![खोप प्रमाणीकरण जिल्ला र प्रदेशबाटै](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2021/miscellaneous/vaccineverificationqueueteku04-23720210255481-0182021090900-1000x0.jpg&w=1001&h=0)
![](https://assets-cdn.ekantipur.com/uploads/source/ads/ekantipur-1-1282024082932.gif)
Highlights
- ५० बेडभन्दा माथिका जुनसुकै सरकारी अस्पतालबाट प्रमाणीकरण गर्न सकिने
- 'क्यूआर कोडसहितको प्रमाण पत्र भदौदेखि'
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
काठमाडौँ — वैदेशिक रोजगारीमा जान चाहनेले खोप लगाएको प्रमाणीकरण जिल्ला र प्रदेश स्तरबाटै गर्न मिल्ने भएको छ । सरकारले खोप लगाएको प्रमाणीकरण काठमाडौंको शुक्रराज ट्रपिकल तथा सरुवा रोग अस्पताल टेकु, निजामती कर्मचारी अस्पताल मिनभवन, पाटन अस्पताल र बलम्बुको सशस्त्र प्रहरी अस्पतालमा मात्रै गर्ने व्यवस्था गरेको थियो ।
![](https://assets-cdn.ekantipur.com/uploads/source/ads/comp-900x100-1672024010950.gif)
मन्त्रालयको सचिवस्तरीय निर्णयबाट खोप लगाएको प्रमाणीकरण गर्न चार अस्पताल मात्रै जानुपर्ने बाध्यताबाट मुक्त गर्न ५० बेड क्षमताभन्दा माथिका जुनसुकै सरकारी अस्पतालमा गर्न सकिने व्यवस्था गरेको हो । ‘अब खोप लगाएको प्रमाणीकरण गर्न काठमाडौंमा घण्टौं लाइन बसिरहनु पर्दैन,’ स्वास्थ्य सेवा विभागको परिवार कल्याण महाशाखा प्रमुख डा. तारानाथ पोखरेलले भने,‘जिल्ला, प्रदेश र संघको ५० बेडभन्दा माथिका सरकारी अस्पतालमा खोप लगाएको प्रमाणीकरण गर्ने अधिकार दिइसकेको छ । यो सेवा सोमबारदेखि नै सुरु हुन्छ ।’ निर्णय कार्यान्वयन गर्न परिपत्र भइसकेको उनले बताए ।
सरकारले खोप लगाउने बित्तकै क्यूआर कोड बिनाको कार्ड दिने गरेको छ । जुन कार्डलाई अन्य मुलुकले मान्यता नदिएपछि प्रमाणीकरण गर्ने गरिएको छ । केही देशले प्रमाणीकरण पत्रलाई मात्रै अझै मान्यता दिएको छैन । कुवेतले खोप लगाएको प्रमाण क्यूआर कोर्डबाट नै थाहा हुने प्रणाली नभएको मुलुकका नागरिकलाई आफ्नो मुलुकमा प्रवेश दिएको छैन । काठमाडौंको भद्रकालीमा केही युवाले क्यूआर कोडसहितको कार्ड माग गर्दै प्रदर्शन समेत गरेका छन् ।
क्यूआर कोड भदौदेखि
स्वास्थ्य मन्त्रालयले क्यूआर कोडसहितको प्रमाणपत्र भदौ १ देखि जारी गर्ने भएको छ । ‘भदौ १ गतेदेखि खोप लगाउने बित्तिकै डाटा इन्ट्री गरेर क्यूआर कोडसहितको प्रमाण पत्र जारी गर्न प्राविधिक काम भइरहेको छ,’ पोखरेलले भने,‘इन्टरनेट र कम्प्युटर सुविधा आवश्यक पर्ने भएकोले अहिले स्रोत र जनशक्तिको व्यवस्थापन भइरहेको छ ।’ खोप लगाउने बित्तिकै क्यूआर कोड भएको प्रमाण पत्र दिन खोप लगाउनु अघि नै नाम दर्ता भएको हुनुपर्छ । सहरी क्षेत्रमा यो सहजै भएपनि ग्रामिण भेगमा समस्या पर्न सक्ने विभागले अनुमान गरेको छ । नयाँ व्यवस्था अनुसार कार्ड जारी गर्न प्रि–रजिस्ट्रेसन गर्ने, खोप लगाउन आएकै ठाउँमा कम्प्युटरमा नाम दर्ता गर्ने र इन्टरनेट, कम्प्युटरको सुविधा नभएको ठाउँमा रजिस्ट्ररमै नाम दर्ता गरेर पछि अपडेट गर्ने योजना अघि सारिएको छ ।
![](https://assets-cdn.ekantipur.com/uploads/source/ads/900-x-100-1-0282024055738.gif)