आगामी निर्वाचनमा पहिलो शक्ति बन्ने कार्यदिशा- समाचार - कान्तिपुर समाचार
कान्तिपुर वेबसाईट
AdvertisementAdvertisement
एमालेको विधान महाधिवेशन आजदेखि

आगामी निर्वाचनमा पहिलो शक्ति बन्ने कार्यदिशा

‘समाजवादको आधार निर्माण’ गर्ने मुख्य कार्यदिशा तय गर्ने, पार्टीको विधान र सांगठनिक संरचनाबारे निर्णय लिने
माओवादी र एकीकृत समाजवादीविरुद्ध वैचारिक रणनीति तय गर्ने, सरकारको नेतृत्व गरेको कांग्रेसलाई आगामी निर्वाचनमा चुनौती दिने
बबिता शर्मा

काठमाडौँ — नेकपा विभाजन, सत्ताबाट बहिर्गमन र पार्टी विभाजनपछि एमालेले सबैभन्दा ठूलो अधिवेशन गर्दै छ । ललितपुरको गोदावरीस्थित ‘सनराइज हल’ मा शुक्रबारबाट हुने पहिलो विधान महाधिवेशनले ‘समाजवादको आधार निर्माण’ गर्ने मुख्य कार्यदिशा तय गर्नुका साथै पार्टीको विधान र सांगठनिक संरचनाबारे निर्णय गर्नेछ ।


यो महाधिवेशनले मुख्य गरी माओवादी र एकीकृत समाजवादी पार्टीविरुद्ध वैचारिक रणनीति तय गर्नेछ भने हाल सरकारको नेतृत्व गरेको कांग्रेसलाई आगामी निर्वाचनमा चुनौती दिने ‘कार्यभार’ निर्माण गर्ने एमालेले जनाएको छ । ‘पार्टीलाई वैचारिक रूपले सुस्पष्ट, संगठनात्मक दृष्टिले चुस्त र सुदृढ, भावनात्मक रूपमा एकताबद्ध, जनतासँग घनिष्ठ रूपमा आबद्ध मुलुकको बहुमत प्राप्त पहिलो शक्ति बनाउने,’ अध्यक्ष केपी शर्मा ओलीले महाधिवेशनमा प्रस्तुत गर्ने राजनीतिक प्रतिवेदनमा उल्लेख छ, ‘वर्तमान गठबन्धनको अवरसवादी, स्वार्थी र राजनीतिक अस्थिरता सिर्जना गर्ने चरित्रका बारेमा जनतालाई स्पष्ट गर्ने । गठबन्धन सरकारबाट गरिने जनविरोधी, राष्ट्रविरोधी क्रियाकलापको सशक्त भण्डाफोर र विरोध गर्ने ।’ प्रतिपक्षका रूपमा पार्टीको भूमिकालाई सशक्त, सिर्जनात्मक र प्रभावकारी बनाउने प्रतिवेदनमा उल्लेख छ ।

प्रतिनिधिसभा बैठक निरन्तर अवरुद्ध गर्दै आएको एमालेले विधान महाधिवेशनबाट देशव्यापी रूपमा राजनीतिक तरंग दिन खोजेको छ । कम्युनिस्ट नाम भएका माओवादी र एकीकृत समाजवादीप्रति लक्षित मुख्य नारा पनि महाधिवेशनले निर्धारण गरेको छ । ‘दक्षिणपन्थी अवसरवाद र संगठनात्मक अराजकतालाई परास्त गरौं,’ एमालेले आगामी कार्यदिशाबारे भनेको छ, ‘जबजको मार्गदर्शनमा समाजवादको आधार निर्माण गरौं ।’

