'दक्षिण एसियाली मुलुकहरुमा थुप्रै संकट'- समाचार - कान्तिपुर समाचार

'दक्षिण एसियाली मुलुकहरुमा थुप्रै संकट'

श्रीलंकामा आर्थिक, अफगानिस्तानमा राजनीतिक, बंगलादेशमा शरणार्थी तथा भारत र पाकिस्तानमा धार्मिक अतिवादको संकट
कान्तिपुर संवाददाता

काठमाडौँ — गरिबी उन्मूलनका लागि दक्षिण एसिया मञ्च (सापे) ले दक्षिण एसियाली मुलुकहरुमा व्यापक संकट रहेको निचोड निकालेको छ । काठमाडौंमा आयोजित तीनदिने भेलापछि दक्षिण एसियाका प्रतिनिधिहरुले दक्षिण एसियाका मुलुकहरुमा थुप्रै समस्या रहेको बताएका हुन् ।

दक्षिण एसियाका प्रतिनिधिहरुले श्रीलंकामा राजपाक्ष परिवारको गलत कामको कारण आर्थिक संकट, अफगानिस्तानमा तालिबानको राजनीतिक नेतृत्वको कारण जनताको मौलिक अधिकारमै संकट, बंगलादेशमा म्यान्मारबाट लखेटिएका रोहिंग्या शरणार्थीको संकट तथा भारत र पाकिस्तानमा धार्मिक अतिवादको संकट रहेको औंल्याएका थिए।

काठमाडौंमा भएको छैटौं वार्षिक सभा तथा जनसार्क बैठकमा यस क्षेत्रका सामाजिक अभियान्ता, अधिकारकर्मी तथा विज्ञहरुले यस क्षेत्रमा बढ्दै गएको आर्थिक, राजनीतिक र सामाजिक संकट तथा कोभिड महामारीपछिको आर्थिक पुनरुत्थानका विषयहरुमा गम्भीर बन्न सरोकारवालाहरुको ध्यानाकर्षण गएका हुन् ।

छलफलमा भारतका बाबु माथ्यु, जाकीया सोमन, बाबु पी रमेश, नीता, शोभा रघुराम, बंगलादेशका सहनाज सुमि, मनोहवर मुस्तफा, श्रीलंकाका लोगेश्वरी पुनि, नलिनी रतनराज, नेपालका हरि शर्मा, शुशील प्याकुरेल, नेत्र तिम्सिना, शर्मिला कार्की, उद्धव प्याकुरेल, कनकमणि दीक्षित, अर्जुन कार्की, बिमला राई पौडेल, भुटानका गोविन्द रिजाल, पाकिस्तानका फारुक तारिकले दक्षिण एसियाको समग्र अवस्था र नयाँ सामाजिक आन्दोलन र जनसंघर्षबारे आफ्नो धारणा राखेका थिए ।

तीनदिने छलफलपछि १५ बुँदे काठमाडौं घोषणापत्र समेत जारी गरिएको छ । उनीहरुले दक्षिण एसियाको समस्या समाधान गर्न सार्क मुलुकहरु मिल्नु पर्ने पनि सुझाव दिएका छन् । यस्तै भारत र पाकिस्तानले द्वन्द्व गर्न नहुने तथा अफगानिस्तान र श्रीलंकाको संकटलाई सबै मिलेर सम्बोधन गर्नुपर्ने उनीहरूको सुझाव थियो । दक्षिण एसियाली मुलुकहरु बीचमा बन्द सीमालाई खुला गर्नुपर्ने पनि उनीहरुको माग थियो ।

प्रकाशित : जेष्ठ १३, २०७९ २२:०१
प्रतिक्रिया
पठाउनुहोस्

राजदूत खत्री र अमेरिकी रक्षा उपसहायक मन्त्री फोर्डबीच भेटवार्ता

कान्तिपुर संवाददाता

काठमाडौँ — नेपालमा प्रधानमन्त्री शेरबहादुर देउवा र प्रधानसेनापति प्रभुराम शर्माको अमेरिका भ्रमणको गृहकार्य भइरहेको बेला वासिङ्टन डीसीमा भने अमेरिकाका लागि नेपाली राजदूत श्रीधर खत्रीले त्यसको पूर्वतयारी स्वरुप अमेरिकी रक्षा उपसहायक मन्त्री लिन्डसे फोर्डसँग भेटवार्ता गरेका छन् ।


उनीहरुबीच बुधबार वासिङ्टन डीसीस्थित पेन्टागनमा भएको भेटमा नेपाल र अमेरिकाबीच द्धीपक्षीय सम्बन्ध र रक्षा सहाकार्यको विषयमा छलफल भएको हो ।

उपसहायक मन्त्री फोर्डले रक्षा मन्त्रालयको दक्षिण र दक्षिण पूर्व एसिया हेर्छिन् । उनीसँगको भेटवार्तामा नेपाली सेना र अमेरिकी सेनाबीच रक्षा सहाकार्य तथा संलग्नताका सम्बन्धमा छलफल भएको नेपाली दूतावासले जनाएको छ ।

दुई मुलुकबीच कुटनीतिक सम्बन्धको ७५ वर्षको उपलक्ष्यमा नेपाल र अमेरिका दुवै मुलुकहरुबाट उच्चस्तरमा भ्रमण हुने गरी गृहकार्य भइरहेको छ । जसअन्तर्गत नेपालबाट प्रधानमन्त्री र प्रधानसनोपतिको अमेरिका भ्रमण हुन लागेको हो ।

प्रकाशित : जेष्ठ १३, २०७९ २१:५०
पूरा पढ्नुहोस्
प्रतिक्रिया
पठाउनुहोस्
×