नेपाल संवत्‌मा ओलीको सन्देश- ‘समृद्धि अभियानका अवरोधकलाई परास्त गरौं’- समाचार - कान्तिपुर समाचार
कान्तिपुर वेबसाईट
AdvertisementAdvertisement

नेपाल संवत्‌मा ओलीको सन्देश- ‘समृद्धि अभियानका अवरोधकलाई परास्त गरौं’

कान्तिपुर संवाददाता

काठमाडौँ — पूर्वप्रधानमन्त्री एवं एमालेका अध्यक्ष केपी शर्मा ओलीले आफू नेतृत्वको सरकारले सुरु गरेको राष्ट्रको समृद्धिको अभियानमा अवरोध पुर्‍याएकाले त्यसलाई परास्त गर्न आग्रह गरेका छन् । नेपाल संवत् ११४२ को अवसरमा शुक्रबार शुभकामना सन्देश जारी गर्दै ओलीले त्यस्तो आग्रह गरेका हुन् ।

तस्बिर : हेमन्त श्रेष्ठ/कान्तिपुर

‘पूर्ववर्ती सरकारले जननिर्मित संविधानको संस्थागत कार्यान्वयनमार्फत मुलुकलाई विकास र समृद्धिको दिशामा अग्रसर गराएको थियो । हामीले नयाँ संविधानअनुरुपका संरचनागत, भौतिक पूर्वाधार र मानवीय विकासका क्षेत्रमा मुलुकलाई नवनिर्माणको चरणमा प्रवेश गराएका थियौं’, अध्यक्ष ओलीको सन्देशमा छ, ‘राष्ट्रको समृद्धिको यस अभियानमा गरिएका विभिन्न खाले अवरोधलाई सचेततापूर्वक परास्त गर्दै राष्ट्रको समृद्धि र जनताको सुख प्राप्तिका लागि एकताबद्ध हुन म सम्पूर्ण दिदीबहिनी तथा दाजुभाइहरुमा हार्दिक आह्वान गर्दछु । यसै एकतामार्फत हामी समृद्ध नेपाल, सुखी नेपालीको राष्ट्रिय आकांक्षा पूरा गर्न समर्थ हुनेछौं भन्ने विश्वास दिलाउन चाहन्छु ।’

उनले बहुजातीय, बहुसांस्कृतिक, बहुधार्मिक विशेषतायुक्त नेपाली समाज सुदृढ राष्ट्रिय एकताको जगमा उभिएको उल्लेख गरेका छन् । ‘यहाँका विविधतायुक्त मौलिक परम्परा सिंगो राष्ट्रका साझा पूँजीका रुपमा अङ्कित छन् । एकताको यस राष्ट्रिय पूँजीलाई हामीले मुलुक निर्माणको आधारस्तम्भका रुपमा आत्मसात गरेका छौं’, उनले भनेका छन्, ‘हाम्रा सांस्कृतिक विविधतालाई विग्रह र द्वन्द्वको अवसरका रुपमा दुरुपयोग गर्न बेलाबेला भएका दुष्प्रयासहरुलाई पनि हामीले आपसी एकताद्वारा पराजित गर्दै राष्ट्रिय एकता, स्वाधीनता, स्वतन्त्रता र राष्ट्रिय अखण्डताको रक्षा गर्दै आएका छौं ।’

उनले नेपाल सम्वत्‌का प्रवर्तक शंखधर साख्वा: को पनि स्मरण गरेका छन् । ‘ऋणमा डुबेर दासत्वको जीवन बिताइरहेका सर्वसाधारणहरूलाई शंखधर साख्वा:ले ऋणबाट मुक्त बनाई स्वतन्त्रता दिलाउनु भएको दिनलाई प्राचीनकालदेखि नेपाल संवत्का रुपमा मनाइँदै आएको छ । नेपाल संवत् ११४२ को यस सुखद् अवसरमा काठमाडौं उपत्यकामा तत्कालीन समाज सुधारका नेतृत्वकर्ता तथा नेपाल संवत्‌का प्रवर्तक शंखधर साख्वा:को विशेष स्मरण गर्न चाहन्छु ।’

प्रकाशित : कार्तिक १९, २०७८ १५:३१
प्रतिक्रिया
पठाउनुहोस्

पाल्पामा फस्टायो व्यावसायिक फूल खेती

माधव अर्याल

पाल्पा — पहाडी जिल्ला पाल्पामा व्यावसायिक फूलखेती फस्टाएको छ । पहिलो पटक व्यावसायिक फूल खेती गरेका रामपुर नगरपालिका–४, देवीस्थानका दिलबहादुर थापा र माथागढी गाउँपालिका–२, रुप्सेका दामोदर घर्तीले पहिलोपटक व्यावसायिक फूल खेती गरेका हुन् । त्यसपछि बल्ल पाल्पाका विभिन्न स्थानमा फूलखेती सुरु भएको हो । यतिबेला पाल्पाका दर्जन बढी फूल व्यवसायीको बारीमा ढकमक्क फूल फूलेको छ ।