महाधिवेशनमा देशैभरबाट ६ हजारभन्दा बढी प्रतिनिधि सहभागी हुनेछन् । अध्यक्ष ओलीको राजनीतिक, महासचिव ईश्वर पोखरेलको संगठनात्मक र संगठन विभागको तर्फबाट उपमहासचिव विष्णु पौडेलले विधान संशोधन प्रस्ताव पेस गर्नेछन् । यसअघि यी तीनैवटा दस्ताबेज स्थायी कमिटी, केन्द्रीय कमिटी र पुन: स्थायी कमिटीबाट अनुमोदन भइसकेका छन् । विधान महाधिवेशनमार्फत पार्टी संगठनलाई पुन:संगठित गर्ने र कार्यकर्ताको मनोबल उठाउने एमालेले जनाएको छ ।

एमाले नेताहरूले विधान महाधिवेशन पार्टीको आन्तरिक जीवनका लागि कोसेढुंगा सावित हुने दाबी गरेका छन् । माधवकुमार नेपालले पार्टी विभाजन गरी आफ्नो नेतृत्वमा एकीकृत समाजवादी गठन गरेपछि त्यसले पुर्‍याएको क्षतिलाई विधान महाधिवेशनको बलमा पूर्ति गर्ने र लगत्तै मंसिरमा राष्ट्रिय महाधिवेशन गर्ने एमालेको योजना छ ।

ओलीको राजनीतिक प्रतिवेदनमा राष्ट्रिय–अन्तर्राष्ट्रिय परिस्थितिको मूल्यांकन, संसद् विघटनदेखि पार्टी विभाजनसम्मको अवस्था, आफ्नो नेतृत्वको सरकारको कामको समीक्षासहित चुनावसम्मका लागि पार्टीको योजना उल्लेख छ । महासचिव पोखरेलको संगठनात्मक प्रतिवेदनमा पार्टी विभाजनपछि संगठन र अबको संगठनात्मक अवस्थाबारे उल्लेख छ । यसबाहेक विधान संशोधन प्रस्तावमा एमालेले दसौं महाधिवेशनको नेतृत्वको ढाँचा तय गरेको छ ।

तीन दिन चल्ने विधान महाधिवेशनमा तीनवटै प्रस्तावमा समूहगत छलफल गर्ने र उनीहरूको सुझावसमेत समेटेर पारित गर्ने एमालेको तयारी छ । यी प्रस्ताव पारित भएसँगै पार्टीलाई नयाँ गतिमा अगाडि बढाउन मद्दत पुग्ने र आगामी चुनावमा बहुमत हासिल गर्ने विश्वास एमाले नेताहरूले लिएका छन् ।

महाधिवेशनको व्यवस्थापनका लागि केन्द्रीय कमिटी बैठकले स्थायी कमिटी सदस्य रामबहादुर थापाको संयोजकत्वमा शेरबहादुर तामाङ, कृष्णगोपाल श्रेष्ठ, खिमलाल भट्टराई, महेश बस्नेत, विनोद श्रेष्ठ, सुजिता शाक्य, सुशीला नेपाल र पासाङ शेर्पा सदस्य रहेको समिति गठन गरेको थियो । सोही समितिले बिहीबार पत्रकार भेटघाटमार्फत महाधिवेशनको सबै तयारी पूरा भएको जानकारी दिएको हो । व्यवस्थापन समितिका संयोजक थापाका अनुसार पहिलो दिन अध्यक्षको मन्तव्यसहित तीनवटा प्रस्ताव पेस हुनेछन् । दोस्रो दिन असोज १६ मा समूह छलफल र समूह नेताबाट सुझावहरूको प्रस्तुति हुनेछ । तेस्रो दिन असोज १७ मा दस्ताबेज पेस गर्ने, अध्यक्ष ओली, महासचिव पोखरेल र उपमहासचिव पौडेलले समूह छलफलबाट आएका सुझाव र उठेका विषयहरूलाई स्पष्ट पार्दै सारसंक्षेपीकरण गर्ने तयारी छ ।

