काठमाडौँ — कोरोना महामारीका कारण दुई वर्षदेखि रोकिएको ‘सगरमाथा पुरस्कार र तेन्जिङ–हिलारी पुरस्कार’का लागि संस्कृति, पर्यटन तथा नागरिक उड्डयन मन्त्रालयले आइतबार ९ जना आरोहीको नाम चयन गरेको छ ।

पर्यटन विभागका निर्देशक मिरा आचार्यका अनुसार पुरस्कार समितिको सिफारिसका आधारमा लामो समयसम्म ‘सबैभन्दा कान्छो आरोही’को रेकर्ड कायम राख्न सफल शम्भु तामाङलाई सन् २०२० का लागि र सन् २०२१ का लागि सर्वाधिक सगरमाथा आरोहण गर्ने कामीरिता शेर्पालाई १ लाख राशीको सगरमाथा पुरस्कार प्रदान गरिने भएको छ ।

१७ वर्षको उमेरमा सगरमाथा आरोहण गरेका तामाङको रेर्कड २९ वर्षपछि सन् २००१ मा तेम्बाछिरी शेर्पाले ब्रेक गरेका थिए । त्यस्तै कामीरिता शेर्पाले यसै वर्षको वसन्तकालीन याममा २५ औं पटक सगरमाथा आरोहण गर्दै आफ्नै २४ औं पटकको विश्व रेकर्ड ब्रेक गरेका थिए ।

त्यसैगरी ५० हजार राशीको तेन्जिङ हिलारी पुरस्कार ७ जना आरोहीलाई प्रदान गरिने भएको छ । जस अन्तर्गत सन् २०१९ अघि नै विश्वका ८ हजार मिटर अग्ला १४ वटा हिमाल आरोहण गरि सकेर पुन: दोस्रो पटक यी हिमाल आरोहणमा लागिरहेका सानु शेर्पालाई सन् २०२० को तेन्जिङ हिलारी पुरस्कार प्रदान गरिने भएको छ । एकै सिजनमा एकै साथ सगरमाथा आरोहण गर्ने विश्वकै पहिलो दम्पती आङ्दावा शेर्पा र पासाङ फुटी शेर्पा र ३७ वर्षको उमेरमा २२ पटक सगरमाथा आरोहण गरिसकेका ङिमा नुरु शेर्पाले पनि २०२० को तेन्जिङ हिलारी पुरस्कार पाउने भएका छन् ।