टीको अध्यक्ष आफू नहुने केही दिन अघि कान्तिपुरसँगको अन्तर्वार्तामा बताएका थिए । नेपाली राजनीतिमा पुरानो पुस्ताले नेतृत्व छाड्दै नयाँलाई अघि आउन सघाउनुपर्ने उनको जिकिर थियो । तर भट्टराईले नेतृत्व नगरे नयाँ दल सञ्चालन सहज नहुने बुझाइ उनको समूहमा छ ।

अध्यक्षबारे अझै टुंगो नलागेको यमीले जनाइन् । जसपालाई पुनर्गठन गरी नयाँ समावेशी पार्टी बनाउने उद्देश्यसहित भट्टराई पक्ष अलग भएको थियो । आगामी निर्वाचनमा ‘समाजवादी केन्द्र’ बनाउने भन्दै भट्टराईले माओवादी अध्यक्ष पुष्पकमल दाहाल, एकीकृत समाजवादी अध्यक्ष माधवकुमार नेपाललगायतसँग छलफल गरिरहेका छन् ।