महाधिवेशनमा केन्द्रीय कमिटीका पदाधिकारीसहित सदस्य, केन्द्रीय विभागबाट चुनिएका प्रतिनिधि, प्रदेश कमिटीका सबै सदस्य, जिल्ला कमिटीका प्रतिनिधि, संघ र प्रदेशका सांसद, पार्टीका तर्फबाट निर्वाचित जिल्ला समन्वय समितिका प्रमुख र उपप्रमुख, पार्टी सदस्य रहेका स्थानीय पालिकाका प्रमुख र उपप्रमुख, जनसंगठन र पेसागत संगठनहरूबाट चुनिएका प्रतिनिधि, भारतलगायत प्रवासका संघ/संगठनहरूबाट चुनिएका प्रतिनिधि, पार्टी केन्द्रबाट विधानबमोजिम मनोनीत सदस्यहरू गरी ६ हजारभन्दा बढी प्रतिनिधि सहभागी हुने संयोजक थापाले जानकारी दिए । एमालेले प्रतिनिधि चयनमा महिला, जनजाति, दलित र अन्य समुदायको प्रतिनिधित्व गराउँदै समावेशी सहभागितामा यथेष्ट ध्यान दिइएको बताएको छ ।

थापाका अनुसार मुख्य सभाहलको मञ्चमा पदाधिकारी एवं स्थायी कमिटीका सदस्यहरू बस्नेछन् । सोही हलमा ३ हजार प्रतिनिधि, हलको दायाँबायाँको खाली हलमा १/१ हजार प्रतिनिधिका लागि बस्ने व्यवस्था गरिएको छ । त्यसबाहेक हलको दायाँबायाँका प्यासेजहरूको माथिल्लो खाली भागमा टेन्ट टाँगेर थप आवश्यक पर्न सक्ने १/१ हजार क्षमताका हल निर्माण गरिएको छ । थापाका अनुसार सबै गरेर ७ हजार क्षमताका हल तयार गरिएको छ ।

महाधिवेशनमा सहभागी हुने प्रतिनिधि, स्वयंसेवक, सुरक्षाकर्मी, गाडीका चालकहरूका लागि बिहानको खाना र दिउँसोको खाजा महाधिवेशनस्थलमै व्यवस्थापन गरिएको संयोजक थापाले बताए । उनका अनुसार खानाको व्यवस्थापनका लागि क्याटरिङलाई जिम्मा दिइएको छ । महाधिवेशन अवधिभर हरेक दिन बिहान ९ देखि ११ बजेसम्म खानाको समय छुट्याइएको छ भने दिउँसोका लागि प्याकेटको खाजा व्यवस्था गरिएको छ । प्रतिनिधिहरूले साँझको खाना भने बसेकै स्थान वा आफ्नै व्यवस्थापनमा खाने भएका छन् । उनीहरूको आवासको व्यवस्था काठमाडौंमा रहेका प्रदेश तथा जिल्ला सम्पर्क मञ्चहरूको सहयोगमा सम्बन्धित भूगोलका प्रदेश कमिटीहरूले गर्ने भएका छन् । निजी साधन नभएका प्रतिनिधिलाई गोदावरी पुर्‍याउन ललितपुरको सातदोबाटोबाट २० वटा हायसको व्यवस्था गरिएको व्यवस्थापन समितिका सदस्य खिमलाल भट्टराईले जानकारी दिए ।

कोरोना महामारीकै अवस्था भएकाले त्यसप्रति संवेदनशील हुँदै मास्क, सेनिटाइजरको प्रयोग र थर्मल गनबाट शरीरको तापमान लिने व्यवस्था मिलाइएको छ । तर, जिल्ला प्रशासन कार्यालय काठमाडौंले बिहीबार ‘कोभिड–१९ संक्रमण कायमै रहेको हुँदा भीडभाड गर्ने, सभा, जुलुस गर्ने, जात्रा महोत्सव, भोज आदि नगर्ने र नगराउने’ भनेर आदेश जारी गरेको थियो । उक्त आदेशलाई व्यवस्थापन समितिका संयोजक थापाले राजनीतिक पूर्वाग्रहबाट प्रेरित भएको आरोप लगाए । ‘एक महिनाअघिदेखि महाधिवेशनबारे सम्बन्धित निकायलाई जानकारी गराएका थियौं तर बिहीबार जारी गरिएको आदेश राजनीतिक रूपमा प्रेरित छ,’ उनले पत्रकारसँग भने ।

