सरकारमा महत्त्वपूर्ण साथी छुटे, आगामी दिनमा समेटिनेछन् : प्रधानमन्त्री देउवा- समाचार - कान्तिपुर समाचार

सरकारमा महत्त्वपूर्ण साथी छुटे, आगामी दिनमा समेटिनेछन् : प्रधानमन्त्री देउवा

कान्तिपुर संवाददाता

काठमाडौँ — कांग्रेस सभापतिसमेत रहेका प्रधानमन्त्री शेरबहादुर देउवाले सरकार विस्तार गर्दा महत्त्वपूर्ण नेताहरू छुटेका बताएका छन् ।

`हिजोमात्र हामीले मन्त्रिपरिषद्लाई पूर्णता दिएका छौं,´ स्कुल अफ डेमोक्रेसीद्वारा बालुवाटारमा आयोजित विश्वेश्वरप्रसाद कोइराला : शताब्दी सन्दर्भ पुस्तक विमोचन कार्यक्रममा उनले भने `आगामी दिनमा साथीहरूलाई समेटिनेछ ।´प्रधानमन्त्री नियुक्त भएको ८८ दिनपछि देउवाले शुक्रबार मन्त्रिपरिषद् विस्तार गरेका थिए ।

प्रधानमन्त्री शेरबहादुर देउवाले ८८ दिनपछि शुक्रबार मन्त्रिपरिषद्लाई पूर्णता दिए तर राजनीतिक दलहरूबीचको भागबन्डामा प्रधानन्यायाधीश चोलेन्द्रशमशेर जबराको नाम जोडिएपछि देशमा नयाँ बेथिति संस्थागत हुने भय बढेको छ । प्रधानन्यायाधीश जबराका जेठान तथा गैरसांसद गजेन्द्र हमाललाई मन्त्री बनाएर न्यायपालिका, संविधानवाद र लोकतन्त्रमाथि हमला गरिएको भन्दै पूर्वप्रधानन्यायाधीश, पूर्वन्यायाधीश र वरिष्ठ अधिवक्ताहरूले गम्भीर आपत्ति जनाएका छन् ।

स्कुल अफ डेमोक्रेसीका अध्यक्ष नैनसिंह महरका अनुसार पुस्तकमा १०८ लेख संग्रहित छन् ।

प्रकाशित : आश्विन २३, २०७८ १०:१०
प्रतिक्रिया
पठाउनुहोस्

नोबेल शान्ति पुरस्कार विश्व प्रेसका लागि ’शुभ समाचार’ : मिखाइल गोर्वाचोव

कान्तिपुर संवाददाता

काठमाडौँ — पूर्वसोभियत नेता तथा नोबेल शान्ति पुरस्कार विजेता मिखाइल गोर्वाचोव ले शुक्रबार पत्रकार मारिया रेसा र दिमित्री मुरातोभलाई प्रदान गरिएको यसवर्षको नोबेल शान्ति पुरस्कार विश्वका प्रेसका लागि ‘शुभ समाचार’ भएको बताएका छन् । ‘

यो राम्रो छ, धेरै राम्रो खबर छ, यस पुरस्कारले आधुनिक संसारमा प्रेसको महत्त्वलाई ठूलो उचाइमा पुर्‍याउँछ,’ गोर्वाचोवले भनेका छन् । शुक्रबार गोर्वाचोव फाउन्डेसनको वेबसाइटमा जारी प्रेस वक्तव्यमा भनिएको छ, 'म महान, साहसी र इमान्दार पत्रकार तथा मेरा मित्र दिमित्री मुरातोभलाई बधाई दिन चाह्छु । उनलाई मैले छिट्टै नै भेटेर बधाई दिनेछु । गज्जब भयो । बाटो तय छ ।'

उनले यो एउटा समाचार मात्रै नभई उत्सव नै भएको प्रतिक्रिया दिएका छन् । उनले भनेका छन्, 'अहिलेको विश्वमा यस पुरस्कारले प्रेसको महत्त्वलाई अझ बढाउँछ । मलाई विश्वास छ दुवै जना यसका लागि लायक पात्र हुन् ।'