बारीमा लगाएका फूलले यसवर्ष बजार पनि पाएको छ । अघिल्लो वर्ष दसैं र तिहारमा भन्दा यसवर्ष व्यापार पनि तेब्बर नै हुने अपेक्षा फूल व्यवसायीको छ । रामपुरका व्यवसायी दिलबहादुरले यतिबेला बिक्रीका लागि भ्याईनभ्याई भएको बताए । फूल टिप्ने, माला गास्ने र बजारमा लैजान हतार हुने गरेको छ । अघिल्लो वर्षभन्दा यसवर्ष मालाको भाउ पनि बढेको छ ।

कम्तीमा सय रुपैयाँमा मालाको बिक्री गर्दै आएका छन् । भारतबाट आउने मालासँग प्रतिस्पर्धा गर्न भने व्यवसायीलाई मुस्किल परेको छ । बुटवलको बजारमा भारतबाट सहजै माला आउँछ । दसैंपछि तिहार सुरु भएसँगै फूलले बजार पाउन थालेको छ । ‘पाल्पाको माग बुटवल, कैलाली, नेपालगञ्जबाट आएको छ,’ रामपुर नगरपालिका–४ देवीस्थानका दिल बहादुर थापाले भने, ‘ढुवानीका हिसाब गर्दा नाफा भन्दा घाटा हुन्छ कि भन्ने समस्या छ ।’

स्थानीय बजारमा पनि फूलको राम्रो बिक्री हुने माथागढी गाउँपालिका–३, रुप्सेका घर्तिले बताए । उनका अनुसार बुटवलमा भारतको मालाका कारण सस्तोमा बिक्री गर्नुपर्ने अवस्था छ । ‘सोचे जस्तो बजार सहज रहेनछ,’ उनले भने । तर धेरै पानी पर्दा फूललाई असर गरेको छ । केही समय पानी नपर्ने समस्या थियो । बेमौसमी वर्षाले फूललाई भने राम्रो गरेको उनले बताए । पाल्पामा मौसमी मात्र होइन, बेमौसममासमेत फूल खेती गरेका छन् ।‘गुणस्तरीय फूल उत्पादन गरेर के गर्नु,’ उनले भने, ‘भारतबाट आउने मालासँग प्रतिस्पर्धा गर्न समस्या रहेछ ।’

रामपुर, तानसेन, माथागढी, माथागढी, बगनासकालीमा व्यवसायिक फूल खेतीले सफलता पाएको छ । सयपत्री र मखमली फूलको व्यवसायिक खेती भएपनि बजारको सुनिश्चितता भने नभएको तानसेन, काजीपौवामा फूल खेती गर्ने प्रतिक्षा सिंजालीले बताइन् । बजारमा सस्तोमा फूल र माला दिनुपर्दा लागत समेत नउठ्ने उनले बताइन् ।

फूल राम्ररी फक्रन नपाउँदै फूल र मालाको माग आउने गर्छ । कृषि ज्ञान केन्द्र, स्थानीय तहले ध्यान दिनुपर्ने फूल खेती गर्ने व्यवसायीको माग छ । उनीहरु आफ्नै ज्ञानले नै खेती गर्दै आएका छन् । तिनाउको दोभानमा पनि फूल खेती गरेका छन् । प्राविधिक ज्ञानको अभावले पनि सही ढंगले खेती गर्न नसकिएको हो । तानसेनमा संयुक्त राष्ट्र्रसंघीय विकास कार्यक्रम, तानसेन नगरपालिका, ग्रामीण आर्थिक विकास संघले महिलालाई फूल खेतीका लागि तालिम दिएको थियो । केही महिला प्रदेशले सञ्चालन गरेको तालिममा पनि गएका हुन् ।

पहाडी जिल्लामा पनि व्यवसायिक फूल खेती गरेर स्वरोजगार बनाउन सके फूलमा आत्मनिर्भर हुन सहयोग पुग्ने विश्वास तालिम प्रदान गर्ने संस्था ग्रामीण आर्थिक विकास संघ रेडाका कार्यकारी निर्देशक लीलाबहादुर कार्कीले बताए ।

प्रकाशित : कार्तिक १९, २०७८ १३:५१
पूरा पढ्नुहोस्
प्रतिक्रिया
पठाउनुहोस्
x
×