थापाले गरे जबजको व्याख्या

स्थायी कमिटी सदस्य रामबहादुर थापाले पार्टीेको वैचारिक लाइन ‘जनताको बहुदलीय जनवाद’ अब सिद्धान्त भइसकेको बताएका छन् । पार्टीभित्र यस विषयमा अझै सिद्धान्त कि कार्यक्रम भन्ने बहस भइरहेका बेला माओवादी धारबाट एमालेमा जोडिएका नेता थापाले मदन भण्डारीको परिकल्पनामा आएको यो विचार अब व्यवहारले सिद्धान्त भइसकेको बताए । ‘मदन भण्डारीको परिकल्पना थियो जबज, जनवादी क्रान्ति सम्पन्न भएपछि त्यो व्यवहारले नै सिद्धान्त थियो भन्ने पुष्टि भयो,’ उनले प्रथम विधान महाधिवेशन मूल व्यवस्थापन कमिटीका तर्फबाट बिहीबार आयोजित पत्रकार सम्मेलनमा भने, ‘विषयमा पार्टीभित्र मदनवाद विचारधारा भनेर जाने कि भन्ने पनि छ । कसैले यो कार्यक्रम मात्र हो भन्ने पनि छ ।’

उनले जबजलाई अब नयाँ ढंगले थप संश्लेषण गर्दै अघि बढ्नुपर्ने पनि बताए । एमालेभित्रकै घनश्याम भुसाललगायतका नेताले पार्टीको वैचारिक धारको राम्ररी समीक्षा नगरेको भन्दै आलोचनात्मक धारणा राखिरहेका बेला माओवादी धारबाट एमालेमा आएका नेता थापाले यसको राम्रो बचाउ गरेका छन् । विधान महाधिवेशनका लागि अध्यक्ष केपी शर्मा ओलीले ल्याएको राजनीतिक प्रतिवेदनले पार्टीको वैचारिक विषय निरूपण गरेको उनको धारणा छ । ‘जनवादी क्रान्तिपछि पनि के हुने भन्ने कुरा जबजले भनेको छ’, थापाले भने, ‘एउटा सामन्तवादको अवशेषको अन्त्य, अर्को राष्ट्रिय पुँजीको निर्माण र समाजवादी संक्रमणकालीन योजना छ । यो विषय महाधिवेशनको प्रतिवेदनमा पनि आएको छ । यो सान्दर्भिक छ र वैचारिक रूपमा पनि निरूपण गरेको छ’, उनले भने ।


प्रकाशित : आश्विन १५, २०७८ ०६:२१
प्रतिक्रिया
पठाउनुहोस्

एमाले विधान महाधिवेशन : मुख्य एजेन्डा संगठन सुदृढीकरण

चुनाव केन्द्रित रणनीति बनाउन पालिकास्तरसम्मका जनप्रतिनिधिलाई सहभागी गराइँदै, पाँच हजारभन्दा बढी प्रतिनिधि
विभिन्न समूहमा हुने छलफलका दौरानमा आएका विचारलाई सम्पादन गरेर जुन विचार बनाउनेछौं, त्यसको नेपाली राजनीतिमा धेरै ठूलो महत्त्व हुनेछ ।– घनश्याम भुसाल, उपमहासचिव
बबिता शर्मा

