कांग्रेसभित्र पनि नयाँ अनुहारलाई मन्त्री बनाउन माग छ : महामन्त्री थापा- समाचार - कान्तिपुर समाचार
कान्तिपुर वेबसाईट
AdvertisementAdvertisement

कांग्रेसभित्र पनि नयाँ अनुहारलाई मन्त्री बनाउन माग छ : महामन्त्री थापा

कान्तिपुर संवाददाता

काठमाडौँ — नेपाली कांग्रेसका महामन्त्री तथा सांसद गगन थापाले नेपाली कांग्रेसभित्र पनि नयाँ अनुहारलाई मन्त्री बनाउनका लागि माग आइरहेको बताएका छन् । पार्टीमा औपचारिक रूपमा भने मन्त्रिपरिषद् हेरफेरको विषयमा छलफल नभएको उनले बताए ।

फाइल तस्बिर

सोमबार संसद् भवन नयाँ बानेश्वरमा सञ्चारकर्मीहरुलाई संक्षिप्त प्रतिक्रिया दिँदै उनले पार्टीका तर्फबाट मन्त्रिपरिषद्मा हेरफेरको निर्णय प्रधानमन्त्री तथा पार्टीको सभापतिको चाहनामा भर पर्ने बताए ।

‘नेपाली कांग्रेसको कुनै पनि बैठकमा यो विषयका बारेमा कुनै छलफल भएको छैन । यद्यपी पार्टीको केही नयाँ सांसदहरू जसले मन्त्री बनेर काम गर्ने अनुभव गर्न पाउनुभएको छैन । निर्वाचित भएर आउनुभएका केही नयाँ साथीहरुले यत्रो नेपाली कांग्रेसको सरकार हुँदै गर्दाखेरी पनि केही नयाँ साथीहरुले मौका पाएको भए केही नयाँ कुराहरु सिक्ने मौका हुन्थ्यो,’ उनले भने ।

एकल र संयुक्त जुनसुकै सरकार बने पनि एउटै अनुहार मन्त्री बन्ने गरेकाले नयाँ अनुहारले भूमिका खोजेको उनको भनाई छ । ‘नेपाली कांग्रेसमा एकल सरकार बने पनि एउटै अनुहारले मन्त्री हुने । गठबन्धन सरकारमा पनि तिनै मन्त्री हुने यस्तो हुने हो भने त भोलि गएर निर्वाचन जित्दै गर्दाखेरी पनि मन्त्री को हुने भन्ने बारेमा अहिले अनुमान लगाउन सकियो, केही नयाँ साथी आउलान् । नयाँ काम गर्लान्,’ उनले भने ।

अहिलेसम्म औपचारिक रूपमा छलफल नभएको उल्लेख गर्दै थापाले सभापति आफै संसदीय दलका नेता भएकोले गर्दा मन्त्री परिवर्तन गर्ने नगर्ने उनकै निर्णयमा निर्भर हुने बताए । ‘खासगरीकन नयाँ, अहिलेसम्म मन्त्री नहुनुभएका केही साथीहरूलाई आफ्नो काम देखाउने मौका पाउनुपर्छ भन्ने व्यापक रूपमा माग छ । त्यसलाई त्यहाँ पुर्‍याउने काम हुन्छ । थोरै समय भएकोले गर्दा गर्ने कि नगर्ने भन्नेकुरा धेरै हदसम्म चाहिँ दलको नेता भएकोले गर्दा उहाँले के चाहनुहुन्छ भन्ने कुरामा भर पर्छ,’ उनले भने ।

नेकपा एकीकृत समाजवादीले अहिलेका मन्त्रीलाई फिर्ता बोलाएर नयाँ पठाउने निर्णय गरेपछि मन्त्रिपरिषद् हेरफेरको चर्चा चुलिएको हो । एकीकृत समाजवादीले निर्णय गरे पनि तत्काल मन्त्रीहरू हेरफेर गर्दा गठबन्धनमै धक्का पुग्न सक्ने भन्दै प्रधानमन्त्री शेरबहादुर देउवा भने त्यसमा अनिच्छुक देखिएका छन् । सोमबार सत्तारुढ गठबन्धनको बैठकमा तत्काल मन्त्री हेरफेर नगर्ने सहमतिसमेत बनेको छ ।

प्रकाशित : जेष्ठ २३, २०७९ १७:१२
प्रतिक्रिया
पठाउनुहोस्

लक्ष्मी बैंकले ल्यायो ८ प्रतिशत ब्याजदरको ग्रीन बचत खाता 

कान्तिपुर संवाददाता

काठमाडौँ — ५० औं विश्व वातावरण दिवसको अवसर पारेर लक्ष्मी बैंकले ग्रीन सेभिङ खाता पुन: सञ्चालनमा ल्याएको छ । अनलाइनमार्फत खाता खोल्ने सेवा, भिडियोमार्फत केवाईसी अपडेट र डिजिटल बैंकिङ्ग जस्ता सेवाहरुको सम्मिश्रण यो खातामा छ । यो खातामा ग्राहकले ८.०३ प्रतिशतको उच्चतम ब्याजदर पाउने बैंकले जनाएको छ । ग्रीन बैंकिङ्ग प्याकेजमा मोबाइल मनी र इन्टरनेट बैंकिङ्ग ग्राहकले निशुल्क पाउने छन् । 

‘एक खाता, एक रुख’को प्रतिबद्धता अनुरुप प्रत्येक ग्रीन सेभिङ खातावापत बैंकले एउटा रुख रोप्ने छ । यसका साथै ग्रीन सेभिङ खाताबाट संकलन हुने निक्षेप नवीकरणीय ऊर्जा, यातायात, दिगो खाद्य, कृषि, वन, फोहोर व्यवस्थापन र हरितगृह ग्यास न्यूनीकरण लगायत दिगो विकास लक्ष्यहरू अन्तर्गत पर्ने क्षेत्र र गतिविधिमा कर्जा प्रवाह गर्न उपयोग गरिने बैंकले जनाएको छ ।

यो पहलमार्फत लक्ष्मी बैंकले आफ्नो 'ओरेन्ज लभ्स ग्रीन' को दिगो प्रतिबद्धतालाई निरन्तरता दिने छ । यसै प्रतिबद्धता अन्तर्गत बैंक पीसीएएफ (कार्बन एकाउन्टिङ फाइनान्सियलका लागि पार्टनरसिप) मा पनि सामेल भएको छ । सो साझेदारी मार्फत बैंकले औपचारिक रूपमा आफ्नो कार्बन उत्सर्जन मापन गर्ने र राष्ट्रिय प्रतिबद्धतासँग मिल्दोजुल्दो लक्ष्य र नीतिहरू अपनाउने छ, जसले बैंकको नेट–जिरो यात्रा अघि बढ्ने छ ।


प्रकाशित : जेष्ठ २३, २०७९ १६:५७
पूरा पढ्नुहोस्
प्रतिक्रिया
पठाउनुहोस्
×