विश्वमै पहिलो पटक मानिसमा सुँगुरको मुटु प्रत्यारोपण- समाचार - कान्तिपुर समाचार
कान्तिपुर वेबसाईट
AdvertisementAdvertisement

विश्वमै पहिलो पटक मानिसमा सुँगुरको मुटु प्रत्यारोपण

कान्तिपुर संवाददाता

काठमाडौँ — विश्वमै पहिलो पटक मानव शरीरमा सुँगुरको मुटु प्रत्यारोपण गरिएको छ । अमेरिकाको बाल्टिमोरमा एक अमेरिकी नागरिकमा आनुवंशिक रूपमा परिवर्तन गरिएको सुँगुरको मुटु प्रत्यारोपण गरिएको हो ।

समाचार संस्था रोयटर्सका अनुसार सात घण्टा लामो शल्यक्रियापछि ५७ वर्षीय डेभिड बेनेटमा मुटुको प्रत्यारोपण सफल भएको हो । शल्यक्रियामा युनिभर्सिटी अफ मेरिल्यान्ड मेडिसिनको टिम संलग्न थियो ।

शल्यक्रियामा संलग्न चिकित्सकहरूले बेनेटको स्वास्थ्य अवस्थामा सुधार आइरहेको बताएका छन् । बेनेटको जीवन बचाउन यो नै अन्तिम विकल्प रहेको बताइएको थियो । सुँगुरको मुटु प्रत्यारोपणपछि उनको आयु कति लम्बिन्छ भन्ने यकिन भएको छैन ।

शल्यक्रियाअघि बेनेटले भनेका थिए, 'गर वा मरको अवस्थामा प्रत्यारोपण गर्न लागेको हुँ । म बाँच्न चाहन्छु । यो एउटा अँध्यारोमा हानिएको गोलीजस्तै हो । मसँग अरु विकल्प छैन ।' मेरिल्यान्ड युनिभर्सिटीले शल्यक्रियाका लागि अमेरिकी नियामक निकाय खाद्य तथा औषधि प्रशासन(एफडीए) सँग आकस्मिक अनुमति लिएको थियो ।

शल्यक्रियामा संलग्न चिकित्सक डाक्टर ब्राट्ली ग्रिफिथले चिकित्सा विज्ञानमा अभूतपूर्व सफलता प्राप्त भएको बताएका छन् । उनले भनेका छन्, 'यो अभूतपूर्व शल्यक्रिया हो । यसले मानव अंग प्रत्यारोपणमा देखिएको संकट समाधान हुन सक्छ ।' निकै सावधानीपूर्वक शल्यक्रिया सम्पन्न भएको र यसले भविष्यमा बिरामीको आयु लम्ब्याउन सहयोग पुग्ने पनि उनको भनाइ छ । अहिले पनि १ लाख १० हजारको हाराहारीमा अमेरिकामा अंग प्रत्यारोपणको पर्खाइमा रहेका छन् ।

अर्ग्यानडोनर डट जीओभीका अनुसार अमेरिकामा बर्सेनि ६ हजारभन्दा बढी अंग प्रत्यारोपणको पर्खाइमा रहेका व्यक्तिको मृत्यु हुने गर्छ । बेनेटमा भर्जिनियास्थित रिजेनेरेटिभ मेडिसिन कम्पनी रेभिभिकोरले आनुवंशिक रूपमा परिवर्तन गरिएको सुँगुरको मुटु उपलब्ध गराएको हो । चिकित्सकहरूका अनुसार सुँगुरको मुटु र मानिसको मुटुमा धेरै समानता हुनाले प्रत्यारोपण सफल भएको हो ।

सुँगुरका अन्य अंगहरू मिर्गौला, कलेजो र फोक्सो पनि मानिसमा प्रत्यारोपण गर्न सकिने/नसकिनेबारे अनुसन्धान भइरहेको छ । यसअघि आनुवंशिक भिन्नताका कारण सुँगुरको मुटु प्रत्यारोपण सफल भएको थियो । यस पटक भने वैज्ञानिकहरूले हानिकारक जिनहरू सम्पादन गरेर हटाएका थिए । त्यसपछि मात्रै प्रत्यारोपण सफल भएको बताइएको छ ।

तस्बिरहरू : रोयटर्स/युनिभर्सिटी अफ मेरिल्यान्ड मेडिसिन

प्रकाशित : पुस २७, २०७८ १०:४९
प्रतिक्रिया
पठाउनुहोस्

बागलुङमा २७ केजी गाँजासहित युवक पक्राउ

प्रकाश बराल

बागलुङ — बोरामा लुकाएर बिक्रीका लागि हिँडेको अबवस्थामा २७ केजी गाँजासहित प्रहरीले एक जनालाई पक्राउ गरेको छ ।

सोमबार बेलुकी जिल्ला प्रहरीको टोलीले गलकोट नगरपालिका–५को एक रेस्टुरेन्टमा खाजा खान लागेको अवस्थामा उक्त परिणामको गाँजासहित युवक पक्राउ गरेको हो । पक्राउ पर्नेमा बडिगाड गाउँपालिका–८ खोलाखर्कका २७ वर्षीय प्रकाश पाइजा रहेको जिल्ला प्रहरीका सूचना अधिकारी इकवाल हवारीले जानकारी दिए ।

विशेष सुराकीको आधारमा प्रहरीको सादा पोसाकको टोली उक्त रेस्टुुरेन्टमा पुगेको थियो । उनको साथमा प्लास्टिकमा बेरेर बोरामा हालेको अवस्थाको गाँजा भेटिएको हो । गाँजासहित पक्राउ गरेर पाइजालाई प्रहरी हिरासतमा राखिएको छ । इलाका प्रहरी कार्यालय गलकोटले घटनाको अनुसन्धान गरिरहेको हवारीले जानकारी दिए ।

प्रकाशित : पुस २७, २०७८ १०:४६
पूरा पढ्नुहोस्
प्रतिक्रिया
पठाउनुहोस्
x
×