काठमाडौँ — एमालेको आसन्न विधान महाधिवेशनमा राजनीतिक कार्यदिशा, आगामी निर्वाचनका लागि रणनीति, सांगठनिक संरचना जस्ता एजेन्डामा केन्द्रित हुने भएको छ । विभाजनले पार्टीलाई धक्का लागेको निष्कर्षमा पुगेको एमालेले संगठन निर्माणलाई महाधिवेशनको मुख्य कार्यसूची बनाएको छ । महाधिवेशनमार्फत नै चुनाव केन्द्रित रणनीति बनाउने तयारी पनि गरिएको छ ।

एमालेको शुक्रबारदेखि हुने पहिलो विधान महाधिवेशनमा राजनीतिक, सांगठनिक प्रतिवेदन र विधानको मस्यौदामा छलफल गरेर अनुमोदन गर्ने तयारी छ । एमाले सचिव प्रदीप ज्ञवालीले आगामी निर्वाचनमा पार्टीलाई बहुमतका साथ पहिलो शक्ति बनाउन निर्णय गर्ने बताए । ‘एमाले आज पनि राष्ट्रिय राजनीतिको केन्द्रमा छ,’ उनले भने, ‘निर्वाचन नजिक छ । चाहे नियमित कार्यतालिकाअनुसार १४ महिनापछिको चुनाव होस्, चाहे विभिन्न कारणले अर्ली इलेक्सन होस्, पार्टीलाई बहुमत प्राप्त दलका रूपमा स्थापित गर्न महाधिवेशनले वैचारिक, संगठनात्मक र भावनात्मक रूपले थप सुदृढ गर्नेबारेमा निर्णय गर्नेछ ।’ महाधिवेशनलाई निर्वाचन केन्द्रित बनाउनै एमालेले पालिकास्तरसम्मका जनप्रतिनिधिलाई सहभागी गराउँदै छ ।

एमाले उपमहासचिव घनश्याम भुसालले पार्टीभित्र देखिएका विवाद र विभाजनका समस्यालाई विधान महाविधेशनले समाधान गर्नुपर्ने बताए । ‘आन्तरिक रूपले हामी अझ एकताबद्ध हुनुपर्नेछ । पार्टीका कार्यकर्ता, शुभचिन्तकको मुख्य अपेक्षा पनि यही हो,’ उनले भने । एमाले अब राष्ट्रिय राजनीतिमा प्रभावकारी हस्तक्षेप गर्ने गरी अगाडि बढ्ने उनले बताए । ‘फेरि पनि आजको राजनीतिमा सबैभन्दा बढी प्रभावकारी बन्न र हिजोको वर्चस्व फर्काउनका लागि एमालेले अहिलेका राष्ट्रिय राजनीतिका मुद्दामा सकारात्मक, प्रगतिशील हस्तक्षेप गर्दै अगाडि जानुपर्छ,’ भुसालले भने, ‘त्यस दौरानमा अरू वामपन्थी र लोकतान्त्रिक शक्तिहरूसँग सम्बन्ध विस्तार हुनेछन्, तिनीहरूसँगै अघि बढ्ने आधारहरू बन्दै जानेछन् ।’

एमाले अध्यक्ष एवं तत्कालीन प्रधानमन्त्री केपी शर्मा ओलीले गरेको प्रतिनिधिसभा विघटनको निर्णयमा सर्वोच्च अदालतले गरेको फैसला र त्यसपछि बनेको नयाँ सरकारलाई लिएर एमालेले प्रश्न उठाउँदै आएको छ । एमालेको बुझाइमा यी घटनाक्रमले लोकतन्त्र र संविधानमा खतरा पैदा भएको छ । ‘पछिल्लो समय विकसित घटनाक्रम खास गरेर सर्वोच्च अदालतको परमादेश, राजनीतिक दलसम्बन्धी अध्यादेश र यसबीचमा विभिन्न संवैधानिक अंगबाट खेलिएको भूमिकाले मुलुकको लोकतन्त्र, संविधानको मर्म र राजनीतिक स्थायित्वमाथि गम्भीर चुनौती खडा गरेका छन्,’ सचिव ज्ञवाली भने, ‘एमालेले संविधानको रक्षा, कार्यान्वयन र विकास, लोकतन्त्रको सुदृढीकरणका लागि अग्रपंक्तिमा रहेर भूमिका खेल्नेछ । त्यससम्बन्धमा हामी महाधिवेशनमार्फत निर्णय गर्नेछौं ।’

