फेरि प्रधानमन्त्री बन्ने दाहालको चाहना- समाचार - कान्तिपुर समाचार

फेरि प्रधानमन्त्री बन्ने दाहालको चाहना

‘एक पटक नेतृत्व गरेर देशलाई नयाँ युगतिर लैजाने सपना छ’
कान्तिपुर संवाददाता

काठमाडौँ — सत्तारुढ नेकपा (माओवादी केन्द्र)का अध्यक्ष पुष्पकमल दाहालले फेरि एक पटक प्रधानमन्त्री हुने चाहना व्यक्त गरेका छन् ।  पूर्वप्रधानमन्त्रीसमेत रहेका अध्यक्ष दाहालले नेपाल पर्वतारोहण संघले आशीर्वाद दिएको प्रसंग उल्लेख गर्दै फेरि एक पटक प्रधानमन्त्री भएर  देशलाई नयाँ युगतिर लैजाने आफ्नो सपना रहेको बताएका हुन् । 

नेपाल पर्वतारोहण संघले शुक्रबार काठमाडौंमा आयोजना गरेको एक कार्यक्रममा बोल्दै उनले परिवर्तन ल्याउन आफूले नेतृत्वदायी भूमिका खेलेको भन्दै देशको नेतृत्व गर्न पाए देशका विद्यमान तमाम विकृतिहरुमाथि निर्मर प्रहार गर्दै अघि बढ्ने बताएका हुन् । अध्यक्ष दाहालले पहिलो पटक प्रधानमन्त्री सपना हो कि विपना हो भन्दाभन्दै गएको र आफ्नो दोस्रो कार्यकाल भने गर्व गर्न लायक रहेको दाबी समेत गरे ।

‘पहिलो चोटि प्रधानमन्त्री हुँदा त मलाई झिलिमिली झिलीमिलीमै गयो । यो सपना हो कि विपना हो भनेर विचार गर्दैगर्दै नौ महिना बिती गयो । एउटा नयाँ परिस्थिति बन्यो । दोस्रो पटक प्रधानमन्त्री हुँदा मैले साँच्चै नै धेरै चिज सुधार गर्ने प्रयास गरेको हुँ । मलाई त्यसमा गर्व छ,’ उनले भने ।

राष्ट्रिय एकता नै खण्डित हुने अवस्थामा मधेसलाई विश्वासमा लिएर चुनाव सम्पन्न गराएको पनि दाहालले बताए । ‘आर्थिक वृद्धिदरलाई २५ वर्षपछि साढे ७ प्रतिशत बनाउने कुरा पनि सानो कुरा थिएन,’ दाहालले भने ।

वामपन्थीहरूको बीचमा एकता गरेर स्थायित्वसहित विकास र सामाजिक न्यायमा आमूल परिवर्तन गर्न खोजे पनि त्यो सफल नभएको उनको भनाइ थियो । फेरि एक पटक देशको नेतृत्व गरेर नयाँ युगमा मुलुकलाई लैजाने आफ्नो सपना रहेको उनले बताए ।

कार्यक्रमलाई सम्बोधन गर्दै उनले भने, ‘तपाईंहरुको आशीर्वाद हो भने अर्को पटक देशको नेतृत्व गर्ने अवसर पाउने हो भने सम्पूर्ण रुपमा देशमा देखा परेका यी तमाम विकृतिहरुमाथि प्रहार गर्दै एउटा नयाँ युगतिर देश लैजानुपर्छ भन्ने सपना त मेरो मनभित्र छ । किनकि मेरै नेतृत्वमा हजारौं नेपालीहरुको बलिदान भएको छ । यो परिवर्तन ल्याउनका निम्ति । यहाँ त्यो कुरा पनि आयो । म नेपाल पर्वतारोहण संघलाई धन्यवाद भन्न चाहन्छु ।’

अध्यक्ष दाहालले मुलुकमा देखिएको आर्थिक संकटलाई टार्नका लागि पर्यटक क्षेत्र एकमात्रै भरपर्दो माध्यम भएको बताए । उनले पर्यटन क्षेत्रमा देखिएको समस्या समाधान गर्नका लागि सरकारसँग पहल गर्ने प्रतिबद्धता व्यक्त गरे ।

प्रकाशित : असार १०, २०७९ १६:२६
प्रतिक्रिया
पठाउनुहोस्

अस्ट्रेलियामा आफ्नै भवन बनाउँदै नेपाली समुदाय

नारायण खड्का

अस्ट्रेलिया — अस्ट्रेलियामा रहेका नेपालीले हरेक राज्यमा नेपाली कलासंस्कृति, पहिचान र परम्परा झल्काउने आफ्नै सामुदायिक भवन निर्माणको काम अघि बढाएका छन् । 


नेपालीको जनसंख्या बढेसँगै आफ्नै पहिचानसहितको भवनको आवश्यकता रहेको भन्दै यहाँका नेपालीले आफ्नै भवन निर्माणका लागि लामो समयदेखि पहल गरिरहेका छन् ।

नेपालीको धेरै जनसंख्या रहेको दोस्रो सहर मेलबर्नमा सामुदायिक भवनका लागि जग्गा र घर खरिद गरिएको छ भने पर्थ, ब्रिसबन लगायत सहरमा जग्गा खोज्ने कार्य जारी रहेको बताइएको छ ।

