राप्रपा महाधिवेशनमा दाहाल, नेपाललगायतका नेता उपस्थित- समाचार - कान्तिपुर समाचार
कान्तिपुर वेबसाईट
AdvertisementAdvertisement

राप्रपा महाधिवेशनमा दाहाल, नेपाललगायतका नेता उपस्थित

कान्तिपुर संवाददाता

काठमाडौँ — नेकपा माओवादी केन्द्रका अध्यक्ष पुष्पकमल दाहाललगायतका नेताहरू राष्ट्रिय प्रजातन्त्र पार्टीको महाधिवेशनमा भने सहभागी भएका छन् ।

दाहाल नेकपा एमालेको महाधिवेशनमा भने गएका थिएनन् । काठमाडौंमा भृकुटीमण्डपमा जारी राप्रपाको एकता महाधिवेशनको जारी उद्घाटन समारोहमा दाहालसहित विभिन्न दलका नेताहरुको सहभागिता भएका छन् ।

राप्रपा महाधिवेशनमा दाहालसहित नेकपा एकीकृत समाजवादी पार्टीका अध्यक्ष माधवकुमार नेपाल, नेकपा मालेका महासचिव सीपी मैनालीलगायतका नेता पनि उपस्थित छन् । त्यस्तै महाधिवेशन उद्घाटन समारोहमा प्रधानमन्त्री तथा नेपाली कांग्रेसका सभापति शेरबहादुर देउवा पनि उपस्थित हुने राप्रपाले जनाएको छ । एमालेले एकीकृत समाजवादीलाई भने निमन्त्रणा गरेको थिएन ।

गत शुक्रबार एमालेको १० औं राष्ट्रिय महाधिवेशनको उद्घाटन समारोहमा पनि दाहाललाई अतिथिको रुपमा आमन्त्रण गरिएको थियो । दाहालकै गृह जिल्ला चितवनमा भएको महाधिवेशनमा माओवादी केन्द्रको तर्फबाट स्थायी कमिटीका सदस्यमा लिलामणि पोखरेल सहभागी भएका छन् ।

राप्रपाको महाधिवेशनमा १५ देखि १७ गतेसम्म राजधानीमा चल्ने छ । जसमा कमल थापा र राजेन्द्र लिङदेन अध्यक्षमा प्रतिस्पर्धा गर्दैछन् ।

प्रकाशित : मंसिर १५, २०७८ १३:३४
प्रतिक्रिया
पठाउनुहोस्

अवैध मोबाइल भित्रिने क्रम नरोकिए धर्नामा बस्ने व्यवसायीको चेतावनी

कान्तिपुर संवाददाता

काठमाडौँ — व्यवसायीले अवैध मोबाइल भित्रिने क्रम नरोकिए धर्नामा बस्ने चेतावनी दिएका छन् । बुधबार मोबाइल वितरक संघको दोस्रो महाधिवेशनमा उनीहरुले मोबाइल डिभाइस म्यानेजमेन्ट सिस्टम (एमडीएमएस) तुरुन्त कार्यान्वयनमा ल्याउन अर्थमन्त्री जनार्दन शर्मासँग आग्रह गरे ।

साउन १ बाटै लागू गरिने भनिएको एमडीएमएस प्रणाली अझै पूर्ण रूपमा लागू हुन सकेको छैन । यसले गर्दा अवैध मोबाइल फोनको बिक्री वितरण बढिरहेको व्यवसायीहरू बताउँछन् ।

‘अब पनि एमडीएमएस लागू भएन भने हामी दूरसञ्चार प्राधिकरणको गेटमा धर्नामा बस्नुको विकल्प हुँदैन,’ मोबाइल फोन आयातकर्ता संघका उपाध्यक्ष सञ्जय अग्रवालले भने, ‘आश्वासन मात्रै धेरै आइसक्यो । यही महिनाभित्र लागू गर्नुपर्छ ।’ कार्यक्रममा अर्थमन्त्री जनार्दन शर्माले एमडीएमएस तुरुन्तै कार्यान्वयनमा ल्याउने आश्वासन दिए ।

‘मलाई यसबारे व्यवसायीहरूले हिजोमात्रै भन्नुभयो,’ मन्त्री शर्माले भने, ‘यो तत्काल लागू गर्न निर्देशन दिइसकेको छु यो समस्या समाधान हुन्छ ।’ शर्माले एमडीएमएसका विरुद्ध कोही पनि नलागेको र कसैले आफूलाई रोक्न नखोजेको स्पष्ट पारे ।प्राधिकरणका निर्देशक मीनप्रसाद अर्यालले केही महिनाको अन्तरालमै एमडीएमएस लागू हुने प्रतिबद्धता व्यक्त गरे ।

उनका अनुसार आव २०७७/७८ मा करिब ३७ अर्ब रुपैयाँ बराबरको ७० लाख हाराहारीका मोबाइल सेट आयात भएको थियो । त्यसबाट करिब ६ अर्ब राजश्व संकलन भएको अर्यालले बताए । नेपाल भित्रिनेमध्ये २५ देखि ३० प्रतिशत मोबाइल फोन अवैध रूपमा आउने गरेको अनुमान छ ।

(तीन महिनामै सवा १७ अर्बको मोबाइल भित्रियो)


प्रकाशित : मंसिर १५, २०७८ १३:३१
पूरा पढ्नुहोस्
प्रतिक्रिया
पठाउनुहोस्
×