मलेसिया रोजगारी : जनवरी २८ देखि प्लान्टेसनमा श्रमिक लैजाने प्रक्रिया सुरु- समाचार - कान्तिपुर समाचार
कान्तिपुर वेबसाईट
AdvertisementAdvertisement

मलेसिया रोजगारी : जनवरी २८ देखि प्लान्टेसनमा श्रमिक लैजाने प्रक्रिया सुरु

उत्पादन, सुरक्षा र सेवा क्षेत्रमा भने फेब्रुअरी १५ बाट सुरु
७ दिन क्वारेटाइन बस्नुपर्ने, प्रस्थान हुनुअघि पीसीआर परीक्षणको रिपोर्ट हुनुपर्ने, शुल्क रोजगारदाताले नै बेहोर्ने
होम कार्की

काठमाडौँ — मलेसियाले नेपालसहित स्रोत देशबाट श्रमिक भर्ना गर्ने प्रक्रिया जनवरी २८ र फेबु्रअरी १५ बाट सुरु गर्ने भएको छ । मलेसियाले २०७६ को चैतको पहिलो सातादेखि नेपालसहित स्रोत देशबाट श्रमिक भर्ना गरेको छैन ।

मलेसियाको मानव संशाधन मन्त्रालयले शनिबार जारी गरेको विज्ञप्तिअनुसार जनवरी २८ बाट ‘प्लानटेसन’ (पाम आयल) क्षेत्रमा ३० हजार जनालाई भर्ना गर्ने प्रक्रिया सुरु गर्न लागिएको हो । यसको लागि श्रमिक भर्ना गर्ने रोजगारदाता कम्पनीले अनलाइनमार्फत आवेदन दिनुपर्नेछ । उत्पादन, सेवा, सुरक्षा र घरेलु श्रमिकका लागि भने फेब्रुअरी १५ बाट सुरु हुनेछ ।

मलेसियाले श्रमिक ल्याउन सबै मापदण्ड तय गर्नुका साथै क्वारेन्टाइन बनाएपछि स्रोत देशबाट श्रमिक ल्याउन अनुमति दिन थालिएको हो । अब रोजगारदाताले श्रमिक भर्ना गर्न गृह र मानव संशाधन मन्त्रालयबाट विशेष अनुमति लिन जरुरी नभएको मानव संशाधनमन्त्री शेरी एम शाराभानाद्वारा जारी विज्ञप्तिमा उल्लेख छ । ‘विदेशबाट श्रमिक ल्याउनका लागि कलाङ भ्यालीमा १० हजार जना अट्ने क्षमताको क्वारेन्टाइनको व्यवस्था मिलाइएको छ,’ विज्ञप्तिमा भनिएको छ ।

मन्त्रालयले श्रमिक ल्याउने सबै रोजगारदाताले गुणस्तरीय मापदण्ड (एसओपी)लाई मान्नुपर्ने जनाएको छ । मलेसियाले गत डिसेम्बरमा विदेशी श्रमिक ल्याउनको लागि विशेष मापदण्ड बनाएको छ ।

‘जुन–जुन क्षेत्रमा श्रमिकको अभाव छ । त्यो क्षेत्रमा श्रमिक लैजाने हो । नेपालबाट सुरक्षा गार्डमा पनि जान पाइनेछ,’ नेपालका लागि मलेसियाका कार्यवाहक राजदूत मोहम्मद फाजिल अवु हशनले भने,‘सबै क्षेत्रमा जाने श्रमिकका लागि एसओपी लागू हुन्छ ।’

एसओपीअनुसार मलेसिया आउने श्रमिकले नेपालमा विश्व स्वास्थ्य संगठन (डब्लूएचओ) द्वारा मान्यताप्राप्त कोरोना खोप लगाइसकेको हुनुपर्नेछ । मलेसिया प्रस्थान हुनुभन्दा ७२ घण्टाभित्र श्रमिकले ‘आरटी–पीसीआर’ परीक्षण गरेको हुनुपर्नेछ । मलेसिया पुगेपछि ७ दिन अनिवार्य स्वास्थ्य मन्त्रालयबाट तोकिएको क्वारेन्टाइनमा बस्नुपर्नेछ । क्वारेन्टाइनमा राखिएको दोस्रो र पाँचौ दिनमा आरटी पीसीआर गरिनेछ । कोरोनाबाट संक्रमण भएमा निजी क्वारेन्टाइन तथा न्यून जोखिम उपचार सेन्टर (पीकेआरसी)मा राखिनेछ भने गम्भीर भएमा निजी अस्पतालमा पठाइनेछ । यसको सबै खर्च रोजगारदाताले नै बेहोर्नुपर्ने कार्यवाहक राजदूत हशनले बताए ।

