लोसपाको चुनावी गठबन्धन कुन दलसँग ?- समाचार - कान्तिपुर समाचार

लोसपाको चुनावी गठबन्धन कुन दलसँग ?

राष्ट्रिय सभा चुनावका लागि मधेसमा एमालेसँग गठबन्धन बनाए पनि अन्य चुनावमा के गर्ने भन्नेमा अनिर्णीत
मधु शाही

काठमाडौँ — प्रधानमन्त्रीमा शेरबहादुर देउवालाई समर्थन गरेको लोकतान्त्रिक समाजवादी पार्टी (लोसपा) ले राष्ट्रिय सभा चुनावका लागि भने मधेस प्रदेशमा एमालेसँग गठबन्धन बनाएको छ । अन्य चुनावमा कुन दलसँग मिलेर जाने वा एक्लै उत्रने भन्ने निर्णय भने लोसपाले गरेको छैन ।

कम्तीमा मधेस प्रदेशको अन्य चुनावी परिणाममा प्रभाव पार्ने हैसियत राख्ने हुनाले लोसपाले बनाउन सक्ने गठबन्धनबारे अन्य दलले पनि चासो राखिरहेका छन् ।

लोसपाका एक कार्यकारिणी सदस्यका अनुसार सत्ता गठबन्धन यही अवस्थामा नरहे चुनावी सहकार्यका लागि पहिलो रोजाइ कांग्रेस हुनेछ । सत्ता गठबन्धन कायमै रहे एमालेसँग गठबन्धन बन्न सक्छ । एक्लै चुनावी मैदानमा उत्रिने सम्भावना रहेको पनि ती नेताले बताए । ‘अहिलेको सत्ता गठबन्धन धेरै समय टिक्दैन, फुट्यो भने लोसपा र कांग्रेसको सहकार्य हुने प्रबल सम्भावना छ,’ उनले भने ।

कार्यकारिणी सदस्य केशव झाले भने एक्लै चुनावी मैदानमा होमिने कि गठबन्धन बनाउने भन्ने विषयमा पार्टीभित्र छलफल नभएको बताए । ‘अहिले नै तय भएको छैन,’ उनले भने, ‘समयले जस्तो माग गर्छ, त्यसैअनुसार अघि बढ्छौं ।’ अर्का कार्यकारिणी सदस्य उमाकान्त झाले पनि अहिले गठबन्धनबारे केही नसोचेको बताए ।

‘चुनावका विषयमा सरकारले निर्णय गरेकै छैन, चुनाव आएपछि परिस्थितिअनुसार निर्णय हुन्छ,’ उनले भने । जनता समाजवादी पार्टीबाट फुटेर नयाँ पार्टी लोसपा बनेको ६ महिना भइसकेको छ । राष्ट्रिय जनता पार्टी र समाजवादी पार्टी मिलेर २०७७ वैशाख १० मा जसपा गठन गरिएको थियो । त्यति बेला समाजवादी पार्टीका तर्फबाट बाबुराम भट्टराई, उपेन्द्र यादव, अशोक राई, राजेन्द्र श्रेष्ठ र राजपाबाट महन्थ ठाकुर, राजेन्द्र महतो, महेन्द्र राय यादव, शरदसिंह भण्डारीले हस्ताक्षर गरी पार्टी एकता गरेका थिए ।

पहिचानमा आधारित संघीयता, सहभागितामूलक समावेशी लोकतन्त्र, बहुराष्ट्रिय राज्य सुहाउँदो समाजवाद, सामाजिक न्याय, सुशासन, समृद्धि र बहुसांस्कृतिक राष्ट्रवाद विकास गर्न नयाँ ढंगको लोकतान्त्रिक राजनीतिक शक्ति निर्माण गर्नु आवश्यक रहेको सहमतिपत्रमा उल्लेख थियो ।

जसपामा रहदा महन्थ ठाकुर र उपेन्द्र यादवको संयुक्त नेतृत्वमा पार्टी सञ्चालन गरिएको थियो । तर नेतृत्वमा रहेका दुवै नेताबीचको मनमुटावका कारण एकता साढे १४ महिनाभन्दा अघि बढ्न सकेन । गत असार २२ मा पार्टी फुट्यो । त्यसपछि ठाकुरको नेतृत्वमा निर्वाचन आयोगमा गत भदौ ९ मा लोसपा दर्ता भयो । पार्टीका एक नेताले यादव र ठाकुरबीच पुरानो तिक्तता रहेकाले पार्टी फुटेको बताए ।

केपी शर्मा ओलीको नेतृत्वमा सरकार रहेका बेला ठाकुर पक्ष सत्ता टिकाउने पक्षमा उभियो भने यादव पक्ष ओलीको बहिर्गमनका लागि आन्दोलनमा थियो । त्यति बेला एकअर्कालाई पार्टी हितविपरीत काम गरेको भन्दै स्पष्टीकरण सोध्ने र निष्कासन गर्ने गतिविधि भएका थिए ।

प्रकाशित : माघ ७, २०७८ ११:२६
प्रतिक्रिया
पठाउनुहोस्

घानामा ट्रकसँग मोटरसाइकल ठोक्किँदा विस्फोट‚ १७ को मृत्यु

कान्तिपुर संवाददाता

काठमाडौँ — घानाको पश्चिमी क्षेत्रमा रहेको बोगोसो र बादीको बीचमा विस्फोटक पदार्थ बोकेको ट्रक मोटरसाइकलसँग ठोक्किँदा भएको विस्फोटमा परी १७ जनाको मृत्यु भएको छ । 

चिरानो सुन खानीतर्फ जाँदै गरेको ट्रकसँग मोटरसाइकल विस्फोट भएको हो । घानाका राष्ट्रपति नाना अड्ओ डन्क्वा आकुफो अड्डोले यो घटनालाई ‘अत्यन्तै दुःखद घटना’को संज्ञा दिएका छन् ।

विस्फोटमा परी ५९ जना घाइते भएका छन् । त्यहाँको प्रहरीले विस्फोटको बारेमा प्रारम्भिक अनुसन्धान सुरु भइसकेको जनाएको छ ।

‘विस्फोट भएको क्षेत्र वरिपरि रहेका स्थानीयलाई उक्त क्षेत्रबाट अन्यत्र जानका लागि आग्रह गरिसकिएको छ‚’ प्रहरीलाई उद्धृत गर्दै अन्तर्राष्ट्रिय समाचार संस्था अलजजिराले उल्लेख गरेको छ ।

विस्फोटमा परी ५ सय भवनहरू ध्वस्त भएको राष्ट्रिय प्रकोप व्यवस्थापन संगठन (एनएडीएमओ)का उपमहानिर्देशक सेजी साजी अमेडोनुले बताएका छन् ।

प्रकाशित : माघ ७, २०७८ ११:२५
पूरा पढ्नुहोस्
प्रतिक्रिया
पठाउनुहोस्
×