एमाले सचिव ज्ञवालीले पार्टीले समृद्धिको यात्रालाई जारी राख्ने र समाजवादको आधार निर्माण गर्ने ठोस कार्यदिशा महाधिवेशनले तय गर्ने जानकारी दिए । ‘आन्दोलनका उपलब्धिको रक्षाका लागि मुलुकको आर्थिक विकास, समृद्धि र जनतालाई सामाजिक न्याय अपरिहार्य छ । समाजवादका आधारहरू निर्माण गर्नु अपरिहार्य छ,’ उनले भने, ‘पछिल्ला राजनीतिक घटनाक्रमले हामीले सुरु गरेको समृद्धिको यात्रा अवरुद्ध भएको छ ।’

एमालेले राष्ट्रियताको मुद्दा उचाल्ने अर्को रणनीति तय गर्दै छ । विधान महाधिवेशनले पार्टीको सिद्धान्त जनताको बहुदलीय जनवादलाई अद्यावधिक र त्यसको थप व्याख्या गर्ने भएको छ । पार्टीको कार्यदिशा र कार्यभारको स्पष्ट व्याख्या पनि महाधिवेशनको प्राथमिकतामा छ । ‘हाम्रो राजनीति, यसको अस्थिरता, वैदेशिक हस्तक्षेप वा तिनका प्रभावहरूका कारण मूलतः कम्युनिस्ट पार्टीका रूपमा ठोस कार्यक्रम बनाएर अगाडि जानुपर्नेछ । त्यसका लागि हाम्रो सामान्य समझदारी बनेको छ,’ उपमहासचिव भुसालले भने, ‘भावी कार्यक्रमका बारेमा छलफल, बहस र अध्ययनका लागि ढोका खोलेका छौं । यसले हामीलाई तत्काल एक ठाउँमा उभिन ग्राउन्ड दिएको छ । महाधिवेशनमा विभिन्न समूहमा छलफल हुनेछन्, त्यस दौरानमा आएका विचारलाई सम्पादन गरेर जुन विचार बनाउनेछौं, त्यसको नेपाली राजनीतिमा धेरै ठूलो महत्त्व हुनेछ ।’

सचिव ज्ञवालीले विधान महाधिवेशनको जमघटलाई पार्टीको शक्ति प्रदर्शनका रूपमा पनि उल्लेख गरेका छन् । ‘यो पार्टीलाई एउटै दृष्टिकोण र एउटै लयमा हिंडाउने अभियान पनि हो,’ उनले भने, ‘समग्र कम्युनिस्ट आन्दोलनले छुट्टै विधान महाधिवेशन अहिलेसम्म नगरेकाले यसको विशेष महत्त्व हुनेछ ।’ प्रचार विभाग प्रमुख योगेश भट्टराई विधान महाधिवेशनबाट एकताको सन्देश दिन खोजिएको बताउँछन् । ‘यो महाधिवेशनमा मात्रै नभएर देशभरका अगुवा कार्यकर्ताको भेला पनि हो,’ उनले भने, ‘यसमा सामान्य रूपमा रहेको मतभेदलाई पनि समाप्त पार्दै पार्टीले वैचारिक तथा संगठनात्मक रूपमा एकताबद्ध बनाएर लैजाने कोसिस हुन्छ ।’

कसरी हुँदै छ महाधिवेशन ?

