अमेरिका हिँडेका रुकुमेली युवाको घानामा मृत्यु- समाचार - कान्तिपुर समाचार

अमेरिका हिँडेका रुकुमेली युवाको घानामा मृत्यु

‘दलाललाई ४० लाख रुपैयाँ बुझाइएको थियो’
कान्तिपुर संवाददाता

काठमाडौँ — चिनजानका एजेन्टलाई ४० लाख रुपैयाँभन्दा बढी रकम बुझाएर अज्ञात बाटोबाट अमेरिका हिँडेका रुकुम, मुसीकोटका २८ वर्षे रूपक बोहराको अफ्रिकी मुलुक घानाको राजधानी अक्रास्थित रिज अस्पतालमा मृत्यु भएको छ ।

१० दिनअघि सियरा लियोनको फ्रिटाउनबाट अक्रा पुगेका बोहरालाई मलेरियाले ग्रस्त बनाएको अवस्थामा इमिरेट्स एयरलाइन्सले अक्रा एयरपोर्टको ट्रान्जिटमा अलपत्र छाडिदिएको थियो । बोहराको गम्भीर स्वास्थ्य स्थितिका बारेमा जानकारी पाएपछि घानास्थित भारतीय उच्चायुक्त, गैरआवासीय भारतीय तथा नेपाली समुदायले उनको उपचारमा सहयोग गर्दै आएका थिए ।

दक्षिण अफ्रिकास्थित नेपाली चिकित्सक एवं गैरआवासीय नेपाली संघ (एनआरएनए) का स्वास्थ्य संयोजक डा.सरिता पाण्डे भट्टराईले दिएको जानकारीअनुसार शनिबार अपराह्न रूपकको निधन भएको अस्पतालले सूचना दिएको छ । रिज अस्पतालका सम्बद्ध चिकित्सकसँग नियमित परामर्शमा रहँदै आएकी डा. भट्टराईले यो घटनाबारे एनआरएनए मुख्यालयलाई समेत अवगत गराएकी छन् ।

घानामा महँगो उपचार खेप्दै सहयोगको पुकारा गरिरहेका बोहरालाई दैनिक चार सय डलरभन्दा बढी खर्च लाग्ने भएकाले रकमको जोहो गर्न घानास्थित एनआरएनए लागिपरेको थियो । हाल नाइजेरियामा रहेका गैरआवासीय नेपालीका अभियन्ता हिक्मत थापाले असुरक्षित आप्रवासन र मानव तस्करीको फन्दामा परेका बोहराको जीवनरक्षा तथा घरफिर्तीका लागि अन्तर्राष्ट्रिय आप्रवासन संगठन (आईओएम) लाई आग्रह गर्ने तदारुकता राखेका थिए । बोहराको उपचारका लागि एनआरएनए अफ्रिकाको राहत कोषले १ हजार डलर सहयोग रकम पठाएको कोषका सञ्चालक कुल कार्कीले केन्याबाट जानकारी दिए ।

‘सबै ऋणपान र घरजग्गा धितो राखेर छोराको भलाइका लागि अमेरिका जाने भन्दै दलाललाई पैसा बुझाएका थियौं,’ रुकुमको बाँकेकोट गाउँपालिका–३ का वडा सदस्यसमेत रहेका बोहराका बाबु देवबहादुरले कान्तिपुरसँग फोनमा भने, ‘यही हाम्रै गाउँठाउँबाट पनि दलाललाई पैसा ख्वाएर थुप्रै जना अमेरिका पुगिसकेका छन् । त्यही भरमा परेर आफूले पनि चिनजानका एजेन्टले भनेअनुसार पैसा पठाउँदै आएको थिएँ ।’

