माग पूरा भए सरकारमा सहभागी हुन्छौँ : लोसपा

केन्द्रीय कार्यकारिणी समितिको बैठकलगत्तै लोसपाका नेताहरू प्रधानमन्त्री निवास बालुवाटार पुगेका थिए । बबरमहलस्थित पार्टी कार्यालयमा उनीहरूले स्थानीय तह निर्वाचनको तयारी, पार्टीको गतिविधि, सरकारमा सहभागिताजस्ता विषयमा छलफल गरेका थिए । प्रधानमन्त्री देउवासँग अपराह्न साढे ५ बजे लोसपाका अध्यक्ष महन्थ ठाकुर, वरिष्ठ नेता राजेन्द्र महतो, शरतसिंह भण्डारी, नेताहरू अनिल झा र सर्वेन्द्रनाथ शुक्लाले भेटेका हुन् ।

लोसपाका वरिष्ठ नेता भण्डारीले प्रधानमन्त्री देउवासँग करिब ४५ मिनेट भएको छलफलपछि आफूहरू सरकारसँग सहकार्य गर्न सकारात्मक भएको बताए । उनले स्थानीय तह, प्रदेश र संघको चुनावमा कांग्रेससँग तालमेल हुन सक्ने पनि बताए । ‘प्रधानमन्त्री देउवा धेरै हदसम्म हामीसँग सहकार्य गर्न तयार हुनुहुन्छ,’ उनले भने, ‘लोसपा पनि सकारात्मक छ ।’ उनले नागरिकतासम्बन्धी समस्या, मुद्दा फिर्ताजस्ता विषय सम्बोधनमा प्रधानमन्त्रीबाट सकारात्मक प्रतिक्रिया आएको पनि भण्डारीले बताए । कांग्रेस र लोसपाबीच लामो समयसम्म सहकार्य गर्ने तयारी रहेको भण्डारीको भनाइ छ । स्थानीय तहको चुनावदेखि संघ र प्रदेशको चुनावसम्म तालमेल गर्ने कुरा भएको छ । आवश्यकताअनुसार सहकार्य गर्न सक्ने भनेका छौं,’ उनले भने ।

बुधबारको केन्द्रीय कार्यकारिणी समिति बैठकमा १० सदस्यले धारणा राखेका थिए । बैठकमा स्थानीय तहको निर्वाचनमा उम्मेदवार छनोट प्रक्रिया, पार्टीको विधान परिमार्जन, संगठन विस्तारजस्ता विषयमा छलफल भएको केन्द्रीय कार्यकारिणी सदस्य केशव झाले बताए । बैठक अझै दुई दिनसम्म लम्बिन सक्ने उनले बताए ।