कांग्रेस महाधिवेशनले जनतामा पुन: आशाको सन्देश दिन सक्नुपर्छ : थापा [अवधारणा पत्रको पूर्णपाठ]

थापाले लोकतन्त्र, संघीयता, संविधान, गणतन्त्र, समावेशीतालगायतका उपलब्धि र व्यवस्थामाथि उब्जेका संशयमाझ नेपाली राजनीतिको आगामी यात्रा असहज रहेको उल्लेख गरेका छन् । आमजनतामा राजनीतिक दल र समस्त प्रणालीप्रति नै वितृष्णा र आक्रोश रहेको भन्दै थापाले यो परिस्थितिमा विकसित भइरहेको चुनौतीपूर्ण घटनाक्रमलाई सही अवतरण नगर्ने हो भने पार्टी र देश दुवैको यात्रा अप्ठेरो रहेको पनि बताएका छन् ।

कांग्रेस महाधिवेशनले पार्टीको वैचारिक र सांगठनिक पुनर्जागरण र रुपान्तरणमार्फत जनतामा पुन: आशाको सन्देश दिन सक्नुपर्नेमा उनको जोड छ । थापाले १४ औं महाधिवेशन कांग्रेसजनलाई अवसर भन्दै यसको सदुपयोग गरेर सैद्धान्तिक र सांगठनिक पार्टीको रुपान्तरण गर्न रचनात्मक हस्तक्षेपका लागि पनि आह्वान गरेका छन् ।