देउवालाई एकीकृत समाजवादीको चेतावनी : हाम्रो निर्णयको कदर गर्नू- समाचार - कान्तिपुर समाचार

देउवालाई एकीकृत समाजवादीको चेतावनी : हाम्रो निर्णयको कदर गर्नू

कान्तिपुर संवाददाता

काठमाडौँ — नेकपा एकीकृत समाजवादीले मन्त्रिपरिषद्‍ पुनर्गठनमा ढिलाइ नगर्न प्रधानमन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाललाई चेतावनी दिएको छ । बैठकपछि सञ्चारकर्मीहरूसँग प्रवक्ता जगन्नाथ खतिवडाले तत्काल पार्टीले गरेको निर्णय कार्यान्वयन गर्नुपर्ने बताए । 

'मन्त्रिमण्डलमा प्रधानमन्त्री र माओवादी अध्यक्ष प्रचण्डलाई पर्खियौं अब पर्खिने छैनौं । तत्काल हाम्रो काम पूरा गर्नुहोस् । नयाँ मन्त्रीलाई शपथग्रहण गराउने काममा लाग्नुहोस्। पार्टीको निर्णयको कदर गर्नुहोस्,' खतिवडाले भने, 'अब पनि ढिलो भयो भने अपमानको रुपमा सम्झिने छौं । प्रतिरोध गर्नु पर्दैन । हेलचेक्र्याइँ गर्दा वा खेल्न खोज्दा हामीलाई अफ्ठ्यारोमा पार्ने वा लज्जित गर्न खोजेको देखिएको छ ।'

उनले मन्त्रिपरिषद्‍ हेरफेरको विषयमा अपमान गर्न खोजेको अनुभूति भएको पनि बताएका थिए । 'अब ढिलाइ नगर्नुहोस् मात्रै भनेका छौं । ढिलो भयो भने त्यसपछिको कुरा त्यसपछि गरौंला' प्रवक्ता खतिवडाले भने ।

प्रकाशित : असार ११, २०७९ १८:५८
प्रतिक्रिया
पठाउनुहोस्

अमेरिकी राष्ट्रपति बाइडेन र राजदूत खत्रीबीच भेट

नेपालमा एसपीसीको विषय बाहिर आउनुअघि नै उनीहरूबीच भेटवार्ता भएको थियो
कान्तिपुर संवाददाता

काठमाडौँ — प्रधानमन्त्री शेरबहादुर देउवाको अमेरिका भ्रमणको गृहकार्य भइरहेका बेला अमेरिकाका लागि नेपाली राजदूत श्रीधर खत्रीले अमेरिकी राष्ट्रपति जो बाइडेनसँग भेट गरेका छन् । उनीहरुबीच जेठ ३० गते भेट भएको थियो ।

राजदूत खत्रीले अमेरिका गएपछि कोभिड–१९ संक्रमणका कारण भर्चुअल रुपमै राजदूतको ओहदाको प्रमाणपत्र बुझाएका थिए । त्यसबेला व्यक्तिगत रुपमा भेटवार्ता नभएपछि राष्ट्रपति बाइडेनलले भर्चुअल रुपमै ओहदाको प्रमाणपत्र बुझाएका राजदूतहरूसँग व्यक्तिगत भेटवार्ता गर्नका लागि ह्वाइट हाउसमा बोलाएका हुन् ।

यस अवसरमा राजदूत खत्री पनि गएका थिए । भेट सामान्य भएको कारणले गर्दा दूतावासले यसबारे बाहिर जानकारी नल्याएको जनाएको छ । छोटो भेटवार्तामा राष्ट्रपति बाइडेनले नेपालको विषयमा चासो राखेको राजदूत खत्रीले कान्तिपुरलाई बताए । ‘राष्ट्रपतिज्यूले नेपाल र नेपाली आफूलाई मन पर्ने बताउनु भएको थियो,’ राजदूत खत्रीले भने,‘साथै, त्यस अवसरमा दुई मुलुकबीचको द्धीपक्षीय हितको सम्बन्धमा पनि कुराकानी भएको थियो ।'

प्रधानमन्त्री देउवाको अमेरिका भ्रमण असार अन्त्य वा साउनको पहिलो साता हुने भनिए पनि सरकारले औपचारिक रुपमा निर्णय गरिसकेको छैन ।

राजदूत खत्रीले बाइडेनलाई भेट्दा नेपालमा अमेरिकासँगको स्टेट पार्टनरसिप प्रोग्राम (एसपीपी) को सम्बन्धमा नेपालमा कुनै पनि चर्चा भएको थिएन । उक्त भेटपछि मात्र एसपीपीलाई लिएर नेपालमा विवाद भयो । नेपाल सरकारले त्यसलाई अस्वीकार गर्ने निर्णय पनि गरिसकेको छ ।

प्रकाशित : असार ११, २०७९ १८:५०
पूरा पढ्नुहोस्
प्रतिक्रिया
पठाउनुहोस्
x
×