कांग्रेसले लखेट्न खोजे एमालेसँग तालमेल नहोला भन्न सकिन्न : दाहाल- समाचार - कान्तिपुर समाचार

कांग्रेसले लखेट्न खोजे एमालेसँग तालमेल नहोला भन्न सकिन्न : दाहाल

देशैभर तालमेलको सम्भावना नभएकाले एक्लै चुनाव लड्ने तयारी गर्न कार्यकर्तालाई निर्देशन
घनश्याम गौतम

रूपन्देही — नेकपा माओवादी केन्द्रका अध्यक्ष पुष्पकमल दाहालले स्थानीय तहको निर्वाचनमा एमालेसँग तालमेल हुन सक्ने संकेत गरेका छन् । गठबन्धनका हिसाबले तत्काल तालमेलका लागि छलफल नभएपनि कांग्रेसले लखेट्न खोजेको अवस्थामा एमालेसँग पनि ढोका बन्द नभएको उनले बताएका हुन् ।

लुम्बिनी प्रदेशको प्रदेशस्तरीय निर्वाचन केन्द्रित प्रशिक्षणलाई सम्बोधन गर्न बिहीबार बुटवल आएका दाहालले प्रेस सेन्टरले आयोजना गरेको पत्रकार सम्मेलनमा बोल्दै राजनीति सम्भावनाको खेल भएकाले दुवै सम्भावना उत्तिकै रहेको बताएका हुन् ।

‘एमालेसँग तत्काल कुनै छलफल भएको त छैन,’ उनले भने, ‘तर, कांग्रेसमा पनि केही अतिवादी नेताहरु छन्, उनीहरुकै कारण कांग्रेसले लखेट्नै खोज्यो भने त के हुन्छ भन्न सकिँदैन । राजनीतिमा असम्भव केही हुँदैन ।’ उनले देशभरका कार्यकर्तालाई आफ्नै शक्ति र आफ्नै एजेन्डामा तालमेलबिना नै निर्वाचन लड्न र जित्ने गरी तयार हुन निर्देशन दिएका छन् । गठबन्धनकाबीच तालमेल भइहाले पनि दशैभर नहुने र स्थानीय आवश्यकताका आधारमा मात्र हुने भएकाले आफ्नो संगठनलाई बलियो बनाउने, आर्थिक र राजनीतिक एजेन्डा लिएर जनतामा जाने र आफ्नै तागतमा उत्साहका साथ निर्वाचनमा होमिन पनि उनले कार्यकर्तालाई निर्देशन दिए । तालमेलको विषयमा कांग्रेस र गठबन्धन दलका मुख्य नेतृत्वमा कुनै विमति नभएपनि केही नेताहरुमा अतिवादी प्रवृत्ति देखिएको उनले बताए ।

एमसीसीको विषयमा देश र गठबन्धन दुवै संकटमा परेकाले आफूहरुको टोली देशलाई निकास दिन आग्रह गर्दै एमाले अध्यक्ष केपी शर्मा ओलीलाई भेट्न पुगेको तर, ओलीमा देशप्रतिको चिन्ता नदेखिएर पुरानो कुन्ठा मात्र प्रकट भएपछि केही विषय परिमार्जन गर्दै संविधानको अंग बनाएर एमसीसी पास गर्न माओवादी सहमत भएको दाबी गरेका छन् । उनले एमसीसीमा देखिएको समस्या र संशय टरेको भएपनि अझै प्रतिगमनको खतरा रहेको दाबी गरे । त्यही खतराले गठबन्धन बलियो बनाउनु पर्ने र निर्वाचनपछि पनि गठबन्धन बनाएरै अघि बढ्नु पर्ने अवस्था रहेको गठबन्धनका नेतृत्वबीच सहमति भएको उनले बताए ।