डेढ वर्षदेखि मलेसियाले नेपाली श्रमिक नलगेपछि मलेसियामा कार्यरत नेपालीको संख्या दिनहुँ घटिरहेको छ । नेपाली दूतावासका अनुसार हाल मलेसियामा झन्डै १ लाख ६० हजार नेपाली छन् । कोरोनाअघि मलेसियामा झन्डै चार लाख नेपाली कार्यरत थिए ।

प्रकाशित : माघ १, २०७८ १४:०५
प्रतिक्रिया
पठाउनुहोस्

अफगानिस्तानमा सहयोग सामग्री पठाउँदै नेपाल

आइतबार परराष्ट्र मन्त्रालयको टोली सहयोग सामग्री लिएर काबुल जाँदै
कान्तिपुर संवाददाता

काठमाडौँ — ठूलो मानवीय संकटको सामना गरिरहेको अफगानिस्तानलाई नेपाल सरकारले सहयोग सामग्री पठाउने भएको छ । आइतबार परराष्ट्र मन्त्रालयको नेतृत्वमा एउटा टोली मानवीय सहायता सामग्रीसहित काबुल जाने भएको छ ।

गत अगस्टमा तालिबानले सत्ता कब्जा गरेसँगै अफगानिस्तानमा विश्वकै सबैभन्दा ठूलो मानवीय संकट उत्पन्न भएको रिपोर्टहरू सार्वजनिक भएको छ । तालिबान सत्तामा आएसँगै अन्तर्राष्ट्रिय सहयोग रोकिएकाले अफगानिस्तानमा मानवीय संकट उत्पन्न भएको हो ।

आइतबार राति औषधि, लत्ताकपडा र अन्य सामग्रीसहित टोली अफगानिस्तानको काबुल जाने परराष्ट्र मन्त्रालयकी प्रवक्ता सेवा लम्सालले जानकारी दिइन् । नेपाली टोली काबुल अन्तराष्ट्रिय विमानस्थलमै राष्ट्रसंघीय टोलीलाई सामग्री हस्तान्तरण गरेर फकर्ने उनले बताइन् ।

अफगानिस्तानलाई के–के सामग्री सहयोगस्वरूप उपलब्ध गराइँदै छ भन्ने कुरा आइतबार बिहान ७:४५ बजे परराष्ट्रमन्त्री नारायण खड्काले पत्रकार सम्मेलनमार्फत जानकारी दिने प्रवक्ता लम्सालले जानकारी दिइन् ।

संयुक्त राष्ट्र संघको विश्व खाद्य कार्यक्रम(डब्लूएफपी)ले यो हिउँदमा अफगानिस्तानमा भोकमरीको ठूलो समस्या देखिने बताएको छ । २ करोड भन्दा बढी जनसंख्याले भोकमरीको समस्या भोग्नुपर्ने पनि डब्लूएफपीको चेतावनी छ ।

त्यस्तै ५ वर्षमुनिका झन्डै ३२ लाख बालबालिका कुपोषणको सिकार हुनसक्ने बताइएको छ । वर्तमान खाद्य संकटलाई सम्बोधन गर्नका लागि प्रतिमहिना २२० मिलियन अमेरिकी डलर चाहिने पनि डब्लूएफपीले जनाएको छ । तत्काल पर्याप्त खाद्यान्न र औषधोपचार नपाउने हो भने करिब १० लाख बालबालिकाको मृत्यु हुन सक्ने डब्लूएफपीको चेतावनी छ ।

प्रकाशित : माघ १, २०७८ १३:४२
पूरा पढ्नुहोस्
प्रतिक्रिया
पठाउनुहोस्
x
×