![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
काठमाडौँ — श्रम, रोजगार तथा सामाजिक सुरक्षा मन्त्रालयले वैदेशिक रोजगारीमा जाने नेपाली कामदारलाई कोभिड विरुद्धको जोन्सन एण्ड जोन्सन खोप दिनको लागि कोभिड–१९ संकट व्यवस्थापन केन्द्र(सीसीएमसी)लाई अनुरोध गरेको छ ।
![](https://assets-cdn.ekantipur.com/uploads/source/ads/comp-900x100-1672024010950.gif)
श्रमले खोप प्राप्त गर्न नसक्दा रोजगारीको अवसरबाट वञ्चित हुनुपर्ने अवस्था आएको भन्दै सिसिएमसीलाई जोन्सन खोप उपलब्ध गराउन आग्रह गरेको हो । प्रमुख गन्तव्य देशहरुले जोन्सनलाई मान्यता दिएको छ ।
‘तत्कालको लागि एकलाख जनालाई पुग्ने खोपको प्रबन्ध भए वैदेशिक रोजगारीको क्षेत्रमा देखिएको समस्यालाई सम्बोधन हुनेछ,’ श्रम सचिव सुर्यप्रसाद गौतमले भने । नेपाली कामदारका प्रमुख गन्तव्य देशहरुले खोपको प्रबन्ध भएका देशबाट मात्रै कामदार लैजाने नीति लिएको छ । दुवै मात्राको खोप नभएपछि नयाँ र बिदामा आएका नेपाली कामदार समेत रोजगारीमा जान पाएका छैनन् । चालू आर्थिक वर्षमा एकलाख ५९ हजारले श्रम स्वीकृति पाएका छन् । जसमध्ये धेरै कामदार खोप नपाएर गन्तव्य देशमा जान रोकिएका छन् ।
नेपालीको आकर्षक गन्तव्य मानिएको दक्षिण कोरिया, संयुक्त अरब इमिरेट्स, मलेसिया र कुवेतले नेपाली कामदारलाई जान रोकेको छ । साउदी अरब, कतार, बहराइन र ओमानले भने सर्तसहित क्वारेन्टाइनमा १० दिन बस्ने गरी कामदार लगिरहेको छ ।
गत वर्षको फागुन २१ देखि कोरियामा कामदार पठाउने प्रक्रियालाई स्थगित छ । कोरियाले नेपाललाई कोरोनाको अति संवेदशनील मुलुकको सूचीबाट हटाएको छैन । यूएईले वैशाख २३ देखि नेपालबाट कामदारसहितको यात्रुलाई प्रवेश निषेध छ । कोरोनाको ठूलो मारमा परेको भारतलाई खुल्ला गरेपनि नेपालबाट कामदार लगेको छैन । यूएईले भने नेपालमा खोप नभएको भन्दै नेपालीको प्रवेशलाई अनुमति दिएको छैन । यूएईको स्वास्थ्य मन्त्रालयको सूचना अनुसार फिजर–बायोटेक, स्पुटनिक भी, सिनोफार्म, अक्सफोर्ड–एस्ट्राजेनेका खोपलाई मात्रै मान्यता दिइएको छ ।
कोरोनाको पहिलो संक्रमणको लहर देखिएलगत्तै कामदार लैजान बन्द गरेको कुवेतले आउँदो साउन १७ गतेदेखि खोप लगाइसकेको कामदार मात्रै आउन पाउने जनाएको छ । कुवेतले नेपालमा रोकिएका पहिला नै भिसा भएका कामदारले अनलाइनबाट नै नविकरण गर्न पाउने बाटो खोलिदिएको छ । नविकरण गरी उनीहरु साउन १७ देखि कुवेत जान पाउनेछन् । कुवेतले जोनसनलाई अनुमोदन दिएको छ ।
साउदी अरब र कतारले जोन्सनलाई अनुमति दिएको छ । साउदी र कतारले खोप लगाएको कामदारले ७ दिन अनिवार्य क्वारेन्टाइनमा बस्नुपर्ने नियमलाई हटाएको छ । श्रम मन्त्रालयले क्वारेन्टाइनमा बस्दा कामदारको लाखौं खर्च भइरहेको सूचना आइरहेकोले श्रम स्वीकृति पाएका कामदारलाई खोप जरुरी भएको जनाएको छ ।
![](https://assets-cdn.ekantipur.com/uploads/source/ads/900-x-100-1-0282024055738.gif)