उनका अनुसार तिरेको पैसामध्ये ३१ लाख रुपैयाँ आफूले बुझेको भनेर हाल नेपालगन्जमा रहेका सहायक एजेन्ट मनोज महतराले सरकारी वकिलसमक्ष कागज गरिसकेका छन् । ‘मैले पनि रूपक घानामा पुगेर अलपत्र भएको थाहा पाएको छु, उनलाई घर फर्काउने प्रयत्न भइरहेको छ,’ नेपालगन्जमा शुक्रबार दिउँसो सम्पर्कमा आएका एजेन्ट महतराले कान्तिपुरसँग फोनमा भनेका थिए, ‘अमेरिका पठाउने भनेर लागिपर्ने रुकुमकै नीराजन बस्नेत अहिले दुबईमा हुनुहुन्छ । रूपक भाइको उद्धारका लागि लाग्नेछौं ।’

रूपकका बुबा देवबहादुरलाई आफ्नो छोरा के, कताबाट र कुन हवाई बिन्दुबाट घाना पुग्यो भन्ने जानकारी छैन । ‘छोरालाई अमेरिका पठाउन उठाएको ऋणका कारण यता उठीबास लाग्ने स्थिति छ,’ उनले भने । तर अमेरिका पठाउने भन्दै गाउँ पसेर युवालाई सपना देखाउने एजेन्टहरू सम्पर्कमै रहे पनि तिनलाई पक्राउ गर्न र आवश्यक कारबाही गर्न कहीं, कतैबाट कुनै पहल नभइरहेको उनले बताए । तीन महिनाअघि अमेरिका जान भनी घरबाट हिँडेका रूपकका घरमा नाबालक दुई छोराछोरी र श्रीमती छन् । अस्पतालको बेडबाट धेरै कुरा बोल्न नसक्ने र घरै फर्कने इच्छामात्रै जनाइरहेका रूपकले बितेको अवधि दलालको घेरामा कहाँ, कसरी समय बिताए भन्न सकिरहेका थिएनन् ।

प्रकाशित : मंसिर ११, २०७८ २१:२१
प्रतिक्रिया
पठाउनुहोस्

डडेलधुरा विवादले कांग्रेसमा भाँडभैलो, निर्वाचन समिति संयोजकले फेरि दिए राजीनामा

कान्तिपुर संवाददाता

काठमाडौँ — नेपाली कांग्रेसको १४ औं महाधिवेशनअन्तर्गत ३५ जिल्लाको अधिवेशन सकिएको छ । अन्य जिल्लामा अधिवेशन जारी छ । केन्द्रीय महाधिवेशनका लागि अब १३ दिन मात्रै छ ।


तर, क्रियाशील सदस्यताको विवाद समाधान गरी महाधिवेशनमा होमिँदा विभिन्न जिल्लाको अधिवेशन विवादास्पद बनिरहेको छ । त्यहीमध्येको एक हो डडेलधुरा । सभापति एवं प्रधानमन्त्री शेरबहादुर देउवाको गृहजिल्ला डडेलधुरामा देउवा पक्षले एकलौटी रुपमा अधिवेशन गरेको भन्दै जिल्ला सभापति कर्णबहादुर मल्लसहित नेता कार्यकर्ता केन्द्रीय कार्यालयमा ११ दिनदेखि रिले अनशनमा बसेका छन् ।

तर, उनीहरूको मागबारे अहिलेसम्म कुनै सुनुवाई भएको छैन । बरु जिल्ला सभापति मल्लसहित बहुमत सदस्यको अनुपस्थितिमा देउवा पक्षले जिल्ला अधिवेशन नै सम्पन्न गरिसकेको छ । अधिवेशनले सभापति देउवा, उनकी पत्नी आरजु राणासहितलाई केन्द्रीय महाधिवेशन प्रतिनिधिसमेत चयन गरिसकेको छ ।