प्रकाशित : चैत्र ३, २०७८ १२:०९
प्रतिक्रिया
पठाउनुहोस्

वनजंगलमा डढेलो महिनौंसम्म

आनन्द गौतम

ताप्लेजुङ — गत फागुन २६ को बिहानदेखि कञ्चनजंघा संरक्षण क्षेत्रको अम्जिलेसामा लागेको डढेलो अझै नियन्त्रणमा आएको छैन । फक्ताङलुङ–६ लेलेपको बस्तीमा चार घर मात्रै थिए । तीमध्येको एउटा जलिसकेको छ । तीन वटा घर भने जोगिएका छन् । स्थानीय फुपु शेर्पाका अनुसार बिहीबार सुरु भएको डढेलो जंगलतिर फैलिएको छ । 

‘कहिलेकाहीँ मत्थर हुन्छ, फेरि फैलिइहाल्छ,’ उनले भनिन्, ‘पानी नपरी निभ्ने सम्भावना पनि देख्तिन म ।’ स्थानीयले सेउलाले निभाएको आगो फेरि जाग्ने गरेको उनले सुनाइन् । ‘हावा चलेपछि फैलिइहाल्दोरहेछ,’ उनले टेलिफोनमा भनिन्, ‘एक ठाउँको आगो अर्को ठाउँ पुगेर पनि बलेको पाइयो ।’

मिक्वाखोला–१ खोक्लिङ कात्तिके सातपाखा सामुदायिक वनमा फागुन २९ देखि लागेको आगो पनि निभेको छैन । राति टाढाबाट पनि देखिने डढेलो दिउँसो जमिन तात्तिँदा ह्वारह्वारी दन्किने गर्छ । सामुदायिक वनका अध्यक्ष श्रीप्रसाद घिमिरेका अनुसार मानवीय बस्तीबाट अग्निरेखा कोरेर जंगलतिर केन्द्रित गर्ने र निभाउने प्रयास भइरहेको छ । तलबाट माथितिर दन्किँदा नियन्त्रणमा लिन पनि कठिन भएको उनले सुनाए ।

अम्जिलेसा र सातपाखा मात्रै नभएर जिल्लाभरि नै डढेलो लागेको छ । जताततै लागेको डढेलोले आकाश पनि धूवाँमय देखिन्छ । डिभिजन वन कार्यालयका सहायक वन अधिकृत ललितकुमार यादव खोक्लिङबाहेकको डढेलोबारे कार्यालयमा जानकारी नआएको बताउँछन् । ‘कञ्चनजंघा संरक्षण क्षेत्रमा लागेको डढेलोको जानकारी हामीकहाँ आउँदैन,’ उनले भने, ‘त्यो बाहिरको जानकारी खासै आएको छैन ।’ कार्यालयको तथ्यांकअनुसार गत वर्ष पाथीभरा क्षेत्रको सिम्बु र सुनपाती सामुदायिक वनमा १ सय १६ हेक्टर क्षेत्रफलमा डढेलो लागेको थियो । योबाहेक पाथीभरा याङवरकको त्रिवेणी र खैरेनी सामुदायिक वनमा ४४ हेक्टरमा आगलागी भएको थियो ।

जानीजानी ६० र अञ्जानमा ४० प्रतिशतले आगो लगाउने गरेको यादव बताउँछन् । ‘घाँसका लागि पनि लगाउँछन्,’ उनले भने, ‘सिकार खेल्ने, चोरी निकासी गर्ने र कसैले केही अपराध गरेको भए यसलाई लुकाउनका लागि पनि डढेलो लगाउने गरेको पाइयो ।’ गत वर्ष पाथीभरामा भएको आगलागीको पनि खास कारण अहिलेसम्म नखुलेको उनले बताए । बाली लगाउने यो समयमा खेतबारी खनजोत गर्नुअघि झ्यास जलाउने क्रममा पनि आगलागी हुन्छ ।

प्रकाशित : चैत्र ३, २०७८ १२:०७
पूरा पढ्नुहोस्
प्रतिक्रिया
पठाउनुहोस्
×