कार्यालय विस्तारका लागि माओवादीले सदस्यबाट न्यूनतम १०० रुपैयाँ उठाउने

माओवादी केन्द्रका अध्यक्ष पुष्पकमल दाहालको निवास खुमलटारमा बसेको केन्द्रीय कार्यालयको विस्तारित बैठकले पार्टी सदस्यबाट न्यूनतम १०० रुपैयाँ उठाउने र सक्नेले त्योभन्दा बढी पनि दिन सक्ने निर्णय गरेको नेता शक्ति बस्नेतले जानकारी दिए ।

केन्द्रीय कार्यालय पेरिसडाँमा संरचना निर्माण र व्यवस्थित गर्नका लागि प्रदेश कमिटीहरूलाई १ महिनाभित्र रकम उठाइसक्न भनिएको उनले बताए ।

त्यस्तै विद्यार्थी संगठन अनेरास्ववियु (क्रान्तिकारी)को विवाद मिलाउने जिम्मा अध्यक्ष दाहाललाई दिइएको पनि बस्नेतले बताए । महासचिवलगायत पदाधिकारी चयनको विषयमा माओवादीको विद्यार्थी संगठन क्रान्तिकारीमा विवाद छ । दाहालले दुवै पक्षलाई बोलाएर विवाद समाधान गर्ने बस्नेतको भनाइ थियो ।