सभापति देउवाले जिल्ला सभापति मल्लसहितका कार्यकर्तालाई सम्बोधन गर्ने प्रयाससमेत गरेका छैनन् । सदस्यताकै विवादका कारण सर्लाहीको वडा अधिवेशन शनिबारसम्म पनि हुन सकेको छैन । डडेलधुरासहित विभिन्न जिल्लामा देखिएका विवादबारे केन्द्रीय निर्वाचन समितिसमेत अनिर्णित छ । डडेलधुराका विषयमा आन्दोलनरत पक्षसँग केही दिनअघि भनाभन भएपछि केन्द्रीय निर्वाचन समितिका संयोजक महादेवप्रसाद यादवले पुनः पदबाट राजीनामा दिएका छन् । उनी त्यो दिनदेखि कार्यालय समेत गएका छैनन् ।

खासगरी डडेलधुराको विवादास्पद अधिवेशनबारे निर्णय गर्न नसकिएको निर्वाचन समितिका एक सदस्यले बताए । ‘हामी निरन्तर छलफलमै छौं । एक ढंगले त्यहाँ अधिवेशन भइसकेको छ । फेरि अर्को ढंगले हेर्ने हो भने त्यहाँ अधिवेशन सुरु नै भएको छैन, हामी छलफल गरिरहेका छौं, तर निचोडमा पुग्न सकिरहेका छैनौं,’ ती सदस्यले भने, ‘हामीबाट त्रुटि भयो । राजनीतिक नेतृत्वबाट पनि त्रुटि भयो । अब त्यसबारे निर्वाचन समितिले पनि निर्णय गर्न नसकेको अवस्था छ ।’

ती सदस्यले निर्वाचन समितिका संयोजक यादव केही दिनदेखि काममा नआएको पुष्टि गरे । ‘अहिले हाम्रा लागि पलपल किम्ति समय हो । तर, उहाँ कार्यालय आउनुभएको छैन । त्यसकारण पनि कतिपय निर्णय हामीले गर्न सकेका छैनौं,’ ती सदस्यले भने, ‘अब विवादका विषयमा निर्वाचन समितिको बहुमतको हिसावले निर्णय गर्नुपर्ने अवस्था बनिरहेको छ ।’

स्रोतका अनुसार निर्वाचन समिति संयोजक यादवले जिल्लाका नेताहरूको दबाबलाई थेग्न नसकेर पदबाटै राजीनामा दिएका छन् । उनले यसअघि पनि राजीनामा दिएका थिए । तर, उनको राजीनामा स्वीकृत भएको थिएन ।

‘उहाँले तनाव लिएर जिम्मेवारी निभाउन चाहनुभएको छैन । सहज अवस्थामा महाधिवेशन सम्पन्न गर्न सकिने अवस्था पनि छैन, विवाद आइरहेका छन्,’ उनीनिकट एक अधिवक्ता भन्छन्, ‘त्यसैले उहाँले जिम्मेवारीबाट मुक्त हुन खोजिरहनुभएको छ ।’ सभापति देउवाले नै यादवलाई निर्वाचनको काम पूरा गरिदिन आग्रह गर्दै आएका छन् । यादव यसअघि कांग्रेसकै सरकार भएका बेला महान्यायधिवक्ता समेत भएका थिए ।

उनको राजीनामा स्वीकृत गर्ने वा नयाँ नियुक्तिको प्रक्रिया अघि बढाउने भन्नेबारे कांग्रेसमा छलफल भएको छैन । कांग्रेसले यादवको संयोजकत्वमा पाँच सदस्यीय निर्वाचन समिति बनाएको थियो । अधिवक्ताहरू गोपालकृष्ण घिमिरे, खम्मबहादुर खाती, सीताराम केसी र एगराज पोखरेल समितिका सदस्य थिए । तर, देउवाले खातीलाई महान्यायधिवक्ता बनाएपछि उनको ठाउँमा तेजबहादुर रावल नियुक्त भएका थिए । समितिको सचिवका रुपमा केशव रिजाल र जगन्नाथ श्रेष्ठले काम गरिरहेका छन् ।

प्रकाशित : मंसिर ११, २०७८ २१:१२
पूरा पढ्नुहोस्
प्रतिक्रिया
पठाउनुहोस्
×