सिड्नीमा भने स्थानीय काउन्सिलसँग मिलेर नेपाली परम्परा झल्कने फरक किसिमको सामुदायिक भवन सञ्चालन गर्ने तयारी भइरहेको छ । हरेक राज्यमा निर्माण हुने भनिएका सामुदायिक भवनमा मन्दिरहरू, मेडिटेसन सेन्टर, विवाह ब्रतबन्ध लगायत सामाजिक कार्य गर्नका लागि सुविधा हुनेछ भने सबै भवन नेपाली पहिचान झल्कने शैलीमा निर्माण हुनेछन् ।

मेलबर्नमा बन्न लागेको भवनका लागि स्थानीय निकायबाट अनुमति प्राप्त भइसकेको छ । दक्षिण अस्ट्रेलियामा समेत सामुदायिक भवन निर्माणका लागि वर्तमान एनआरएनए राज्य संयोजक रेणुका लामाले यसअघि नै जग्गादान गर्ने घोषणा गरिसकेकी छन् ।

मेलबर्नको सामुदायिक भवन निर्माण समितिका अध्यक्ष राजेश आचार्यले अस्ट्रेलियन नेप्लिज मल्टिकल्चरल सेन्टरलाई पूजा तथा अन्य सम्बन्धित कार्य गर्नका लागि सरकारबाट अनुमति पाइसकेको जानकारी दिए । उनका अनुसार सेन्टरले १५ लाख डलर करिब १२ करोड रुपैयाँमा १५ एकड जग्गा र चारकोठे घर खरिद गरेको छ जसलाई नेपाली सामुदायिक भवनका रुपमा तत्काललाई केही मर्मतसहित उपयोग गरिनेछ ।

उनले सामुदायिक भवनलाई नेपाली शैलीमा अझ विस्तार गर्नका लागि शनिबार सहयोग संकलनका लागि कार्यक्रमसमेत गर्न लागेको जानकारी दिए । उनका अनुसार सम्पूर्ण रुपमा समुदायबाटै संकलन गरिएको रकमबाट निर्माण गर्न लागिएको सामुदायिक भवनले भिक्टोरियाका साथै सम्पूर्ण अस्ट्रेलियामा नेपालीको पहिचान तथा कलासंस्कृतिको जगेर्नामा महत्वपूर्ण भूमिका खेल्ने बताए ।

यसैगरी सिड्नीमा हुने सामुदायिक भवन स्थानीय काउन्सिलको सहकार्यमा काउन्सिलकै एक भवनलाई उपयोग गरेर नेपाली शैलीको बनाइने नेप्लिज अस्ट्रेलियन एसोसिएसनका महासचिव क्रषि आचार्यले जनाए । उक्त संस्थालाई तत्कालीन सरकारले १० लाख डलर सहयोग गर्ने प्रतिबद्धता गरे अनुसार उक्त सहयोग रकम हस्तान्तरणको प्रक्रिया चलिरहेको उनले बताए ।

यस्तै ब्रिसबेनमा समेत भवन निर्माणका लागि संकलन गरेको करिब ४ लाख रुपैयाँ संस्थाको खातामा जम्मा भइसकेको र जग्गा खोज्ने काम भइरहेको निर्माण समितिका अध्यक्ष केशव शर्माले जानकारी दिए । उनले क्युन्सल्याण्ड नेप्लिज कम्युनिटी सेन्टर नाम दिएर निर्माण गरिने सामुदायिक भवनका लागि सम्पूर्ण योजना तयार भइसकेको र जग्गा खरिद प्रक्रियाका लागि लागिपरेको जानकारी दिए । ‘हामीले हामी नेपाली समुदायबीच मात्र नभएर स्थानीय काउन्सिल समक्षसमेत सहयोगका लागि सहकार्य गरिरहेका छौं,’ शर्माले भने ।

पश्चिम अस्ट्रेलियामा पेगोडा शैलीको पशुपतिनाथ मन्दिरका साथै बौद्धनाथ मन्दिरसमेत रहने गरि सामुदायिक भवन निर्माणको तयारी गरिएको छ । नेपाली मन्दिर तथा कम्युनिटी सेन्टरकी अध्यक्ष रोशन शेर्पाले भवन निर्माणका लागि जुटाइएको करिब ७ लाख डलर संस्थामा रहेको र जग्गा खोज्ने काम तीव्र रुपमा भइरहेको सुनाइन् ।

‘हामी नेपालीलाई अझै चिनाउने किसिमको आफ्नै सामुदायिक भवन र मन्दिर निर्माणमा लागिपरेका छौं र जग्गा पाएपछि चाँडै भवन निर्माण गर्नेछौं,’ शेर्पाले भनिन् ।

करिब एक दशकदेखि नेपालीले आफ्नै पहिचानसहितको सामुदायिक भवन निर्माण गर्ने प्रयास गरेको भए पनि अहिलेसम्म सफल भएको थिएन् । तर मेलबर्नमा सञ्चालनको अनुमति पाइसकेकाले अन्य सहरमा समेत चाँडै निर्माण सम्पन्न हुने विश्वास लिइएको छ ।

बहुसांस्कृतिक देशका रुपमा ख्याति कमाएको अस्ट्रेलिया अन्य भाषा, कलासंस्कृति तथा परम्परालाई जगेर्ना गर्नका लागि सरकारले सामुदायिक रुपमा सहयोगसमेत दिने गरेको छ ।

प्रकाशित : असार १०, २०७९ १६:२६
पूरा पढ्नुहोस्
प्रतिक्रिया
पठाउनुहोस्
×