मुरातोभ आधुनिक रुसका तर्फबाट नोबेल शान्ति पुरस्कार पाउने पहिलो व्यक्ति हुन् । यसअघि तत्कालीन सोभियत संघका भौतिकशास्त्री तथा मानवअधिकार अभियन्ता आन्द्रेई साखारोभलाई सन् १९७५ मा यो पुरस्कार दिइएको थियो । त्यस्तै तत्कालीन सोभियत संघका पहिलो राष्ट्रपति मिखाइल गोर्वाचोवलाई सन् १९९० मा नोबेल शान्ति पुरस्कार दिइएको थियो ।

यस वर्षको नोबेल शान्ति पुरस्कार दुई जना पत्रकारलाई दिइने भएको छ । नर्वेजियन नोबेल कमिटीका अनुसार यस वर्षको नोबेल शान्ति पुरस्कार फिलिपिनो-अमेरिकी पत्रकार मारिया रेसा र रुसी पत्रकार दिमित्री मुरातोभलाई दिइने भएको छ ।

उनीहरूलाई अभिव्यक्ति स्वतन्त्रताको रक्षाका लागि गरेको प्रयासका लागि नोबेल शान्ति पुरस्कार दिइएको कमिटीले जनाएको छ । प्रजातन्त्रको पूर्वसर्त र शान्तिका लागि अभिव्यक्ति स्वतन्त्रता महत्त्वपूर्ण भएको र त्यसको रक्षाका लागि रेसा र मुरातोभले उल्लेख्य भूमिका निर्वाह गरेको कमिटीले जनाएको छ ।

रेसा फिलिपिन्सको पेसिगबाट सञ्चालन भएको समाचार वेबसाइट र्‍यापलरकी संस्थापक तथा सीईओ हुन् । त्यसअघि उनले झन्डै २० वर्ष सीएनएनका लागि दक्षिणपूर्वी एसियाबाट खोज पत्रकारका रूपमा काम गरेकी थिइन् । फेक न्युजविरुद्धको अभियानका लागि टाइम म्यागजिनले उनलाई सन् २०१८ मा वर्ष व्यक्तिसमेत घोषणा गरेको थियो । उनी फिलिपिन्सका राष्ट्रपति रोड्रिगो दुतेर्तेको खरो आलोचक हुन् । उनलाई सन् २०१९ साइबर अपराधको आरोपमा पक्राउ गरिएको थियो । उनी रिपोर्टर्स विदाउथ बोर्डर्सको सूचना तथा प्रजातन्त्र आयोगकी सदस्यसमेत हुन् ।

त्यस्तै मुतारोभ रूसी अखबार नोभाया ग्याजेटाका प्रधान सम्पादक हुन् । उनले सन् १९९५ देखि २०१७ सम्म अखबारको सम्पादन गरेका थिए । नोभाया ग्याजेटालाई कमिटि टु प्रोटेक्ट जर्नालिस्ट्सले 'आजको रूसमा एक मात्र राष्ट्रिय रूपमा प्रभाव पार्न सक्ने आलोचनात्मक अखबार' को संज्ञा दिएको छ ।

दिमित्री आन्द्रेभिच मुरातोभ रुसमा बढ्दो चुनौतीका बीच अभिव्यक्ति स्वतन्त्रताका लागि वर्षौँदेखि लडेका छन् । १९९३ मा रुसमा स्थापना भएको स्वतन्त्र पत्रिका नोभाजा गजेटका संस्थापकमध्ये उनी एक थिए । १९९५ देखि उक्त पत्रिकाको उनी प्रधान सम्पादक समेत रहँदैआएका छन् । १९९३ मा सुरु भएदेखि नै नोभाया ग्याजेटाले भ्रष्टाचार, प्रहरी हिंसा, गैरकानुनी गिरफ्तारी, चुनावी अनियमितताविरुद्ध थुप्रै आलोचनात्मक आलेख प्रकाशन गर्दैआएको छ ।

हालसम्म नोभाया ग्याजेटामा आवद्ध ६ पत्रकारको हत्या भइसकेको छ । तीमध्ये चेचन्या युद्धबारे नयाँ खुलासासहित आर्टिकल लेख्ने पत्रकार अन्ना पोलित्कोभ्सकाजा पनि एक हुन् । हत्या र धम्कीका बाबजुद प्रधान सम्पादक मुरातोभले पत्रिकाको स्वतन्त्र नीति परिवर्तन गरेनन् ।

प्रकाशित : आश्विन २३, २०७८ ०९:५१
पूरा पढ्नुहोस्
प्रतिक्रिया
पठाउनुहोस्
×