बाढीपहिरो र डुबानमा परी हालसम्म १०१ जनाको मृत्यु, ४० जना घाइते [अपडेट]- समाचार - कान्तिपुर समाचार

बाढीपहिरो र डुबानमा परी हालसम्म १०१ जनाको मृत्यु, ४० जना घाइते [अपडेट]

कान्तिपुर संवाददाता

काठमाडौँ — अविरल वर्षाको कारण सोमबारदेखि देशका विभिन्न स्थानमा आएको बाढीपहिरो र डुबानमा परी बिहीबार दिउँसोसम्म १ सय १ जनाको मृत्यु भएको छ । बाढी पहिरोमा परी प्रदेश १ मा ६०, वाग्मती प्रदेशमा १, कर्णाली प्रदेशमा ७ र सुदूरपश्चिम प्रदेशमा ३१ जना गरी जम्मा १ सय १ जनाको मृत्यु भएको प्रहरीले जनाएको छ । 

प्रदेश १ मा १९, कर्णाली प्रदेशमा ४ र सुदूरपश्चिम प्रदेशमा १७ जना गरी जम्मा ४० जना घाइते भएका छन् । घाइतेहरूलाई उपचारका लागि स्थानीय अस्पताल लगिएको छ । बाढीपहिरोमा परी प्रदेश १ मा १३, प्रदेश २ मा १, लुम्बिनी प्रदेशमा ३ जना, कर्णाली प्रदेशमा १ जना र सुदूरपश्चिम प्रदेशमा २३ जना गरी जम्मा ४१ जना बेपत्ता भएका छन् । बेपत्ताको खोजी कार्य जारी छ ।

बाढीको कारण जम्मा २ हजार २ सय ३२ वटा घर डुबानमा परेका छन् । ४९ वटा घर, ८ वटा गोठ, ६ वटा पुल र ३ वटा सरकारी कार्यालयमा क्षति पुगेको छ । १ सय ३९ वटा पशुचौपायाको मृत्यु भएको छ । उक्त अवधिमा विपद्‍का घटनाबाट १ हजार १ सय ७७ वटा घर परिवार विस्थापित भएका छन् । साथै बाढी पहिरोको जोखिममा रहेका विभिन्न जिल्लाका विभिन्न घर परिवारलाई सुरक्षित स्थानमा राख्ने, पहिरोमा पुरिएका धनमाल निकालेर सुरक्षा गर्ने कामसमेत विभिन्न निकाय र स्थानीयवासीको समन्वय र सहयोगमा प्रहरीले गर्नुका साथै विभिन्न स्थानमा भएको बाटो अवरोधसमेत प्रहरीले हटाउने कार्य गरिरहेको छ ।


प्रकाशित : कार्तिक ४, २०७८ १७:३१
प्रतिक्रिया
पठाउनुहोस्

विश्वासको मतको प्रक्रियालाई धेरै नलम्ब्याऔं : बानियाँ

कान्तिपुर संवाददाता

काठमाडौँ — कांग्रेसको वाग्मती प्रदेश संसदीय दलका नेता इन्द्रबहादुर बानियाँले मुख्यमन्त्रीले विश्वासको मत लिने प्रक्रियालाई नलम्ब्याउन आग्रह गरेका छन् ।

‘यो प्रक्रियालाई धेरै नलम्ब्याऔं । अब मुख्यमन्त्रीले विश्वासको मत पाउने अवस्था छैन । हाम्रो गठबन्धनमा बहुमत जुटिसकेको छ,’ प्रदेशसभाको बैठकमा बोल्दै उनले भने, ‘सबैभन्दा राम्रो मार्गप्रशस्त गरिदिनुभएको भए राम्रो हुन्थ्यो । नभए पनि यो विश्वासको मत लिने प्रक्रियालाई धेरै नलम्ब्याऔं ।’ उनले बैठकमा बोल्दै अधिक समय संघीय सरकारको बचाउ गरे । ‘अघिल्लो सरकारले विधि र व्यवस्था मिच्नका लागि अध्यादेश ल्यायो । अहिलेको सरकारले त्यो मिचिएको संविधानलाई ट्र्याकमा ल्याउनका लागि अध्यादेश ल्याएको हो, गठबन्धन सरकारले संविधान मिच्दैन, मिच्न दिँदैन,’ उनले भने ।

प्रकाशित : कार्तिक ४, २०७८ १७:२५
पूरा पढ्नुहोस्
प्रतिक्रिया
पठाउनुहोस्
×