काठमाडौँ — संघीय संसद् प्रतिनिधिसभाअन्तर्गतको शिक्षा तथा स्वास्थ्य समितिले कूटनीतिक पहल गरी मुटुको शल्यक्रियाका लागि आवश्यक अक्सिजेनेटर मेसिन तत्काल उपलब्ध हुनेगरी आवश्यक व्यवस्था मिलाउन सरकारलाई निर्देशन दिएको छ । 

समितिको शुक्रबार सिंहदरबारमा बसेको बैठकले सो मेसिन तत्काल उपलब्ध गराउन स्वास्थ्य तथा जनसंख्या मन्त्रालयलाई आग्रह गरेको हो । मुटुका बिरामीहरुको शल्यक्रिया नै हुन नसकेको विषयलाई गम्भीरतापूर्वक लिएर कूटनीतिक पहल गरी त्यसको आवश्यक व्यवस्था मिलाउन सरकारलाई सुझाव दिइएको समितिकी सभापति जयपुरी घर्तीले बताइन् ।

‘अक्सिजेनेटर मेसिनचाहिँ कूटनीतिक पहल गरेर तत्काल उपलब्ध गराउनु पर्‍यो भनेर म सरकारलाई सुझाव दिन चाहन्छु । मुटुको बिरामीहरुको शल्यक्रिया नै हुन सकेन भनेर समाचार आएका छन । यस विषयमा सरकार संवेदनशील भएर यसको आवश्यक व्यवस्था छिटो मिलाउनु पर्‍यो,’ उनले भनिन् । 

बुधबार अत्यावश्यक ‘अक्सिजेनेटर’ बेलैमा प्रबन्ध नगर्दा  सहिद गंगालाल राष्ट्रिय हृदयरोग केन्द्र मंगलबार एकै दिन ४५ जना बिरामीलाई बेडबाट निकालेर घर पठाएको समाचार प्रकाशित गरेका थिए । त्यसपछि प्रतिनिधिसभा बैठकमा एमाले सांसद नवीना लामालगायतका सांसदले सरकारको ध्यानाकर्षण गराएका थिए ।