ललितपुरको गोदावरीमा हुने विधान महाधिवेशनमा देशैभरबाट पाँच हजारभन्दा बढी प्रतिनिधि सहभागी हुँदै छन् । विधानमा यो महाधिवेशनमा राष्ट्रिय प्रतिनिधि परिषद्का सदस्य प्रतिनिधि हुने व्यवस्था छ । तर परिषद् गठन हुन नसकेकाले एमालेले विधानको बाधा अड्काउ फुकाउ धारा प्रयोग गर्दै प्रतिनिधि छनोटको मापदण्ड खुकुलो बनाएर धेरैलाई सहभागी गराउन लागेको हो ।

विधान महाधिवेशनमा केन्द्रीय कमिटीका सबै पदाधिकारी र सदस्य, केन्द्रीय निकायका सबै पदाधिकारी र सदस्य, प्रदेश कमिटीका सम्पूर्ण सदस्य, केन्द्रीय विभागबाट सचिवसहित पाँच जना, जनसंगठनका केन्द्रीय पदाधिकारी र वरिष्ठ सदस्य गरी १० जना, जिल्ला कमिटीका पदाधिकारी, संघीय र प्रदेशका सांसद, एमाले पार्टी सदस्य रहेका जिल्ला समन्वय समितिका प्रमुख र उपप्रमुख, एमालेबाट निर्वाचित पालिकाका प्रमुख, उपप्रमुख तथा प्रवास कमिटीबाट पनि प्रतिनिधित्व गराइँदै छ । जिल्लाको निर्वाचन क्षेत्रबाट एक महिलासहित दुई र एक दलितलाई अनिवार्य गरिएको छ ।

तीन हजार सिट क्षमता रहेको हलमा विशेष व्यवस्था गरेर सबै प्रतिनिधि अटाउने गरी व्यवस्था गरिएको छ । नअटेका प्रतिनिधिहरूलाई टेन्टमा राख्ने तयारी छ । प्रतिनिधिहरूका लागि परिचयपत्र, झोला, दस्तावेज, स्वास्थ्यसम्बन्धी किट्स तयार गरिएका छन् । हल, प्रतिनिधिका लागि खाना, यातायातलगायत तयारी अन्तिम चरणमा पुगेको एमालेले जनाएको छ । ‘प्रतिनिधिको नामावली संकलनको काम अन्तिम चरणमा पुगेको छ,’ सचिव ज्ञवालीले भने ।

पहिलो दिन शुक्रबार उद्घाटनपछि समूह विभाजन र तीन वटै दस्तावेज वितरण गरिनेछ । शनिबार समूहगत छलफल गर्ने र आइतबार छलफलका साझा निष्कर्ष हलमा प्रस्तुत गर्ने कार्यसूची छ । केन्द्रीय कार्यालय सचिव शेरबहादुर तामाङले तीन वटा दस्तावेजमा छलफलका लागि ११ वटा समूह बनाउने तयारी रहेको जानकारी दिए । महाधिवेशन प्रतिनिधिका लागि परिचयपत्र र महाधिवेशनका लागि चाहिने सामग्री केन्द्रीय कार्यालयबाट उपलब्ध गराइँदै छ ।

प्रतिनिधिहरूलाई कार्यक्रम स्थलसम्म पुर्‍याउन सातदोबाटोबाट सटल बसहरूको व्यवस्था गरिएको ज्ञवालीले बताए । ‘त्यहाँसम्म उहाँहरू सार्वजनिक वा निजी गाडीमा आउन सक्नुहुन्छ । त्यहाँबाट महाधिवेशन स्थलसम्म पार्टीले प्रबन्ध गरेका बसहरूले पुर्‍याउँछन् । बिहानको खाना र दिउँसोको खाजाको व्यवस्था महाधिवेशन स्थलमै हुन्छ । साँझको खाना र बस्ने प्रबन्ध सम्बन्धित पार्टी कमिटीहरूले गर्छन्,’ उनले भने, ‘कहीँकतै त्यस्तो समस्या पर्‍यो भने सात वटै प्रदेशका सम्पर्क कमिटीहरूले थप प्रबन्ध गर्छन् ।’

प्रकाशित : आश्विन १५, २०७८ ०६:१२
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×