अमेरिकी राष्ट्रपति बाइडेन र राजदूत खत्रीबीच भेट- समाचार - कान्तिपुर समाचार

अमेरिकी राष्ट्रपति बाइडेन र राजदूत खत्रीबीच भेट

नेपालमा एसपीसीको विषय बाहिर आउनुअघि नै उनीहरूबीच भेटवार्ता भएको थियो
कान्तिपुर संवाददाता

काठमाडौँ — प्रधानमन्त्री शेरबहादुर देउवाको अमेरिका भ्रमणको गृहकार्य भइरहेका बेला अमेरिकाका लागि नेपाली राजदूत श्रीधर खत्रीले अमेरिकी राष्ट्रपति जो बाइडेनसँग भेट गरेका छन् । उनीहरुबीच जेठ ३० गते भेट भएको थियो ।

राजदूत खत्रीले अमेरिका गएपछि कोभिड–१९ संक्रमणका कारण भर्चुअल रुपमै राजदूतको ओहदाको प्रमाणपत्र बुझाएका थिए । त्यसबेला व्यक्तिगत रुपमा भेटवार्ता नभएपछि राष्ट्रपति बाइडेनलले भर्चुअल रुपमै ओहदाको प्रमाणपत्र बुझाएका राजदूतहरूसँग व्यक्तिगत भेटवार्ता गर्नका लागि ह्वाइट हाउसमा बोलाएका हुन् ।

यस अवसरमा राजदूत खत्री पनि गएका थिए । भेट सामान्य भएको कारणले गर्दा दूतावासले यसबारे बाहिर जानकारी नल्याएको जनाएको छ । छोटो भेटवार्तामा राष्ट्रपति बाइडेनले नेपालको विषयमा चासो राखेको राजदूत खत्रीले कान्तिपुरलाई बताए । ‘राष्ट्रपतिज्यूले नेपाल र नेपाली आफूलाई मन पर्ने बताउनु भएको थियो,’ राजदूत खत्रीले भने,‘साथै, त्यस अवसरमा दुई मुलुकबीचको द्धीपक्षीय हितको सम्बन्धमा पनि कुराकानी भएको थियो ।'

प्रधानमन्त्री देउवाको अमेरिका भ्रमण असार अन्त्य वा साउनको पहिलो साता हुने भनिए पनि सरकारले औपचारिक रुपमा निर्णय गरिसकेको छैन ।

राजदूत खत्रीले बाइडेनलाई भेट्दा नेपालमा अमेरिकासँगको स्टेट पार्टनरसिप प्रोग्राम (एसपीपी) को सम्बन्धमा नेपालमा कुनै पनि चर्चा भएको थिएन । उक्त भेटपछि मात्र एसपीपीलाई लिएर नेपालमा विवाद भयो । नेपाल सरकारले त्यसलाई अस्वीकार गर्ने निर्णय पनि गरिसकेको छ ।

प्रकाशित : असार ११, २०७९ १८:५०
प्रतिक्रिया
पठाउनुहोस्

निकुञ्जमा घडियालका बच्चाको बथान

मनोज पौडेल

बर्दिया — बर्दिया राष्ट्रिय निकुञ्जस्थित गोही प्रजनन् केन्द्रमा तीन साताअघि जन्मिएका घडियाल (गोही)का ५० वटा बच्चा दिनभर पोखरीमा सुस्ताइरहेका हुन्छन् । संसारमै दुर्लभ मानिने घडियालका यी बच्चाको बथानले पोखरीकै सौन्दर्य बढाउँछ । राष्ट्रिय निकुञ्जको प्रजनन केन्द्रमा पुग्दा कतिपय बच्चा पोखरीमा खेलिरहेका र केही आहारा खान सिक्दै गरेका देखिन्छन् ।

केही बच्चा पोखरीको डिलमा सुस्ताइरहेका हुन्छन् । पोखरीमा माउभन्दा बच्चा धेरै छन् । पोखरीमा ठूला घडियाल मात्रै ४२ वटा छन् । ०७३ सालपछि सबैभन्दा धेरै बच्चा यस वर्ष जन्मिएको बर्दिया राष्ट्रिय निकुञ्जका वार्डेन विष्णु श्रेष्ठले बताए । घडियालकै लागि दुई जना प्राविधिक खटिएर उनीहरूको रेखदेख गरिरहेका छन् । घडियालका बच्चा हुर्किने दर भने अति न्यून छ । वार्डेन श्रेष्ठका अनुसार घडियालका बच्चाको हुर्किने दर एक/दुई प्रतिशत मात्रै हुन्छ । यसैले पनि यी बच्चाको कडा निगरानी आवश्यक पर्ने वार्डेन श्रेष्ठ बताउँछन् ।

ओथारो बसेर ७५ दिनदेखि अधिकतम एक सय दिनमा गोहीले बच्चा कोरल्ने गर्छ । विज्ञहरूका अनुसार घडियाल गोही नेपाल र भारतमा मात्रै पाइन्छ । वन्यजन्तु ऐन अनुसार संरक्षित सूचीमा रहेको घडियाल ७० देखि ८० वर्षसम्म बँच्छ ।


प्रकाशित : असार ११, २०७९ १८:०९
पूरा पढ्नुहोस्
प्रतिक्रिया
पठाउनुहोस्
x
×